မဲခေါင်၊ ဇန်နဝါရီ ၂၇
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသက ကျေးရွာ တစ်ရွာမှာ ဇန်နဝါရီလ ၂၄ ရက်၊ ညပိုင်းက အင်းလေးပျူစောထီး အဖွဲ့ဝင်က သေနတ်နဲ့ပစ်ခတ်လို့ ကလေးမိခင် တစ်ဦး သေဆုံးခဲ့တယ်လို့ ဒေသခံတွေထံက သိရပါတယ်။
အဲဒီကျေးရွာမှာ ဇန်နဝါရီလ ၂၄ ရက်၊ ညပိုင်းက ငါးဖမ်းနေတဲ့ ရွာသားတွေကို ငွေညှစ်ခြိမ်းခြောက်ဖို့ ပျူစောထီး တစ်ဦးက သေနတ်ပစ်ရာက အနီးပတ်ဝန်းကျင်က နေအိမ်ရှိ ကလေးမိခင်ကို ထိမှန် သေဆုံးခဲ့တာ ဖြစ်တယ်လို့ ဆိုပါတယ်။
“ ညကြီး ငါးဖမ်းတဲ့ သူတွေကို ငွေညှစ်ချင်တာနဲ့ လက်နက်အားကိုးပြီး ခြိမ်းခြောက်ရာကနေ တကယ် ပစ်ခတ်လိုက်တာ။ ပစ်တာက ငါးဖမ်းတဲ့ ရွာခံတွေကို။ ဒါပေမယ့် အဲဒီ အနီးနားမှာ နေထိုင်တဲ့ အိမ်က အစ်မ တစ်ယောက်ကို သွားမှန်တယ်။ ပွဲချင်းပြီး ဆုံးသွားတယ်” လို့ ဒေသခံတစ်ဦးက ပြောပါတယ်။
အင်းလေးပျူစောထီးဟာ စက်လှေပေါ်ကနေ သေနတ်နဲ့ ပစ်ခတ်ခဲ့တာဖြစ်ပြီး စက်လှေပေါ်မှာ စစ်ကောင်စီတပ်သားတွေနဲ့ PNO တပ်သားတွေ ပါရှိတယ်လို့ သိရပါတယ်။
သေနတ် ပစ်ခတ်တဲ့ ပျူစောထီးဟာ အဲဒီ ကျေးရွာ ဒေသခံဖြစ်ပြီး ပျူစောထီး သင်တန်း ဆင်းထားတာ ၁၀ ရက်ခန့်သာ ရှိသေးကာ အခု ဖြစ်စဉ် သတင်းမပေါက်ကြားဖို့ ဒေသခံတွေကို ဖိအားပေး ခြိမ်းခြောက်ထားတယ်လို့လည်း သိရပါတယ်။
ပြီးခဲ့တဲ့ ဇန်နဝါရီလ ၃ ရက်က အင်းလေးဒေသ၊ သန်းထောင်နဲ့ ဘုရားနီကျေးရွာ အနီးမှာ PDF ပူးပေါင်း တပ်ဖွဲ့တွေနဲ့ စစ်ကောင်စီ ပူးပေါင်းတပ်ဖွဲ့တို့ တိုက်ပွဲ ဖြစ်ပွားပြီးနောက် စစ်ကောင်စီတပ်၊ အင်းလေး ပျူစောထီးနဲ့ PNO ပူးပေါင်းအဖွဲ့က ဒေသခံတွေကို နည်းအမျိုးမျိုးနဲ့ ဖိနှိပ်ခြိမ်းခြောက် နေတယ်လို့ သိရပါတယ်။
MK-008