မဲခေါင်၊ ဧပြီ ၂၀
ရန်ကုန်တိုင်း၊ လှိုင်သာယာမြို့နယ် ၁၂ရပ်ကွက်မှာ ဗုံးပေါက်လို့ စစ်ဗျူဟာမှူးနဲ့ တပ်ကြပ်ကြီးတစ်ဦး သေဆုံးခဲ့တာကြောင့် စစ်ကောင်စီက ဖမ်းဆီးစစ်ဆေးမှုတွေ တင်းကြပ်နေပြီး ခြိမ်းခြောက်ပြောဆိုတာတွေ လုပ်နေကြတယ်လို့ ဒေသခံတွေက မဲခေါင်သတင်းကို ပြောပါတယ်။
ဧပြီ၁၃ရက်နေ့ ည၈နာရီကျော်အချိန်က ၁၂ရပ် ကွက်ရုံးအနီး ပေါက်ကွဲမှု၂ကြိမ်ဖြစ်ပွားခဲ့ကာ စစ်ဗျူဟာမှူး ဗိုလ်မှူးကြီးဇင်မောင်လွင်နဲ့ တပ်ကြပ်ကြီးမျိုးသန့်တို့သေဆုံးခဲ့ပြီး ရာအိမ်မှူးမျိုးမြင့်မှာ ထိခိုက်ဒဏ်ရာတဲ့ ဖြစ်စဉ် ဖြစ်ပြီးနောက် အခုလိုစစ်ကောင်စီက စစ်ဆေးမှုတွေ ကြမ်းတမ်းနေတာဖြစ်တယ်လို့ ရပ်ကွက်နေပြည်သူတစ်ဦးက ပြောပါတယ်။
“ ၁၅ရက်နေ့က ရေဥက္ကံပတ္တမြား၁လမ်းက အဆောင်နေတဲ့လူငယ်တွေ ဖမ်းခံရတယ်။ ၂၀ ရပ်ကွက်မှာဆို လူမိုက်ကျော်နိုင်ဦးအဖွဲ့က ရိုက်နှက်ပြီးဆွဲခေါ်သွားတာမျိုးတွေ လုပ်တယ်။ ဒီ
ကောင့်ယောက်ဖက အပိုင်း၇က ရာအိမ်မှူးလေ။ အဲ့ဒါကို ဖေစ့်ဘွတ်တင်လို့ ရပ်ကွက်ထဲပတ်ဆဲနေ သေးတယ်။ ၂၀ရပ်ကွက်မှာတော့ ဧည့်စာရင်းတွေ အသေစစ်နေတာ။ ဆိုင်ကယ်ဖမ်းတဲ့ရပ်ကွက်တွေထဲမှာ ၇ရပ်ကွက်က အကောင်တွေအဆိုးဆုံးပဲ” လို့ သူကပြောပါတယ်။
ဧည့်စာရင်း ဝင်ရောက်စစ်ဆေးရာမှာလည်း သန်းခေါင်စာရင်းနဲ့ အတိအကျစစ်ဆေးသလို ရေချိုးခန်းအိမ်သာအထိ ဝင်ရောက်ရှာဖွေတာ၊ အဝတ်ထုပ်အမဲတွေ ဖွင့်ဖောက်စစ်ဆေးတာတွေအထိ ပြုလုပ်နေပြီး ရပ်ကွက်အတွင်းအဆောင်တွေကို စစ်ဆေးရာမှာလည်း အဆောင်ပိုင်ရှင်တွေကို ဆဲဆိုတာ သေနတ်နဲ့ပစ်သတ်လို့ရတယ်ဆိုပြီး ခြိမ်းခြောက်တာတွေ လုပ်ဆောင်နေတယ်လို့ ဒေသခံပြည်သူတွေက ပြောပါတယ်။
ဧည့်စာရင်းလာရောက်စစ်ဆေးရာမှာ ဟောင်တဲ့ အိမ်မွေးခွေးတွေကို သတ်ပစ်တာတွေရှိသလို သောင်ကြီးရဲစခန်းက ၁၄ရပ်ကွက် နယ်ထိန်းဖြစ်သူ ဇော်ဝင်းသိန်းကလည်း ဆဲဆိုကြိမ်းမောင်းမှုတွေ လုပ်နေတယ်လို့ ရပ်ကွက်နေပြည်သူတစ်ဦး ကပြောပါတယ်။
ဒီရက်ပိုင်းအတွင်း ၁ ရပ်ကွက်၊ ၂ ရပ်ကွက်၊ ၃ ရပ်ကွက်၊ ၅ ရပ်ကွက်၊ ၉ ရပ်ကွက်၊ ၁၀ ရပ်ကွက်၊ ၁၁ ရပ်ကွက်နဲ့ ၁၂ ရပ်ကွက်တွေမှာ ဧည့်စာရင်းစစ်ဆေးမှုတွေ ပိုမိုဆိုးလာနိုင်ပြီး ဆိုင်ကယ်ဖမ်းဆီးရာမှာလည်း လုယက်သလို လုပ်ဆောင်တာတွေရှိတယ်လို့ ဒေသခံတွေထံကနေ သိရပါတယ်။
မှတ်ချက် – ပုံဟောင်း
MK-005
#MeKongNews
#စစ်ကောင်စီ
#လှိုင်သာယာ
#ဧည့်စာရင်း