မဲခေါင်၊ နို၀င်ဘာ ၁၀
ရှမ်းပြည်နယ်၊ တောင်ကြီးမြို့၊ စူဠာမုနိဘုရား အဆင်းလမ်းနဲ့ ဗိုလ်ချုပ်အောင်ဆန်း လမ်းဆုံမှာ ယာဉ်ထိန်းရဲတွေ လိုင်စင်မဲ့ကား ဖမ်းပြီး တစ်စီး ကျပ်သိန်းဆယ်ချီ တောင်းနေတယ်လို့ မြို့ခံတွေက ပြောပါတယ်။
နိုဝင်ဘာလ ၄ ရက်နေ့က စပြီး လိုင်စင်မဲ့ကား မှန်သမျှ စစ်ဆေး တောင်းရမ်းနေတာဖြစ်ရာ နို၀င်ဘာလ ၆ ရက်နေ့မှ ဖမ်းဆီးခံရလို့ ကျပ် သိန်း ၅၀ ပေးလိုက်ရတယ်လို့ ကိုယ်တိုင် ကြုံတွေ့ခဲ့ရသူ တစ်ဦးက ပြောပါတယ်။
“အဖေ့ကား ဖမ်းတာ W ဆိုတော့ သိန်းဆယ်ချီ ပေးခဲ့ရတယ်။ အမြတ်လေး နဲနဲပါးပါး ရလိုရညား အောက်ဈေး ပေးဝယ်လိုက်တာ။ ကားက အကောင်းစားလည်း မဟုတ်ပါဘူး။ နဂိုကတည်းက အဆင်မပြေတဲ့အထဲ ပါပါတယ်။ ပင်စင်မယူခင်က စုထားတာ အကုန်ပေးလိုက်ရတယ်။ ၅၀ တောင်းတာတော့ လွန်ပါတယ်” လို့ သူကပြောပါတယ်။
လိုင်စင်မယ့်ကား ဖမ်းရာမှာ သာမန် ပြည်သူတွေကို ၅ သိန်းကနေ ကျပ်သိန်းဆယ်ချီ တောင်းပေမယ့် ဌာနဆိုင်ရာ ဝန်ထမ်းတွေ အပါအဝင် မိသားစုဝင်တွေကိုတော့ ကျပ်သောင်းဂဏန်းသာ တောင်းတယ်လို့ ဆိုပါတယ်။
“ဖမ်းချင် အဝင်တွေလည်း ပိတ်ဖမ်းပေါ့။ နယ်စပ်ကနေ ပေးဝင်ပြီး ဒီရောက်မှ ဖမ်းမယ် ဆိုတာက မဟုတ်သေးဘူးလေ။ ခေတ်ပျက်ကြီးထဲမှာ မသထာရေစာ တောင်းစားနေကြတာ” လို့ ငွေကျပ် ၂ သိန်း ပေးခဲ့ရသူ တစ်ဦးက ပြောပါတယ်။
ခေတ်အဆက်ဆက် တောင်ကြီးမြို့ ပွဲတော်ကာလတွေမှာ လိုင်စင်မဲ့ ယာဉ်တွေ အားလုံး ခွင့်ပြုထားပေမယ့် ဒီနှစ် တန်ဆောင်တိုင်ပွဲတော် နီးကပ်လာချိန် အခုလို ဖမ်းဆီးတာကြောင့် စစ်ကောင်စီ လက်အောက်ခံ ဌာနဆိုင်ရာတွေ အနေနဲ့ ရသမျှ တောင်းယူ ထွက်ပြေးဖို့ ပြင်ဆင်နေတာကို ဖော်ပြနေတယ်လို့ နိုင်ငံရေး စောင့်ကြည့်လေ့လာသူ တစ်ဦးက ပြောပါတယ်။
၂၀၂၁ ခုနှစ်၊ စစ်အာဏာသိမ်းပြီးနောက် စစ်တပ်၊ ထွေအုပ်၊ ရဲတွေ ပူးပေါင်းပြီး ကရင်ပြည်နယ်၊ မြဝတီဘက်ကနေ ရှမ်းပြည်နယ် တောင်ပိုင်းကို တစ်ရက်ပျမ်းမျှ လိုင်စင်မဲ့ကား အစီး ၂၀ အထိ တင်သွင်းနေတယ်လို့ စုံစမ်းသိရပါတယ်။
CJ-007
#MeKongNews
#တောင်ကြီးမြို့
#လိုင်စင်မဲ့_ကား
#ယာဥ်ထိန်းရဲ
