စစ်ကောင်စီ ခေါင်းဆောင် မင်းအောင်လှိုင်ရဲ့ စစ်တပ်က ၂၀၂၂ ခုနှစ် ဇန်နဝါရီ ၁ ရက်ကနေ ဒီဇင်ဘာ ၃၁ ရက် တစ်နှစ်တာ အတွင်းမှာ နိုင်ငံအနှံ့ အမှုပေါင်း ၁,၀၅၈ မှုကို ကျူးလွန်ခဲ့ပြီး အရပ်သား ပြည်သူလူထုရဲ့ နေအိမ်ပေါင်း ၄၁,၃၅၅ လုံးကျော်ကို မီးရှို့ဖျက်ဆီးခဲ့တယ်လို့ သိရပါတယ်။
မီးသတ်ဦးစီးဌာနရဲ့ ထုတ်ပြန်ချက်အရ စစ်ကိုင်းတိုင်းမှာ မီးရှို့ခံရတဲ့ အမှု ၆၉၀ မှုနဲ့ မီးလောင်ပျက်စီး နေအိမ် ၃၁,၄၀၀ ကျော်၊ မကွေးတိုင်းမှာ မီးရှို့ခံရတဲ့ အမှု ၂၁၀ မှုနဲ့ မီးလောင်ပျက်စီး နေအိမ် ၈,၅၀၀ ကျော်၊ မန္တလေးတိုင်းမှာ မီးရှို့ခံရတဲ့ အမှု ၂၅ မှုနဲ့ မီးလောင်ပျက်စီး နေအိမ် ၄၈၀ ကျော် ရှိခဲ့တယ်လို့ သိရပါတယ်။
အလားတူ ကချင်ပြည်နယ်မှာ မီးရှို့ခံရတဲ့ အမှု ၁၅ မှုနဲ့ မီးလောင်ပျက်စီး နေအိမ် ၂၅၀ ကျော်၊ ချင်းပြည်နယ်မှာ မီးရှို့ခံရ အမှု ၂၀ မှုနဲ့ မီးလောင်ပျက်စီး နေအိမ် ၂၅၀ ကျော်၊ ကရင်ပြည်နယ်မှာ မီးရှို့ခံရအမှု ၂၅ မှုနဲ့ မီးလောင်ပျက်စီး နေအိမ် ၁၂၀ ကျော်ရှိတယ်လို့လည်း သိရပါတယ်။
ဒါ့အပြင် ကယားပြည်နယ်မှာ မီးရှို့ခံရအမှု ၂၅ မှုနဲ့ မီးလောင်ပျက်စီး နေအိမ် ၁၂၀ ကျော်၊ တနင်္သာရီတိုင်းမှာ မီးရှို့ခံရအမှု ၂၀ မှုနဲ့ မီးလောင်ပျက်စီး နေအိမ် ၈၅ ကျော်၊ ပဲခူးတိုင်းမှာ မီးရှို့ခံရအမှု ၁၀ မှုနဲ့ မီးလောင်ပျက်စီး နေအိမ် ၆၅ ကျော်၊ ရှမ်းပြည်နယ်မှာ မီးရှို့ခံရအမှု ၁၃ မှုနဲ့ မီးလောင်ပျက်စီး နေအိမ် ၆၀ ကျော်၊ မွန်ပြည်နယ်မှာ မီးရှို့ခံရအမှု ၅ မှုနဲ့ မီးလောင်ပျက်စီး နေအိမ် ၂၅ ကျော် ရှိတယ်လို့လည်း ဖော်ပြထားပါတယ်။
အခု ဖော်ပြခဲ့တဲ့ အချက်အလက်တွေက လွတ်လပ်တဲ့ မီဒီယာတွေ၊ အရပ်ဖက် ပြည်သူ့ အဖွဲ့အစည်းတွေနဲ့ လူထုက ပေးပို့လာတဲ့ မြေပြင်အချက်အလက်တွေကို စိစစ် ဖော်ပြထားတာ ဖြစ်တယ်လို့ မီးသတ်ဦးစီးဌာနက ဖော်ပြထားပါတယ်။
ဒါ့အပြင် အခုဖော်ပြတဲ့ အချက်အလက်တွေထက် မြေပြင်မှာ ဖြစ်ပွားတာတွေက ပိုမိုများပြား နိုင်တယ် ဆိုပြီးတော့လည်း မီးသတ်ဦးစီးဌာန ပြောကြားထားပါတယ်။