မဲခေါင်၊ မတ် ၁၀
ပဲခူးတိုင်း၊ အုတ်ဖိုမြို့နယ်၊ ထန်းပင်ကုန်းကျေးရွာက ရာအိမ်မှူး ပျူစောထီး မျိုးဝင်း ဆိုသူရဲ့ နေအိမ်မှာ တပ်စွဲထားတဲ့ စစ်ကောင်စီတပ်ကို ဝင်ပစ်ခဲ့တယ်လို့ ပဲခူး PDF က ထုတ်ပြန်ပါတယ်။
ရာအိမ်မှူး ပျူစောထီး မျိုးဝင်းဟာ မိသားစုတွေကို ခမရ (၆) ထဲမှာ သွားနေခိုင်းပြီး ထန်းပင်ကုန်း နေအိမ်ကို စစ်ကောင်စီ ကင်းစခန်း အနေနဲ့ အသုံးပြုနေတယ်လို့ သိရတာကြောင့် ပဲခူး PDF က မနေ့က မနက်ပိုင်းမှာ ပစ်ခတ်ခဲ့တာလို့ ဆိုပါတယ်။
ဒီပစ်ခတ်မှုကြောင့် ပျူစောထီး မျိုးဝင်း နေအိမ်က စစ်သားတွေ အထိအခိုက်ရှိမရှိ စုံစမ်းနေဆဲပဲလို့ သိရပါတယ်။
အဆိုပါ တိုက်ခိုက်မှုကို သာယာဝတီခရိုင် PDF တပ်ရင်း (၃၈၀၂)၊ တပ်ခွဲ (၄) နဲ့ တပ်ခွဲ (၅) တို့ ပူးပေါင်း လုပ်ဆောင်ခဲ့တာ ဖြစ်ပြီး စစ်ကောင်စီဘက်က ပြန်လည် ပစ်ခတ်မှုတွေ ရှိပေမဲ့ ပြည်သူ့ကာကွယ်ရေးတပ်တွေ အထိအခိုက် မရှိဘူးလို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဖေဖော်ဝါရီ ၂၆ ရက် ညနေကလည်း နန်းထိုက်အောင် စစ်ဆင်ရေး အဖြစ် ခမရ (၄၄၀) ဂိတ်နဲ့ (၇၂) မိုင် ဂိတ်ကို ပဲခူး PDF က တိုက်ခိုက်ခဲ့ရာ စစ်ကောင်စီတပ်သား ၂ ဦးသေပြီး ၆ ဦး ဒဏ်ရာရခဲ့တယ်လို့ ထုတ်ပြန်ထားပါတယ်။
MK-007
