မဲခေါင်၊ ဖေဖော်ဝါရီ ၁၀
မှန်ကန်တဲ့ မျိုးချစ်စိတ်ဓာတ်ကို အခြေခံပြီး အမျိုးသားရေး မျှော်မှန်းချက်နဲ့ နိုင်ငံရေး ရည်မှန်းချက် ပန်းတိုင် ရောက်ရှိရေး အတွက် စည်းလုံးညီညွတ်စွာ ချီတက် တိုက်ပွဲဝင်သွားကြဖို့ ကရင်အမျိုးသား အစည်းအရုံး-KNU ဥက္ကဋ္ဌ ဗိုလ်ချုပ်ကြီး စောမူတူးစေးဖိုး က တိုက်တွန်းလိုက်ပါတယ်။
မနက်ဖြန် ကျရောက်မယ့် (၇၅) နှစ်မြောက် ကရင်အမျိုးသားနေ့သို့ KNU ဥက္ကဋ္ဌ ပြောကြားတဲ့ မိန့်ခွန်းကို ဒီကနေ့ ထုတ်ပြန်ရာမှာ အခုလို တိုက်တွန်းလိုက်တာပါ။
ရုပ်ပိုင်းဆိုင်ရာ လုံခြုံမှု အသိပညာ၊ အတတ်ပညာနဲ့ စီးပွါးရေးဆိုင်ရာ လုံခြုံမှုတွေ ကင်းမဲ့နေတာဟာ လူမျိုးတမျိုး အဖြစ် ဂုဏ်သိက္ခာရှိရှိ ဖွံ့ဖြိုးတိုးတက်လာဖို့ လုံးဝမဖြစ်နိုင်တာကို ပြန်လည် အောက်မေ့ သတိရှိဖို့လည်း လိုအပ်တယ်လို့ သူကဆိုပါတယ်။
ဒါကြောင့် ကရင့် အမျိုးသားနေ့-Karen National Day ကို ဂုဏ်ပြုကျင်းပတဲ့ အချိန်တိုင်း မိမိတို့ ကရင့်အမျိုးသားတွေရဲ့ သမိုင်းကြောင်း၊ ဘဝအတွေ့အကြုံနဲ့ ကရင့်အမျိုးသား ခေါင်းဆောင်ကြီးတွေနဲ့ ကရင့်အမျိုးသားတွေရဲ့ အရင်က ကြိုးပမ်းအားထုတ်မှုတွေကို ပြန်လည် သတိရအောက်မေ့ပြီး ဂုဏ်ပြုကြဖို့ အရေးကြီးတယ်လို့လည်း သူကပြောပါတယ်။
ခေါင်းဆောင်ကြီးတွေရဲ့ ကြိုးပမ်းအားထုတ်မှုတွေကို ပြန်လည် သတိရအောက်မေ့ ဂုဏ်ပြုရုံနဲ့ မပြီးဘဲ သူတို့ ချမှတ်ခဲ့တဲ့ အမျိုးသားရေး ဆိုင်ရာ မျှော်မှန်းချက်နဲ့ နိုင်ငံရေးဆိုင်ရာ ရည်မှန်းချက်တို့ ပြည့်မီရရှိရေးအတွက် ကရင်အမျိုးသားတွေ အားလုံး ကျရာကကဏ္ဍမှာ ပူးပေါင်းပါဝင် လုပ်ဆောင်ကြရမှာ ဖြစ်တယ်လို့ KNU ဥက္ကဌ က ပြောပါတယ်။
မိမိတို့ ကရင့်အမျိုးသားရဲ့ အရေးကို စည်းစည်းလုံးလုံး ညီညီညွတ်ညွတ်နဲ့ ကြိုးပမ်းအားထုတ်ကြရမှာကို အထူးသတိရှိကြပြီး အမျိုးသားရေး သမိုင်းတွေကိုလည်း ကရင်အမျိုးသားရေး တာဝန်ကို ဆက်လက် ပခုံးပြောင်းတာဝန်ယူမယ့် မျိုးဆက်သစ် ကရင်လူငယ်တွေ သိရှိနားလည်နိုင်ရေး အတွက် အားသွန်ခွန်စိုက် ပိုမို ရေးသား ဖေါ်ထုတ်ကြရမှာ ဖြစ်တယ်လို့ သူက ပြောပါတယ်။
ဒါ့အပြင် ကရင်အမျိုးသား ခေါင်းဆောင်ကြီးတွေ ပေးဆပ်ခဲ့ကြတဲ့ သမိုင်း၊ သွေး၊ ချွေး အသက်ဝိဉာဉ်တို့အပြင် အရင်က ကရင့်အမျိုးသား ခေါင်းဆောင်ကြီးတွေနဲ့ ကရင့်အမျိုးသားတွေရဲ့ စည်းလုံးညီညွတ်တဲ့အမြင်နဲ့ စည်းလုံး ညီညွတ်မှု အားနဲ့ ကြိုးပမ်းမှုတွေအတိုင်း ကြိုးပမ်းအားထုတ်ကြဖို့လည်း KNU ဥက္ကဋ္ဌ က တိုက်တွန်းပါတယ်။
လုံခြုံမှုရှိပြီး တည်ငြိမ်အေးချမ်းတဲ့ ကရင်အမျိုးသား တို့ရဲ့ အနာဂတ်ဘ၀ သာယာလှပရေး အတွက် ကရင်အမျိုးသား အချင်းချင်းကြား၊ ကရင်အမျိုးသား အဖွဲ့အစည်း အချင်းချင်းကြား မှန်ကန်တဲ့ မျိုးချစ်စိတ်ဓါတ်ကို အခြေခံပြီး အမျိုးသားရေး မျှော်မှန်းချက်နဲ့ နိုင်ငံရေး ရည်မှန်းချက် ပန်းတိုင်သို့ ရောက်ရှိရေး အတွက် နားလည်မှုရှိရှိ အပြန်အလှန် ဖေးမကူညီမှုတွေနဲ့ စည်းစည်း လုံးလုံး ညီညီညွတ်ညွတ်နဲ့ ချီတက် တိုက်ပွဲဝင်သွားကြဖို့လည်း သူက တိုက်တွန်းထားပါတယ်။
MK-003
#MeKongNews
#KNU #ဗိုလ်ချုပ်ကြီးစောမူတူးစေးဖိုး #ကရင်အမျိုးသားနေ့