မဲခေါင်၊ ဒီဇင်ဘာ ၁၈

ရှမ်းပြည်နယ်တောင်ပိုင်း၊ ရပ်စောက်မြို့နယ်၊ ကောင်းဘို့ကျေးရွာမှာ PNO ပအိုဝ်းပြည်သူ့စစ်တွေက မူးယစ်ဆေးသုံးစွဲသူတွေလို့ဆိုကာ ရွာသား အယောက် ၂၀ ကို တနေရာတည်းမှာ ဖမ်းဆီးခဲ့တယ်လို့ သိရပါတယ်။

ပြီးခဲ့တဲ့ ဒီဇင်ဘာ ၁၃ရက်နေ့ ည ၈နာရီခွဲအချိန်ခန့်က PNO ပအိုဝ်းပြည်သူ့စစ် အင်အား ၅၀ ခန့်၊ ဓနုတိုင်းရင်းသားများအဖွဲ့ချုပ် ဥက္ကဌ ဦးဘမော်တို့နဲ့အတူ ဒေသခံ ပျူစောထီးခေါင်းဆောင်တွေဖြစ်တဲ့ ဦးငွေစိုး ဆေးဆရာကိုဇော်၊ ကျော်ပဲတို့က မူးယစ်ဆေးသုံးတဲ့ ဒေသခံတွေကို လာရောက်ဖမ်းဆီးခဲ့တာလို့သိရပါတယ်။

“လာဖမ်းတာက PNO၊ ရဲ၊ ခွေး(စစ်ကောင်စီ) မပါဘူး။ ဆေးသုံးတဲ့ လူငယ်အများစုပါတယ်၊ တချို့ကျတော့ ခြံသွားခြံလာလည်း ဖမ်းတဲ့ထဲပါတယ်။ အဖမ်းခံရတဲ့ လူငယ်တွေရဲ့ မိသားစုတွေက တောသူဌေးတွေ။ ဖမ်းပြီးတော့ သေနတ်ဖောက်သွားသေးတယ်။ ဘာလို့ဖမ်းမှန်းမသိဘူး။ နှစ်ကုန်လို့ အမှုရှာတာလား ငွေရှာတာလားမသိ” လို့ ကောင်းဘို့ကျေးရွာသား တစ်ဦးကပြောပြပါတယ်။

အဖမ်းခံရတဲ့ထဲမှာ အမှန်တကယ် မူးယစ်ဆေးသုံးစွဲနေတဲ့ အသက်မပြည့်သေးတဲ့ ကလေးတွေအပြင်၊ ခြံလုပ်တဲ့သူတွေပါပါတယ်လို့ သိရပါတယ်။ သူတို့ကို ညတွင်းချင်း ရပ်စောက်မြို့နယ် ရဲစခန်းကို ခေါ်သွားခဲ့တာ ဖြစ်ပါတယ်။

အဖမ်းခံရတဲ့သူ အယောက် ၃၀ ဟာ ကောင်းဘို့ကျေးရွာအုပ်စုတွင်းရှိ ရွာတွေကဖြစ်တယ်လို့ သိရပါတယ်။ မူးယစ်ဆေးသုံးတဲ့ လူငယ်တွေရဲ့ မိဘတချို့က ငွေကြေးတတ်နိုင်တာကြောင့် ရဲစခန်းမှာ ငွေပေးပြီး လွှတ်ပေးဖို့ ညှိနှိုင်းပေမယ့် မလွှတ်ပေးဘဲ မနေ့ ဒီဇင်ဘာ ၁၇ ရက်နေ့က လူငယ် ၉ဦးကို ထောင်ချလိုက်တယ်လို့ သိရပါတယ်။

ကျန်တဲ့ ၁၁ ဦးကတော့ အခုထိ ရပ်စောက်မြို့နယ်ရဲစခန်းမှာပဲ ရှိနေပြီး မလွှတ်ပေးသေးဘူးလို့ ဆိုပါတယ်။

အဲ့ဒီဖြစ်စဥ်ပြီးနောက် ဓနုတိုင်းရင်းသားများအဖွဲ့ချုပ် ဥက္ကဌ ဦးဘမော်တို့နဲ့အတူ ဒေသခံ ပျူစောထီးခေါင်းဆောင်တွေဖြစ်တဲ့ ဦးငွေစိုး ဆေးဆရာကိုဇော်၊ ကျော်ပဲ နဲ့အတူ စစ်ကောင်စီ ၃ ဦးပေါင်းပြီး ကောင်းဘို့ကျေးရွာအုပ်စုတွင်းက ရွာတွေမှာ ရပ်ကွက်လုံခြုံရေးအတွက် ဟုဆိုကာ တအိမ်လျှင် ကျပ် ၅၀၀၀ မှ ၂၀၀၀၀ အထိ လိုက်လံကောက်လံနေတယ်လို့ သိရပါတယ်။

ကောင်းဘို့ကျေးရွာဟာ တောင်ကြီးခရိုင်၊ ရပ်စောက်မြို့နယ်မှာရှိပြီး ရပ်စောက် – လှိုင်းတက်လမ်းပေါ်တွင်ရှိပြီး ဓနုဒေသနဲ့ဆက်စပ်နေတာကြောင့် အချက်အချာကျတဲ့ ရွာကြီးတစ်ရွာဖြစ်ပါတယ်။ အရင်ကတည်းက မူးယစ်ဆေးဝါးနဲ့ ပတ်သတ်ပြီး အရေးယူတာမျိုး လုပ်လေ့မရှိတဲ့အတွက် မူးယစ်ဆေးသုံးစွဲသူ များပြားတယ်လို့ နာမည်ကြီးတဲ့ နေရာတစ်ခုလည်းဖြစ်ပါတယ်။ ဒေသခံရွာသားအများစုဟာ လိမ္မော်ခြံစိုက်ပျိုးရေးကို အဓိကလုပ်ကိုင်ကြပါတယ်။

CJ001

#MeKongNews

#ရပ်စောက်

#ကောင်းဘို့

#စစ်ကောင်စီ

#PNO

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)