မဲခေါင်၊ ဇန်နဝါရီ ၁၅
ရန်ကုန်တိုင်း၊ သာကေတမြို့နယ်အရက်ဆိုင်ကွေ့မှာ ရာအိမ်မှူးထွန်းဝင်းဆိုသူ ဒီနေ့မနက်ပိုင်းမှာ သေနတ်နဲ့အပစ်ခံရပြီးသေဆုံးသွာတယ်လို့ ရပ်ကွက်နေပြည်သူတွေက ပြောပါတယ်။
ဒီနေ့ဇန်နဝါရီ ၁၅ရက် မနက်၆နာရီဝန်းကျင်က ရာအိမ်မှူးထွန်းဝင်းကို သေနတ်နဲ့ပစ်သွားတာဖြစ်ပြီး အပစ်ခံရတဲ့နေရာမှာပဲ သေဆုံးသွားတာကြောင့် အလောင်းကို ဆေးရုံကားနဲ့တင်ပြီးခေါ်သွားတယ်လို့ မျက်မြင်တစ်ဦးကပြောပါတယ်။
“ တစ်ချက်ထဲနဲ့ အပြီးလုပ်သွားတာ။ သေနတ်နဲ့တစ်ချက်ပစ် တစ်ခါထဲသေသွားတာ။ အလောင်းကိုတော့ ဆေးရုံကားနဲ့တင်သွားတယ်။ သေပြီးစစ်တပ်ကကောင်တွေရောက်လာပြီး စောင့်နေတာတွေရှိတယ်။ မနက်၉နာရီကျော်လောက်အထိ ရှိသေးတယ်။ ၇စျေးအကျော်နားမှာဖြစ်တာ” လို့ သူကပြောပါတယ်။
ပစ်ခတ်မှုဖြစ်ပွားပြီးနောက် စစ်ကောင်စီတပ်တွေ သာကေတဗေလုဝကွေ့နားမှာ ဆိုင်ကယ်တွေကို မြေနီလမ်းမထဲအထိ လိုက်လံဖမ်းဆီးတာတွေ မနက်၇နာရီကျော်အချိန်ထဲက လုပ်ဆောင်နေတယ်လို့ ဒေသခံတစ်ဦးက ပြောပါတယ်။
ရာအိမ်မှူးထွန်းဝင်းကို ဘယ်သူလာရောက်ပစ်ခတ်သွားတယ်ဆိုတာတော့ သတင်းထုတ်ပြန်ထားခြင်းမရှိသေးသလို စစ်ကောင်စီကလည်း လူသတ်မှုဖြစ်ပွားခဲ့တဲ့ ၇ စျေးအနီးမှာ စစ်ကား ၂စီးနဲ့ လှည့်ကင်းတွေပတ်နေတယ်လို့ ဒေသခံတွေက ပြောပါတယ်။
MK-005
#MeKongNews
