မဲခေါင်၊ နိုဝင်ဘာ ၃

ညီနောင်မဟာမိတ် ၃ဖွဲ့နဲ့ တိုက်ပွဲပြင်းထန်နေတဲ့ လားရှိုးမြို့နယ် နမ့်ပေါင်ကျေးရွာအုပ်စုအတွင်းမှာ စစ်ကောင်စီတပ်တွေက နယ်မြေရှင်းလင်းရေးလုပ်ဆောင်တယ်ဆိုတဲ့ အကြောင်းပြချက်နဲ့ နိုဝင်ဘာ ၂ရက် ညနေပိုင်းက ပြည်သူတွေကိုဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။

စစ်ကောင်စီတပ်ရဲ့ ခလရ ၂၉၁ က ဖမ်းဆီးခေါ်ဆောင်သွားတာဖြစ်ပြီး ပြည်သူ ၅ဦးကို ဖမ်းဆီးခေါ်ဆောင်သွားတာ မျက်မြင်တွေ့လိုက်တယ်လို့ နမ့်ပေါင် ဒေသခံတစ်ဦးက မဲခေါင်ကိုပြောပါတယ်။

“နမ့်ပေါင်မှာက စစ်ကောင်စီက တပ်ရင်းတစ်ရင်းရယ်၊ ရဲစခန်းရယ်၊ ပြည်သူ့စစ်တွေရယ်ရှိတယ်။ ပြီးခဲ့တဲ့ရက်ကတိုက်ပွဲတွေဖြစ်ပြီး အခုပြည်သူတွေကို လိုက်ဖမ်းနေတယ်” လို့ သူက ပြောပါတယ်။

ဒါ့အပြင် နမ့်ပေါင်ဘက်ကနေ လားရှိုးဘက်ကို ထွက်တဲ့နားမှာရှိတဲ့ စစ်ကောင်စီ စစ်ဆေးရေးဂိတ်က ဆိုင်ကယ်စီးလာတဲ့ လူငယ်အမျိုးသားတစ်ဦးကို ပစ်ခတ်လိုက်တာ ပွဲချင်းပြီး သေသွားတယ်လို့ နမ့်ပေါင်ဒေသခံတွေထံကနေ သိရပါတယ်။

နမ့်ပေါင်ကျေးရွာအုပ်စုဟာ လားရှိုးမြို့နယ်အတွင်းက ကျေးရွာအုပ်စုကြီးဖြစ်ပြီး မြို့နဲ့ မိုင် ၂၀ ကျော်ဝေးကာ တန့်ယန်း-မိုင်းရယ် လမ်းပေါ်မှာ တည်ရှိပါတယ်။

အဲဒီနေရာတဝိုက်မှာ ပြီးခဲ့တဲ့ရက်ပိုင်းက ညီနောင်မဟာမိတ်တပ်ဖွဲ့တွေနဲ့ စစ်ကောင်စီတပ်တို့ တိုက်ပွဲပြင်းထန်ခဲ့ပြီး စစ်ကောင်စီဘက်က လေယာဉ်တွေနဲ့ လာရောက်တိုက်ခိုက်ခဲ့ပါသေးတယ်။

MK – 004

#MeKongNews

#နမ့်ပေါင်

#လားရှိုး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)