မဲခေါင်၊ ဇန်နဝါရီ ၁၆
ရန်ကုန်တိုင်း၊ ကမာရွတ်မြို့နယ်၊ အင်းယားကန်ဘောင်ပေါ်မှာ ဒီနေ့ မနက်က ဗုံးတပ်ထားတဲ့ ဒရုန်း တစ်စင်း ပျက်ကျနေတဲ့ အတွက် စစ်ကောင်စီက ဖောက်ခွဲခဲ့တယ်လို့ ဒေသခံတွေက ပြောပါတယ်။
ပြည်လမ်း၊ တံတားဖြူ မှတ်တိုင်အနီး အင်းယားကန်ဘောင်မှာ လက်လုပ် ဒရုန်းယာဉ် တစ်စီးကို ဒီနေ့ မနက် ၁၀ နာရီ ၄၅ မိနစ် ဝန်းကျင်က ရှာဖွေ တွေ့ရှိခဲ့ပြီးနောက် စစ်တပ်က ဖောက်ခွဲခဲ့တယ်လို့ မျက်မြင်တွေ့သူ တစ်ဦးက ပြောပါတယ်။
“ ကန်ဘောင်ပေါ်မှာ အတားအဆီးတွေ လုပ်ပြီး ခွဲလိုက်တယ်။ ပြည်လမ်း မာလာဆောင်ရှေ့မှာ ကင်းလှည့်ကားတွေ ရပ်ပြီး စောင့်နေတာ ရှိတယ်။ အင်းလျားလမ်းထောင့်မှာ စစ်ကား ၃ စီးနဲ့ စစ်ကား Faw ကား အကြီး တစ်စီး ရပ်ထားတာ တွေ့တယ်။ ကျန်တာတော့ ပုံမှန်အတိုင်း ပတ်နေတာတွေ ရှိတယ်” လို့ သူကပြောပါတယ်။
အလားတူ မြောက်ဥက္ကလာပ (၂) ရပ်ကွက်၊ အုပ်ပုံဆိပ်၊ (၄၃၅) စစ်တပ်အနီးမှာ ပျက်ကျနေတဲ့ ဒရုန်း တစ်စီး ရှာတွေ့ခဲ့ပြီး စစ်တပ်က မူလတန်းကျောင်း အနီးမှာ ဖောက်ခွဲခဲ့လို့ စာသင်နေတဲ့ ကလေးတွေ ထိတ်လန့်ခဲ့ရတယ်လို့ ရပ်ကွက်နေ ပြည်သူတွေက ပြောပါတယ်။
“ ဗုံးခွဲချင်တာ သူတို့တပ်ထဲ ဝင်ခွဲတာ မဟုတ်ဘူး။ ကလေးတွေ စာသင်ကျောင်းနား လာခွဲတယ်။ သူတို့က လူတွေကို ကြောက်အောင် ရပ်ကွက်ထဲထိ သယ်လာပြီး ခွဲသွားတာ။ တစ်ချို့ ကလေးမိဘတွေ ကတော့ ကလေးတွေကို ကျောင်းနောက်ပေါက်ကနေ ပြန်ခေါ်သွားကြတယ်။ ဖောက်ခွဲလိုက်တုန်းက မီးခိုးတွေ တက်လာတော့ လန့်ကြတာပေါ့” လို့ မျက်မြင်တွေ့သူ တစ်ဦးက ပြောပါတယ်။
စစ်တပ်က တွေ့ရှိခဲ့တယ် ဆိုတဲ့ ဗုံးတပ် ဒရုန်း ၂ စင်းဟာ ပုံစံတူ ဖြစ်ပြီး ဘယ်အဖွဲ့ရဲ့ ဒရုန်း ဆိုတာကိုတော့ ထုတ်ပြန်ထားတာ မတွေ့ရသေးပါဘူး။
အခုလို စစ်တပ်က ဗုံးတွေ့လို့ ဆိုပြီး ဖောက်ခွဲမှုတွေ ပြုလုပ်နေပေမယ့် ရန်ကုန်မြို့က ရပ်ကွက်တွေအတွင်း မဲစာရင်း ကောက်ယူမှုတွေကိုတော့ ပုံစံမျိုးစုံနဲ့ လုပ်ဆောင် နေတယ်လို့ ဒေသခံတွေက ပြောပါတယ်။
MK-005