မဲခေါင်၊ ဇန်နဝါရီ ၂၆
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသမှာ ဖြစ်ပွားခဲ့တဲ့ တိုက်ပွဲ အတွင်း ကျဆုံးသွားတဲ့ အင်းလေး PDF ရဲဘော် ၄ ဦးရဲ့ ဈာပနာ အခမ်းအနား ပြုလုပ်ခဲ့တယ်လို့ အင်းလေးPDF –(1009 -တပ်ရင်း) က ဇန်နဝါရီလ ၂၄ ရက်မှာ ထုတ်ပြန်အသိပေးထားပါတယ်။
အင်းလေးဒေသ၊ သန်းထောင်နဲ့ ဘုရားနီကျေးရွာ အနီးမှာ USSFU တပ်ပေါင်းစုနဲ့ စစ်ကောင်စီ၊ အင်းပျူစောထီး၊ PNO ပူးပေါင်းအဖွဲ့တို့ ဇန်နဝါရီလ ၃ ရက်က တိုက်ပွဲတွေ ဖြစ်ပွားခဲ့တယ်လို့ သိရပါတယ်။
အဲဒီတိုက်ပွဲအတွင်း ရှမ်းတောင်1009-တပ်ရင်းက တပ်ရင်းမှူး သခွားသီး၊ သင်တန်းမှူး အယ်ကျော်၊ တပ်စိတ်မှူး မြတ်သူတို့ ကျဆုံးခဲ့ပြီး ဇန်နဝါရီလ ၄ ရက်မှာ 1009-တပ်ရင်းမှ ရဲဘော်ကတုံးကို အင်းပျူစောထီးတွေက ဖမ်းဆီးပြီး ရက်စက်စွာ သတ်ဖြတ်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
တိုက်ပွဲမှာ စစ်ကောင်စီ ပူးပေါင်းအဖွဲ့ဘက်က ၃၀ ကျော်သေဆုံးပြီး ၂၀ ကျော်ထိခိုက်ဒဏ်ရာ ရရှိကာ လူအင်အား လက်နက်အင်အား မမျှတာကြောင့် စစ်ကူအဖြစ် လိုက်ပါလာတဲ့ တပ်ရင်း- ၁၀၀၇ (မိုးဗြဲ ပြည်သူ့ကာကွယ်ရေး တပ်-၂ ) က ရဲဘော်မိုးလည်း ကျဆုံးခဲ့ရတယ်လို့ သိရပါတယ်။
PNO နဲ့ အင်းပျူစောထီးတွေက ညောင်ရွှေ-အင်းလေးဒေသရှိ လမ်းတွေပိတ်ပြီး အစစ်အဆေးတွေ ပြုလုပ်ကာ ဒေသခံတွေ အပေါ် အကြမ်းဖက် ဖမ်းဆီးနှိပ်စက် နေတာတွေကို ချက်ချင်းရပ်တန့်ဖို့ ပြင်းပြင်းထန်ထန် သတိပေးလိုက်တယ်လို့ ညီညွတ်သော ရှမ်းတောင် ဖက်ဒရယ်တပ်ပေါင်းစု-USSFU က အသိပေးထားပါတယ်။
PNO နဲ့ အင်းပျူစောထီးတွေ အနေနဲ့ စစ်ကောင်စီ အလိုကျ ပြည်သူလူထုရဲ့ လွတ်လပ်စွာ သွားလာခွင့်နဲ့ အသက်အန္တရာယ် ခြိမ်းခြောက်မှုတွေ ဆက်လက် လုပ်ဆောင်မယ်ဆိုရင် စစ်ကောင်စီနဲ့ တန်းတူထားပြီး ပြင်းထန်တဲ့ တိုက်ခိုက်မှုတွေ လုပ်ဆောင်မှာ ဖြစ်တယ်လို့လည်း USSFU က သတိပေးထားပါတယ်။
MK-008
#MeKongNews #IPDF #အင်းလေး #USSFU #PNO #ShanState #ရှမ်းတောင်
