မဲခေါင်၊ ဇန်နဝါရီ ၂၄
တော်လှန်ရေး သက်လုံမြှင့်ထားပြီး အဆုံးသတ် တိုက်ပွဲကို ဦးတည်နိုင်မှ ဖက်ဒရယ် ဒီမိုကရေစီ နိုင်ငံတော်သစ်ကို မျှော်လင့်နိုင်မယ်လို့ ယာယီသမ္မတ ဒူဝါလရှီးလ က ဒီကနေ့ ပြောကြားလိုက်ပါတယ်။
ဒီနေ့ မနက် ၁၀ နာရီမှာ ကျင်းပတဲ့ အမျိုးသား ညီညွတ်ရေး အစိုးရရဲ့ ၂၀၂၃ ခုနှစ်အတွင်း (၄) ကြိမ်မြောက် ပြုလုပ်တဲ့ အစိုးရအဖွဲ့ အစည်းအဝေးမှာ သူက ပြောကြားခဲ့တာပါ။
“ တော်လှန်ရေး သက်လုံတွေ မြှင့်ထားရမယ်၊ အဆုံးသတ် တိုက်ပွဲကို ဦးတည်နိုင်မှ ဖက်ဒရယ်ဒီမိုကရေစီ နိုင်ငံတော်သစ်ကို မျှော်လင့်နိုင်မယ်” လို့ ယာယီသမ္မတက ထည့်သွင်းပြောကြားပါတယ်။
လက်ရှိကာလမှာ စစ်အာဏာရှင်ကို အမြစ်ပြတ် ချေမှုန်းဖို့အတွက် လက်နက်ကိုင်လမ်းစဉ်ကို ဗဟိုပြုကြရတော့မယ် ဆိုတာကို အတွေ့အကြုံအားဖြင့် လက်တွေ့ သိရှိလာကြပြီ ဖြစ်တယ်လို့ သူကဆိုပါတယ်။
“ယခင်တုန်းက လက်နက်ကိုင်ခုခံ တော်လှန်မှုကို ငြင်းချက်ထုတ်ခဲ့တဲ့ နိုင်ငံရေး ခေါင်းဆောင်တွေ အများအပြား ရှိခဲ့တယ်။ ယခု လက်ရှိကာလမှာတော့ စစ်အာဏာရှင်ကို အမြစ်ပြတ် ချေမှုန်းဖို့အတွက် လက်နက်ကိုင် လမ်းစဉ်ကို ဗဟိုပြုထားကြရတော့မယ်ဆိုတာကို အတွေ့အကြုံအားဖြင့် လက်တွေ့ သိလာကြပါပြီ။ တကယ်တော့ ကျွန်တော်တို့ဟာ နိုင်ငံရေး ပြဿနာကို စားပွဲဝိုင်းမှာပဲ ဖြေရှင်းချင်ကြတဲ့သူတွေ ချည်းပါပဲ။ ဒါပေမယ့် လူထုက လက်နက်ကိုင်ပြီး ခုခံမှကို ရတော့မယ့် အခြေအနေကို မြန်မာစစ်ခေါင်းဆောင်တွေက တွန်းပို့ ခဲ့ပါတယ်။ ဒီတော့ စပြီးတဲ့ ဇာတ်ကို ဆုံးအောင် ကကြရမယ်လို့ ပြတ်ပြတ်သားသား ပြောချင်ပါတယ်” လို့ ယာယီသမ္မတက ပြောသည်။
ဒါ့အပြင် ခုခံတော်လှန်စစ်ကို ဒီထက် အောင်မြင်အောင် ကြိုးပမ်းရမှာ ဖြစ်ပြီး အဆုံးသတ် အဖြစ်နဲ့ အပြုတ်တိုက် ရမယ့် တိုက်ပွဲအတွက်လည်း အစစအရာရာ စနစ်တကျ ပြင်ဆင်ထားရမယ်လို့ သူက ထပ်မံပြောကြားပါတယ်။
တော်လှန်ရေးကာလ အတွင်း မိမိတို့ တစ်ဦးချင်းစီအလိုက် ကိုယ့်ရဲ့ ခေါင်းဆောင်မှု ကိစ္စတွေကို ပြန်လည် သုံးသပ်တာ မျိုးတွေ လုပ်ရမှာ ဖြစ်သလို၊ ဝန်ကြီးဌာနအလိုက် ကိုယ့်ရဲ့ အခန်းကဏ္ဍနဲ့ တာဝန်တွေကို ဘယ်လောက်ထိ ပီပီပြင်ပြင် ကျကျနန လုပ်ဆောင်နိုင်ခဲ့ကြသလဲ ဆိုတာကို သုံးသပ်ကြရမှာ ဖြစ်တယ်လို့လည်း သူက ဆိုပါတယ်။
“ ဒါ့အပြင် နွေဦးတော်လှန်ရေး (၃) နှစ်ပြည့်မယ့်အချိန်ရောက်ရင် ကျွန်တော်တို့ဟာ ပြည်သူလူထုအတွက် ဘယ်လို ပန်းတိုင်မျိုးတွေကို အရောက် ဦးဆောင်ကြမှာလဲ ဆိုတာတွေကို ကြိုတင် စဉ်းစားထားကြဖို့ လိုပါတယ် “ လို့ ယာယီသမ္မတ က ထပ်မံပြောပါတယ်။
မကြာမီ ပင်လုံစာချုပ်ချုပ်ဆိုခြင်း (၇၆) နှစ်မြောက် အချိန်ကိုလည်း ရောက်လာတော့မှာဖြစ်ပြီး ပင်လုံစာချုပ် ဆိုတာ ပေါင်းစည်းတာ စုစည်းတာ ညီညွတ်တာ ဆိုတဲ့ အနှစ်သာရတွေကို ပြသနေကာ မိမိတို့အားလုံးဟာ အတူတကွ ပေါင်းစည်းခဲ့ကြတယ်ဆိုတာကို သက်သေပြနေတယ်လို့လည်း သူကပြောပါတယ်။
“ အခုလည်း နွေဦးတော်လှန်ရေးမှာ ကျွန်တော်တို့ဟာ ခိုင်မာကျစ်လစ်တဲ့ နိုင်ငံရေး ပဋိညာဉ်တစ်ခုရအောင် ဆွေးနွေး ညှိနှိုင်းမှုတွေ မပြတ် ရှိနေတာကို တွေ့ရပါတယ်။ ခုခံတော်လှန်စစ်မှာ ခိုင်မာသော မဟာမိတ် ဆက်ဆံရေးကိုလည်း စနစ်တကျ တည်ဆောက်နေကြပါတယ်။ ဖက်ဒရယ်ဒီမိုကရေစီ နိုင်ငံတော်သစ်အတွက် ကျွန်တော်တို့ အားလုံးမှာ ဘုံသဘောတူညီချက်တွေ ဘုံရည်မှန်းချက်တွေ လိုအပ်ပါတယ် ” လို့ သူကဆိုပါတယ်။
နိုင်ငံတစ်ခု ပြန်လည်ထူထောင်ရေး ကိစ္စဟာ အင်မတန် နက်နဲသလို အင်မတန် ရှုပ်ထွေးပြီး တိုင်းပြည် ထူထောင်ရေး ကိစ္စဟာ အနုပညာတစ်ရပ်လို နှလုံးသားနဲ့ ရင်းပြီး လုပ်ကိုင်ရတဲ့ ကိစ္စလည်းဖြစ်တယ်လို့ ဆိုပါတယ်။
“ ကျွန်တော်တို့ဟာ နောင်လာမယ့် မျိုးဆက်တွေအတွက် နှလုံးသားကြီးကြီး ရှိထားရပါလိမ့်မယ်။ ဒါ့အပြင် နောင် နှစ်ပေါင်း လေးငါးခြောက်ဆယ်လောက်အထိ ကြိုတင် မြော်မြင်ထားကြဖို့လည်း လိုပါတယ်။ ပဋိပက္ခဟာ ယာယီ သဘော ဖြစ်ပါတယ်။ ပဋိပက္ခအလွန် ကာလတွေမှာ ကျွန်တော်တို့ လူ့အဖွဲ့အစည်းကို ဘယ်လို ပုံစံမျိုး မြင်ချင်သလဲဆိုတာကို အခုကတည်းက ရှင်းရှင်းလင်းလင်း ပြတ်ပြတ်သားသား မြင်ထားကြရပါလိမ့်မယ်။ ဒါဟာ သိပ်အရေးကြီးတယ်လို့ ယူဆပါတယ်။” လို့ ယာယီသမ္မတက ပြောကြားခဲ့ပါတယ်။
MK-003
