မဲခေါင်၊ ဖေဖော်ဝါရီ ၂၅
ရန်ကုန်တိုင်း၊ သန်လျင်မြို့နယ်၊ ဖားကူးကျေးရွာကို စစ်ကောင်စီတပ်ဖွဲ့ဝင်တွေ ဖေဖော်ဝါရီ ၂၄ ရက် နေ့လယ်ပိုင်းက ရာက်ရှိလာပြီး ကျေးရွာအတွင်း တပ်စွဲထားတယ်လို့ ဒေသခံတွေက မဲခေါင်သတင်းကို ပြောပါတယ်။
ဖားကူးကျေးရွာဟာ ပဲခူး၊ ခရမ်း၊ ပိန်းကန် စတဲ့မြို့နယ်များနဲ့ ရေလမ်း၊ ကုန်လမ်း ဆုံမှတ် နေရာ ဖြစ်တဲ့အတွက် ကျေးရွာမှာ လာရောက် တပ်စွဲထားတာ ဖြစ်တယ်လို့ ဒေသခံ တစ်ဦးက သုံးသပ်ပါတယ်။
“ သူတို့ သတင်း တစ်ခုခုတော့ ရထားလိမ့်မယ်။ မနေ့က ညနေပိုင်း ၄ နာရီကျော်လောက်က သန်လျင် သာသနာ့ဗိမာန်ကို သူတို့ ဖမ်းထားတဲ့ လူငယ် တစ်ယောက်ကို ပြန်လာပို့သွားတယ်။ ပြီးတော့ ဒီကောင်တွေ ဘောင်းဘီတိုတွေ ဝတ်ထားပြီး အရပ်သားပုံ ဖမ်းထားကြတယ်။ Alphard အဖြူရောင် 4D/6118 ကားနဲ့ ရောက်လာတာ။ ပြီးတော့ အောင်ချမ်းသာဘက်က ချမ်းသာသုခဆေးရုံ ဘက်ကို ထွက်သွားကြတယ်” လို့ သူကပြောပါတယ်။
ဒါ့အပြင် သန်လျင်မြို့ ဗိုလ်ချုပ်ကျေးရွာ တောင်ပိုင်း၊ ကန်ညီနောင် ဘက်မှာ စစ်ကောင်စီတပ်များ မနေ့ ည ၈ နာရီကျော်က ရောက်ရှိနေပြီး အိမ်စီးကား အများအပြားနဲ့ ဖမ်းဆီးရမယ့်သူ လိုက်လံ ရှာဖွေနေပေမယ့် ဖမ်းဆီးရမိခဲ့တာ မရှိဘူးလို့ ဒေသခံတွေက ပြောပါတယ်။
MK-005
