မဲခေါင်၊ မတ်လ ၃၁
ကရင်နီပြည်နယ်အခြေစိုက် Loikaw Local PDF Alpha 4 တပ်ရင်းက ရဲဘော်သစ် အနည်းဆုံး အယောက် ၅၀ ခေါ်ယူမယ်လို့ တပ်ရင်းတာဝန်ရှိသူက မတ်လ ၃၁ ရက်နေ့က ပြောပါတယ်။
Alpha 4 အာဏာသိမ်းစစ်တပ်က စစ်မှုထမ်းဥပဒေကို အသက်သွင်းနေတာကြောင့် စစ်ကောင်စီတပ်ထဲ မဝင်လိုတဲ့လူငယ်တွေ ရွေးချယ်နိုင်စေဖို့လည်း ရည်ရွယ်တယ်လို့ တပ်ရင်းတာဝန်ရှိသူတစ်ဦးက ပြောပါတယ်။
“စစ်မှုထမ်းဥပဒေကလည်း တကယ်အသက်သွင်းနေပြီဆိုတော့ ဘေးကြပ်နံကြပ်အခြေနေမှာ စစ်မှုမထမ်းချင်သူတွေကို ဖိတ်ခေါ်တာပေါ့။ ကျွန်တော်တို့ တပ်ရင်းက ရှေ့တန်းမှာ စစ်ရေးနယ်မြေချဲ့ထွင်ဖို့တွေလည်း ရှိတယ်ပေါ့နော်။ ကယ်ဆယ်ရေးပိုင်းအတွက်လည်း ဆေးတပ်သားတွေလိုအပ်နေပါတယ်”လို့ သူက ပြောပါတယ်။
တာဝန်ထမ်းဆောင်လိုတဲ့ ရဲဘော်အနေနဲ့ အသက် ၁၈ နှစ်ကနေ ၄၀ ကြား ကျန်းမာရေးကောင်းမွန်ပြီး ပင်ပန်းဆင်းရဲမှုဒဏ်ခံနိုင်ကာ အနည်းဆုံး ၂ နှစ် စစ်မှုထမ်းရမယ်လို့ဆိုပါတယ်။
ဒါ့အပြင် စစ်ကောင်စီတပ်ကို လက်နက်ကိုင်တော်လှန်ဖို့ စိတ်အားထက်သန်ပြီး အာဏာရှင်စနစ်ကျဆုံးကာ ဖက်ဒရယ်ဒီမိုကရေစီပေါ်ပေါက်ရေးအတွက် ပါဝင်ကူညီအားဖြည့်နိုင်တဲ့အပြင် တပ်ရင်းက ချမှတ်တဲ့ စည်းကမ်းတွေကို လိုက်နာနိုင်ရမယ်လို့ သိရပါတယ်။
Loikaw Local PDF တပ်ရင်းတွေအနေနဲ့ ၁၁၁၁ စစ်ဆင်ရေးကာလတလျောက်လုံး ရှေ့တန်းစစ်မျက်နှာပြင်မှာ တိုက်ခိုက်နေတဲ့အပြင် ရှမ်းပြည်နယ်တောင်ပိုင်းက ရှေ့တန်းတိုက်ပွဲတွေမှာလည်း အင်အားဖြန့်ကျက်ပြီး စစ်ကောင်စီတပ်ကို တော်လှန်နေတယ်လို့ သိရပါတယ်။
CJ-004
