ညောင်ရွှေမြို့နယ်၊ အင်းလေးဒေသက ကျားတွန်ရွာကို စစ်ကောင်စီတပ်က PNO နဲ့ပူးပေါင်းပြီး ဝင်ဖို့ ကြိုးစားရာမှာ မအောင်မြင်တာကြောင့် ဒီဇင်ဘာ ၂၇ ရက်က အင်းတိန်ရွာ၊ ညောင်အုတ် ဆရာတော်နဲ့အတူ ကိုသန့်ဇင်၊ ကိုတိုးရစ်အောင်နဲ့ အမျိုးသမီးတစ်ဦး တို့ကို PDF တွေနဲ့ ဆက်စပ်နေတယ် ဆိုပြီး ဖမ်းဆီးသွားပါတယ်။
အဲဒီနောက် ဒီဇင်ဘာလ ၃၀ ရက်မှာတော့ အင်းတိန်ရွာနဲ့ အနီးပတ်ဝန်းကျင် ကျေးရွာတွေက ဘွဲ့ယူသွားဖို့ ပြင်ဆင်နေတဲ့ လူငယ် ၂ ဦး အပါအဝင် လူငယ် ၂၃ ဦးကို လာရောက် ဖမ်းဆီးသွားတယ်လို့ ဆိုပါတယ်။
PDF နဲ့ ဆက်စပ်တယ်ဆိုပြီး ဖမ်းသွားတာပေါ့။ ဘွဲ့ယူဖို့ တောင်ကြီးတက်မလို့ လုပ်နေတဲ့ ကောင်လေး ၂ ယောက်လည်း ပါသွားတယ်။ ညောင်ရွှေ ရဲစခန်းမှာ ချုပ်ထားတယ်လို့ သတင်းရတယ်။ အခုထိတော့ အဆက်အသွယ် မရသေးဘူး
လို့ သတင်းရင်းမြစ်က ပြောပါတယ်။
ဒီဇင်ဘာ ၂၈ ရက် မနက်ကနေ လက်ရှိအချိန်ထိ ညောင်ရွှေမြို့နယ်၊ အင်းလေးဒေသမှာ စစ်ကောင်စီတပ်တွေ၊ ရဲတွေ၊ ပျူစောထီးတွေနဲ့ PNO တွေက နေရာအနှံ့ လုံခြုံရေး တင်းကျပ်ထားပြီး စစ်ဘေးရှောင်စခန်းတွေကို သွားရောက်ကာ ဖုန်းစစ်ဆေးတာ၊ လမ်းသွားလမ်းလာတွေကို စစ်ဆေးတာ၊ သေနတ်ပစ်ခတ် ခြိမ်းခြောက်တာတွေ ပြုလုပ်နေတယ်လို့ ဒေသခံတွေထံကနေ သိရပါတယ်။