မဲခေါင်၊ ဇန်နဝါရီ ၁၉
ရန်ကုန်-မန္တလေး အမြန်လမ်းမှာ မှတ်ပုံတင် မပါတဲ့ ခရီးသွား လူငယ်တွေ စစ်ဆေးတွေ့ရှိပါက စစ်တပ်က ရိုက်နှက်စစ်ဆေး ဖမ်းဆီးမှုတွေ လုပ်နေတယ်လို့ မျက်မြင်တွေ့သူ တစ်ဦးက ပြောပါတယ်။
အခုလို စစ်ဆေး ဖမ်းဆီးမှုတွေကို ရန်ကုန်မြို့အထွက် ဇီးရိုးမိုင် ဂိတ်မှာ ပြုလုပ်နေတာ ဖြစ်တယ်လို့ ဆိုပါတယ်။
“ လူငယ် အများစုကို စစ်ဆေးပြီး လမ်းပေါ်မှာ ဝမ်းလျားမှောက်ခိုင်းထားတယ်။ ရန်ကုန် အထွက်ဂိတ်မှာ စစ်နေတာ တွေ့တယ်။ တစ်ချို့လည်း အရိုက်ခံရတဲ့ ကလေးတွေရှိတယ်။ လူငယ်တွေကို အဓိက ပစ်မှတ်ထားပြီး စစ်ဆေးနေကြတာ။ ခရီးသွားမယ်ဆို လိုအပ်တာတွေ အကုန်ပြည်စုံမှ သွားကြပါ” လို့ သူကပြောပါတယ်။
အမြန်လမ်း စစ်ဆေးရေး ဂိတ်တွေမှာ စစ်ဆေးကြတဲ့ ရဲဝန်ထမ်း အများစုဟာ သောက်စား မူးယစ်နေပြီး ခရီးသွား ပြည်သူတွေ ဆဲဆို ခြိမ်းခြောက် ပြောဆိုတာတွေလည်း ရှိတယ်လို့ ခရီးသွားတွေက ပြောပါတယ်။
“ ခရီးသွားရင် ကိုဗစ် ဆေးထိုးပြီးကြောင်း ထောက်ခံစာ ပါရတယ်။ မှတ်ပုံတင်နဲ့ လိုအပ်တဲ့ ထောက်ခံစာကိုလည်း ယူသွားတာ ကောင်းတယ်။ နေပြည်တော် အဝင်မှာ စစ်တဲ့ကောင်တွေဆို မူးနေတာ များတယ်။ သူတို့က ငတ်နေတာ့ ရသမျှ တောင်းနေကြတာ။ မဖြစ်မနေ သွားရမယ့်ခရီးရှိရင် လိုအပ်တဲ့ စာရွက်စာတန်း ယူသွားကြပါ” လို့ ခရီးသွား ပြည်သူ တစ်ဦးက ပြောပါတယ်။
အမြန်လမ်းမှာ နေ့စဉ် ခရီးသည်တင်ယာဉ်နဲ့ ကိုယ်ပိုင်ကား အစီးရေး ထောင်ကျော် ဖြတ်သန်းသွားလာနေပြီး လက်ရှိ စစ်ကောင်စီတပ်က ကားတိုင်းကို စစ်ဆေးပြီးမှ သွားခွင့်ပြုနေတယ်လို့ သိရပါတယ်။
MK-005