မဲခေါင်၊ ဇန်နဝါရီ ၂၁
ရန်ကုန်တိုင်း၊ သာကေတမြို့နယ်၊ (၉)ရပ်ကွက်အတွင်းကလက်ဖက်ရည်ဆိုင်မှာ ဘောလုံးပွဲလာကြည့်တဲ့ ရဲလင်းအောင်(ခ)ဝက်ကြီး ကိုသေနတ်နဲ့လာပစ်လို့ သေဆုံးသွားတယ်လို့ သိရပါတယ်။
ဒီနေ့ည ဇန်နဝါရီ ၂၁ရက် လီပါပူးနဲ့ချယ်လ်ဆီးပွဲကို ရတနာပုံလမ်းထောင့်နဲ့နဝရတ်လမ်းထောင့်မှာ ဖွင့်ထားတဲ့ကောင်ကောင်းလက်ဖက်ရည်ဆိုင်မှာ ဘောလုံးပွဲကြည့်နေတဲ့ ရဲလင်းအောင်ကိုအမည်မသိ အမျိုးသား ၂ယောက်က လာရောက်ပစ်ခတ်ခဲ့တာဖြစ်တယ်လို့ မျက်မြင်တွေ့သူတစ်ဦးက ပြောပါတယ်။
“ ပထမပိုင်းပွဲပြီးခါနီးလောက်မှာဖြစ်သွားတာ။ လက်ဖက်ရည်ဆိုင်အပြင်နားလေးမှာ ထိုင်နေတာ။ လူ ၂ယောက်ဆိုင်ကယ်နဲ့ ရောက်ပြီးပစ်သွားတာပါ။ ၂ချက်ထဲပစ်ပြီးတော့ထွက်သွားတာ။ ခေါင်းကိုထိပြီး နေရာမှာပဲသေသွားတယ်။ ဒီကောင်ကဘာလဲဆိုတာတော့ မသိဘူး။ မီးပြတ်လို့လက်ဖက်ရည်ဆိုင်မှာ လာကြည့်တုန်း မြင်လိုက်ရတာ” လို့မျက်မြင်တွေ့သူတစ်ဦးက ပြောပါတယ်။
သေနတ်နဲ့ပစ်ခတ်မှု ဖြစ်ပွားပြီးနောက် လက်ဖက်ရည်ဆိုင်ဖွင့်ထားတဲ့ ၂လမ်းအတွင်း စစ်ကောင်စီတပ်တွေရောက်လာပြီး စစ်ဆေးမှုတွေလုပ်နေတယ်လို့ ဒေသခံတွေကပြောပါတယ်။
သေဆုံးခဲ့သူ အသက်၂၁အရွယ်ရဲလင်းအောင်(ခ)ဝက်ကြီးကို ရပ်ကွက်ထဲမှာ ဝက်ကြီးလို့ခေါ်ဆိုကြပြီး စျေးရောင်းနေသူတစ်ဦးဖြစ်ကာ စစ်တပ်က ၉ရပ်ကွက်အတွင်းရှိ(၂)လမ်း၊ (၄)လမ်းနဲ့ (၅)လမ်းတို့မှာ စစ်ဆေးမှုတွေလုပ်နေတယ်လို့ သိရပါတယ်။
Photo-ပုံဟောင်း
MK-005