မဲခေါင်၊ ဇန်နဝါရီ ၁၈
စစ်ကိုင်းတိုင်း၊ ကျွန်းလှမြို့နယ်၊ သဖန်းဆိပ်ဆည် အရှေ့ခြမ်းမှာ စစ်တပ်နဲ့ ပျူစောထီးတွေက ပြည်သူပိုင်ပစ္စည်း တွေနဲ့ နွားအကောင်ရေ ၆၀ ကျော်ကို အဓမ္မ လုယူသွားတယ်လို့ Infinity group က မနေ့က ထုတ်ပြန်ပါတယ်။
ကန့်ဘလူမြို့နယ် မြောက်ခြမ်းမှာ ဇန်နဝါရီလ ၆ ရက်မှ စတင်ကာ စစ်ကြောင်းထိုးနေတဲ့ စစ်ကောင်စီရဲ့ ခမရ (၃၆၈) နဲ့ ပျူစောထီး ပူးပေါင်း စစ်ကြောင်းဟာ ကျွန်းလှမြို့နယ် သဖန်းဆိပ်ဆည် အရှေ့ခြမ်းရှိ တောထဲ တဲတိုက်တွေမှ ဒေသခံ ပြည်သူတွေ ပိုင်ဆိုင်တဲ့ ပစ္စည်းတွေကို အဓမ္မ ယူဆောင်သွားတာလို့ သိရပါတယ်။
အဲဒီအထဲမှာ နွားအကောင်ရေ ၆၀ ကျော်၊ ဆိုင်ကယ် ၁၅ စီးနဲ့ အိမ်သုံးပစ္စည်းမျိုးစုံတို့ ပါဝင်ကာ လက်ရှိ စစ်ကောင်စီတပ် အထိုင်ချထားတဲ့ လယ်လှကျေးရွာထဲကို သယ်ဆောင်သွားပြီး နွားပိုင်ရှင်တွေကို ပိုက်ဆံနဲ့ပြန်ရွေးခိုင်းမယ်လို့ ပြောဆိုကြောင်း ဒေသခံတွေထံမှ သိရပါတယ်။
ပြီးခဲ့တဲ့ ၂၀၂၂ ခုနှစ် အောက်တိုဘာလ အတွင်းကလည်း စစ်ကောင်စီနဲ့ ပျူစောထီး ပူးပေါင်းအဖွဲ့ စစ်ကြောင်းထိုး ဝင်ရောက်ခဲ့တဲ့ ကန့်ဘလူမြို့နယ် တောင်ခြမ်း ရှမ်းတပ်ကျေးရွာမှ နွားအကောင်ရေ ၇၀ ကျော်ကို အဓမ္မ လုယူသွားကာ ဝေစုခွဲယူခဲ့ကြတယ်လို့လည်း Infinity group က ဖော်ပြပါတယ်။
MK-003