မဲခေါင် ၊ နိုဝင်ဘာ ၁၁
ကရင်နီပြည်မှာ စစ်ကောင်စီတပ် ကျေးရွာတွေကို လက်နက်ကြီးနဲ့ ပစ်ခတ်လို့ ဒေသခံ အမျိုးသမီး ၂ ဦး သေဆုံးပြီး ထိခိုက်ဒဏ်ရာ ရသူတွေလည်း ရှိတယ်လို့ ကရင်နီ အမျိုးသားများ ကာကွယ်ရေးတပ် -KNDF က မနေ့ညပိုင်းမှာ ထုတ်ပြန်ပါတယ်။
နိုဝင်ဘာလ ၉ ရက်နေ့မှာ လွိုင်ကော်နဲ့ လောပိတကြားရှိ ကျေးရွာ တစ်ရွာကို တိုက်ပွဲဖြစ်ပွားခြင်း မရှိဘဲ စစ်ကောင်စီက လက်နက်ကြီးနဲ့ ပစ်ခတ်ခဲ့တာကြောင့် အမျိုးသမီးငယ်တစ်ဦး ထိခိုက် သေဆုံး ခဲ့ပါတယ်။
အဲ့ဒီနေ့မှာ ဒီးမော့ဆိုမြို့နယ် အရှေ့ဘက်ခြမ်းရှိ ကျေးရွာ တစ်ရွာကို စစ်ကောင်စီရဲ့ ငွေတောင် အခြေစိုက် ခလရ (၁၀၂) တပ်က လက်နက်ကြီးနဲ့ ပစ်ခတ်တာကြောင့် အမျိုးသမီးကြီး တစ်ဦး ထိခိုက် သေဆုံးခဲပါတယ်။
စစ်ကောင်စီ လက်နက်ကြီးနဲ့ပစ်လို့ သေဆုံးခဲ့ရတဲ့ အဲ့ဒီအရပ်သား ၂ ဦးဟာ အသက် ၁၀ နှစ်အရွယ် အမျိုးသမီးငယ် နဲ့ အသက် ၄၅ နှစ်အရွယ် အမျိုးသမီး ဖြစ်တယ်လို့ ကရင်နီ လူ့အခွင့်အရေးအဖွဲ့ KnHRG က ထုတ်ပြန်ပါတယ်။
စစ်ကောင်စီရဲ့ ပစ်ခတ် တိုက်ခိုက်မှုတွေဟာ တိုက်ပွဲ ဖြစ်ပွားနေချိန် မဟုတ်သလို တိုက်ပွဲဖြစ်ပွားတဲ့ ဒေသတွေနဲ့ ဝေးကွာတာကြောင့် စစ်ကောင်စီက လက်နက်မဲ့ အရပ်သား ပြည်သူများကို ရန်သူသဖွယ် သတ်မှတ်ကာ ရည်ရွယ်ချက်ရှိရှိ တိုက်ခိုက်ခဲ့တာဖြစ်ပြီး စစ်ရာဇဝတ်မှုတွေ ပေါ်ပေါ်ထင်ထင် ကျူးလွန်တာလို့ KNDF ကဆိုပါတယ်။
စစ်ကောင်စီဟာ နိုဝင်ဘာ ၁၀ ရက်နေ့မှာလည်း ဒီးမော့ဆိုမြို့နယ် အနောက်ဘက်ခြမ်းရှိ လမ်းမကြီးပေါ်နဲ့ ဘေးဝဲယာ နေရာများကို တိုက်ပွဲ ဖြစ်ပွားခြင်း မရှိဘဲ တိုက်လေယာဉ် ၂ စီးနဲ့ ၃ ကြိမ်ထက်မနည်း တိုက်ခိုက်ခဲ့သလို လက်နက်ကြီးတွေနဲ့ ပစ်ခတ်ခဲ့တာကြောင့် ပြည်သူတစ်ဦး ထိမှန် ဒဏ်ရာရရှိ ခဲ့ပါတယ်။
ကရင်နီပြည်နယ်အတွင်း စစ်ကောင်စီဟာ ဒေသခံတွေ နေထိုင်တဲ့ ကျေးရွာတွေကို ပစ်မှတ်ထားပြီး တိုက်ခိုက်နေတာကြောင့် ပြည်သူတွေ အနေနဲ့ စစ်ရေးသတိရှိရှိ သွားလာကြဖို့၊ လက်နက်ကြီး အန္တရာယ် ကြိုတင် ကာကွယ်နိုင်တဲ့ လုံခြုံရေးဆိုင်ရာ လုပ်ဆောင်ချက်တွေ လုပ်ဆောင်ထားဖို့ KNDF က တိုက်တွန်းထားပါတယ်။
CJ-002
