မဲခေါင်၊ စက်တင်ဘာ ၁
ရှမ်းပြည်နယ် တောင်ပိုင်း ညောင်ရွှေမြို့နယ်၊ အင်းလေးဒေသ၊ သပြေပင်သစ် အမှတ် (၃) ကျေးရွာမှာ စစ်ကောင်စီက ဖမ်းဆီးသွားတဲ့ မိသားစု ၄ ဦးအနက် သားနဲ့သမီးဖြစ်သူတို့ မနေ့ ဩဂုတ်လ ၃၁ ရက်မှာ ပြန်လွတ်လာတယ်လို့ စုံစမ်း သိရှိရပါတယ်။
စစ်ကောင်စီတပ်နဲ့ ရဲတပ်ဖွဲ့တွေက မိသားစုလိုက် ဖမ်းဆီးသွားပြီးနောက် သားနဲ့သမီးဖြစ်သူကို ညောင်ရွှေ ရဲစခန်းက ပြန်လွှတ်ပေးခဲ့ ပေမယ့် မိဘဖြစ်သူ ၂ ဦးကို ဘယ်နေရာမှာ ဖမ်းဆီးထားတယ် ဆိုတာ မသိရသေးဘူးလို့ သတင်းရင်းမြစ်က ပြောပါတယ်။
“ကလေးတွေတော့ မနေ့က လွတ်လာပြီ။ ညောင်ရွှေ ရဲစခန်းမှာ ဖမ်းထားတုန်းက ကလေးတွေ ရေဆာလည်း မပေးသောက်ဘူး။ အပေါ့အပါး သွားတာတောင် ခွင့်မပြုဘူး။ ကလေးတွေကိုလည်း ရဲတွေက ရိုင်းရိုင်းစိုင်းစိုင်း ဆဲတယ်။ ကလေးတွေက ပြန်လွတ်လာပေမယ့် အခုထိ ကြောက်နေတုန်းပဲ။ မိဘတွေကိုတော့ အခုထိ ဘယ်မှာဖမ်းထားလဲ မသိရသေဘူး” လို့ ဒေသခံ သတင်းရင်းမြစ် တစ်ဦးက ပြောပါတယ်။
ပြီးခဲ့တဲ့ ဩဂုတ်လ ၂၈ ရက်ညက သပြေပင်ကျေးရွာနေ ကိုအောင်မျိုးဝင်း နဲ့ မမြအေး တို့မိသားစုကို စစ်ကောင်စီ စက်လှေ ၂ စီး၊ အင်အား ၁၀ ဦးကျော်နဲ့ လာရောက် ဖမ်းဆီးသွားတာ ဖြစ်ပါတယ်။
အဲဒီလို ဖမ်းဆီးသွားပြီးနောက် မနေ့မှာက အသက် ၁၈ နှစ်အရွယ် သမီးဖြစ်သူနဲ့ အသက် ၁၅ နှစ်အရွယ် သားဖြစ်သူတိုကို ပြန်လွှတ်ပေးတာ ဖြစ်ပါတယ်။
အဲ့ဒီမိသားစုကို လာရောက် ဖမ်းဆီးရာမှာ အင်းလေး ပျူစောထီးတွေ ပါဝင်တယ်လို့သိရပြီး စစ်ကောင်စီ အခုလို ဖမ်းဆီးတာဟာ ပျူစောထီးတွေက လမ်းပြတဲ့အတွက်ကြောင့် ဖြစ်တယ်လို့လည်း သိရပါတယ်။
“လာဖမ်းတဲ့အချိန်မှာကိုက အရပ်ဝတ်နဲ့ လက်နက်ကိုင်လာတဲ့ အင်းပျူစောထီးတွေပါတယ်။ မဖမ်းခင် နေ့ခင်း အချိန်မှာ ရွာခံ ပျူစောထီး အဖွဲ့ဝင် တစ်ယောက်က အရင် လာစုံစမ်းသေးတယ်” လို့ သတင်းရင်းမြစ် တစ်ဦးက ပြောပါတယ်။
အာဏာသိမ်းပြီးနောက်ပိုင်း စစ်ကောင်စီတပ်၊ အင်းလေး ပျူစောထီးနဲ့ PNO ပြည်သူ့စစ်တွေဟာ အင်းလေးဒေသမှာ ပြည်သူလူထုကို မတရား အနိုင်ကျင့်နေတာ တစ်နေ့ထက်တစ်နေ့ ပိုမို ဆိုးရွားလာတယ်လို့ JMC- Innlay မှ ဒါရိုက်တာ မယုလှိုင်သင်းက ပြောဆိုထားပါတယ်။
CJ-002
