မဲခေါင်၊ ဖေဖော်ဝါရီ ၄
စစ်ရေးပဋိပက္ခအပြင်းထန်ဆုံးဒေသတစ်ခုဖြစ်တဲ့ ကရင်နီနဲ့ ရှမ်းပြည်နယ်တောင်ပိုင်းမှာ အာဏာသိမ်း ၂ နှစ်အတွင်း စစ်ရှောင် ၁၂၈ ဦး သေဆုံးခဲ့ရတယ်လို့ တိုးတက်သောကရင်နီပြည်သူ့အင်အားစု PKPF က ထုတ်ပြန်ခဲ့ပါတယ်။
အဲဒီဒေသက စစ်ဘေးရှောင်တွေဟာ ဆေးဝါးကုသမှု မလုံလောက်လာတာတွေ၊ ဖမ်းဆီး သတ်ဖြတ် ခံရတာတွေ၊ လက်နက်ကြီးကျတာနဲ့ လေကြောင်းက ဗုံးကြဲတိုက်ခိုက်မှုတွေကြောင့် သေဆုံးခဲ့ရတယ်လို့ သိရပါတယ်။
ဒါ့အပြင် စစ်ဘေးရှောင်စခန်းတွေကို လက်နက်ကြီးကျတာနဲ့ လေယာဉ်နဲ့ ဗုံးတာတွေမှာ သေဆုံးမှု တွေ ရှိခဲ့ရုံမျှမက စစ်ဘေးရှောင်ရတာ ကာလကြာရှည် တာကြောင့် ကိုယ့်ကိုကိုယ် အဆုံးစီရင်ခဲ့တဲ့သူလည်း ရှိခဲ့တယ်လို့ PKPF ထံမှ သိရပါတယ်။
“စစ်ရှောင်တွေ အဓိက အများဆုံးကတော့ ဆေးဝါးကုသမှုမလုံလောက်လို့ သေဆုံးရတာပါ။ အရပ်သား ပြည်သူတွေကတော့ စစ်ကောင်စီက ဖမ်းဆီးပြီးသတ်ဖြတ်ခံရတာကြောင့် သေဆုံးရတာအများဆုံးပါ” လို့ PKPF တာဝန်ရှိသူတစ်ဦးက မဲခေါင်သတင်းကိုပြောပါတယ်။
တိုက်ပွဲတွေဖြစ်ပွားပြီးတိုင်းမှာ စစ်ကောင်စီ တပ်ဖွဲ့တွေဟာ ဖြတ်လေးဖြတ်မဟာ ဗျူဟာနဲ့ ဖြတ်တောက် ပိတ်ဆို့လေ့ရှိတာကြောင့် ဒဏ်ရာရ စစ်ဘေးရှောင်တွေ၊ နာတာရှည်ရောဂါသည် စစ်ဘေးရှောင်တွေအတွက် ဆေးဝါးကအစ ရိက္ခာအဆုံး ရရှိဖို့ အခက်အခဲရင်ဆိုင်ရတယ်လို့ ဒေသခံစစ်ဘေးရှောင် ကူညီစောင့်ရှောက် ရေးအဖွဲ့တွေက မကြာခဏ ထုတ်ဖော်ပြောကြားလေ့ရှိပါတယ်။
စစ်ဘေးရှောင်တွေ သေဆုံးခဲ့ရတဲ့အပြင် စစ်တပ်က ဖမ်းဆီးသတ်ဖြတ်မှုတွေကြောင့်လည်း အရပ်သားပြည်သူတွေ သေဆုံးရမှုတွေလည်း ရှိခဲ့ရာ ၂ နှစ်တာ ကာလအတွင်း စစ်တပ်ရဲ့ ဖမ်းဆီးသတ်ဖြတ်ခံရသူ ၃၀၂ ဦးထိ ရှိခဲ့တာကြောင့် အရပ်သား စုစုပေါင်း ၄၃၀ ဦး သေဆုံးခဲ့ကြောင်း လည်း သိရပါတယ်။
ကရင်နီပြည်နယ်တွင် ၂၀၂၁ ခုနှစ် မေလမှ စတင်ကာ လက်နက်ကိုင်တော်လှန်ရေးများ ပေါ်ပေါက်ပြီးနောက် စစ်ရေးပဋိပက္ခများ ပြင်းထန်စွာ ဖြစ်ပေါ်လာရာ စစ်ကောင်စီလက်အောက်ခံအဖွဲ့တွေနဲ့ တိုင်းရင်းသားလက်နက်ကိုင်အဖွဲ့တွေ၊ ဒေသခံပြည်သူ့ကာကွယ်ရေးတပ်ဖွဲ့တွေအကြား တိုက်ပွဲပေါင်း ၅၆၂ ကြိမ်ဖြစ်ပွားခဲ့ပြီး ဒေသတွင်း လေကြောင်းနဲ့ တိုက်ခိုက်ခံရတာ အကြိမ်ရေ ၁၉၀ ရှိခဲ့တယ်လို့ PKPF က သိရပါတယ်။
နှစ်ဖက်ထိတွေ့တိုက်ပွဲကာလတွေအတွင်း ပြည်သူ့ကာကွယ်ရေးတပ်ဖွဲ့ဝင်နဲ့ လက်နက်ကိုင်ဦးရေ ၂၁၉ ဦး ကျဆုံးခဲ့ပြီး စစ်ကောင်စီတပ်ဘက်က သေဆုံးသူ ၁၅၈၁ ဦးရှိခဲ့ပြီး ကရင်နီပြည်နယ်ထဲက ဘာသာရေးအဆောက်အအုံ ၂၈ ခု ပျက်စီးခဲ့ပြီး ဒေသခံအရပ်သားနေအိမ် ၁၃၁၇ လုံး ပျက်စီးဆုံးရှုံးခဲ့တယ်လို့ ထုတ်ပြန်ချက်အရသိရပါတယ်။
ကရင်နီ ဒေသခံတွေဟာ မြို့နယ် တစ်ခုနဲ့တစ်ခု စစ်ရှောင်ရတဲ့ကာလမတူပေမယ့် ၂၀၂၁ ခုနှစ် ဇွန်လလောက်ကစပြီး နေရပ်စွန့်ခွာထွက်ပြေးနေကြရကာ လက်ရှိအချိန်မှာတော့ အစားအသောက်၊ ဆေးဝါးနဲ့ အမိုးအကာတွေ အဓိကလိုအပ်နေတယ်လို့ ဒေသခံတွေဆီက သိရပါတယ်။
စစ်တပ်အာဏာသိမ်းပြီးတဲ့နောက်ပိုင်း နိုင်ငံအနှံ့ပေါ်ပေါက်လာတဲ့ ခုခံတွန်းလှန်မှုတွေထဲမှာ ရှမ်းတောင်ပိုင်း ဖယ်ခုံနဲ့ ကရင်နီဒေသဟာ စစ်ရေးပဋိပက္ခအပြင်းထန်ဆုံးဒေသတစ်ခုဖြစ်လာခဲ့ပြီး အဲဒီဒေသမှာ ရှိတဲ့ လူဦးရေရဲ့ ၃ ပုံ ၂ ပုံ ဖြစ်တဲ့ လူဦးရေ ၁၉၀,၀၀၀ ကျော်ဟာ နေရပ်စွန့်ခွာထွက်ပြေးတိမ်းရှောင်နေရတယ်လို့ ISP Myanmar က ထုတ်ပြန်ထားပါတယ်။
MK – 009
ဓာတ်ပုံ – ကရင်နီပြည် စစ်ဘေးရှောင် ကူညီစောင့်ရှောက်ရေးကွန်ရက်
#MeKongNews
#စစ်ဘေးရှောင်
#ရှမ်းတောင်