စစ်ကောင်စီတပ်ဟာ ဒေသခံ ပြည်သူ့စစ် အကူအညီနဲ့ ညောင်ရွှေမြို့နယ်၊ အင်းတိန်ရွာနေ ညောင်အုပ်ကျောင်း ဆရာတော်နဲ့ ကျောင်းဝေယျာဝစ္စ လုပ်ကိုင်သူ ၂ ဦး အပါအဝင် စစ်ဘေးရှောင် အမျိုးသမီးတစ်ဦးတို့ကို ကနဦး ဖမ်းဆီးခဲ့တယ်လို့ ဒေသခံတွေက ပြောပါတယ်။
အဲဒီနောက် PDF တွေ ရောက်နေတယ်ဆိုပြီး ဒီဇင်ဘာ ၃၀ ရက်နေ့မှာ တောင်ပို့ကြီးကျေးရွာ နာရေးအိမ်မှာ ရွာသား ၂၇ ဦး၊ GIVE community Development Center မှ ဆရာမ တစ်ဦးနဲ့ ပရဟိတ လူငယ် အမျိုးသမီး ၃ ဦး တို့ကို ဖမ်းဆီးသွားခဲ့တယ်လို့ သိရပါတယ်။
ဒါ့အပြင် ခေါင်တိုင်ကျေးရွာမှ အမျိုးသမီး ၂ ဦးကိုလည်း ဖမ်းဆီးသွားပြီး ကရင်နီ တော်လှန်ရေး အင်အားစု ခေါင်းဆောင်အချို့ နောင်ပိုကျေးရွာမှာ စစ်ကောင်စီတပ်တွေ စစ်ဆေးနေစဉ် ဖမ်းဆီးခံရကာ လက်ရှိ တောင်ကြီး စစ်ကြောရေးမှာ စစ်ဆေးခံနေရတယ်လို့ ဒေသတွင်း သတင်းရင်းမြစ်က မဲခေါင်ကို ပြောပါတယ်။
မနေ့က ဇန်နဝါရီလ ၂ ရက်နေ့မှာတော့ တုံးလည်ရွာမှ အမျိုးသားတစ်ဦးနဲ့ အမျိုးသမီးတစ်ဦးကို နာမည် အတိအကျနဲ့ လာရောက်ဖမ်းဆီးသွားတယ်လို့ မိသားစုနဲ့ နီးစပ်သူတစ်ဦးက ပြောပါတယ်။
လက်ရှိ စစ်ကောင်စီနဲ့ ပြည်သူ့စစ်အဖွဲ့ အင်းလေးဒေသမှာ စစ်ဆေးဖမ်းဆီးနေတာ တစ်ပတ်ရှိပြီဖြစ်ပြီး အနည်းဆုံး လူ ၄၀ ဖမ်းဆီးခံထားရတယ်လို့ ဒေသခံတွေက ဆိုပါတယ်။
ဖမ်းဆီးခံရသူတွေကို တောင်ကြီး စစ်ကြောရေးနဲ့ ညောင်ရွှေ ရဲစခန်းအချုပ်တွေမှာ စစ်ဆေးနေပြီး တောင်ပို့ကြီးရွာမှ ဖမ်းဆီးခံရတဲ့ ရွာသား ၂၇ ဦးကိုတော့ တစ်ဦး ၃ သိန်း ပေးပါက ပြန်လွှတ်ပေးမယ်လို့ ရဲက မိသားစုတွေကို လာရောက်ညှိနှိုင်းမှုတွေ ရှိခဲ့တယ်လို့ သိရပါတယ်။
