မဲခေါင်၊ ဇန်နဝါရီ ၂၀
၂၀၂၂ ခုနှစ်၊ ဒီဇင်ဘာလ ၄ ရက်နေ့က ကျင်းပခဲ့တဲ့ JLPT ဂျပန်ဘာသာ အရည်အချင်းစစ် စာမေးပွဲရဲ့ Online Result တွေကို လာမယ့် ဇန်နဝါရီလ ၂၃ ရက်နေ့မှာ ထုတ်ပြန်ကြေညာမယ်လို့ မြန်မာနိုင်ငံ ဂျပန်ပြန် ပညာသင်ဟောင်းအသင်း Myanmar Association of Japan Alumnmi-MAJA က ကြေညာပါတယ်။
စာမေးပွဲ အောင်စာရင်း ကြည့်ရှုနိုင်မယ့် Link ကို ကြေညာချက်မှာ Edit ပြုလုပ် ထည့်သွင်းပေးမှာ ဖြစ်ပြီး အောင်စာရင်းကို ဇန်နဝါရီ ၂၃ ရက်နေ့ ဂျပန်စံတော်ချိန် မနက် ၁၀ နာရီ၊ မြန်မာစံတော်ချိန် ၇ နာရီခွဲမှ စတင်ကြည့်ရှုနိုင်မှာ ဖြစ်တယ်လို့ အသိပေးထားပါတယ်။
အဆိုပါ စာမေးပွဲ ဖြေဆိုခွင့် လျှောက်လွှာကို ရန်ကုန် ပညာရေးတက္ကသိုလ်မှာ စတင်ရောင်းချရာ လူငယ် ၅,၀၀၀ ကျော် အလုအယက် ဝယ်ယူဖို့ကြိုးစားရာမှ ရုတ်ရင်းဆန်ခတ်ဖြစ်ခဲ့ပြီး စစ်ကောင်စီရဲ့ ညမထွက်ရ အမိန့်ကို ကျော်လွန်ပြီး လူစုလူဝေးဖြစ်လာလို့ လျှောက်လွှာတွေ အွန်လိုင်းကသာ ရောင်းချတော့မယ်လို့ ရုတ်တရက် ကြေညာခဲ့တဲ့ အခြေအနေတွေကြောင့် ဝေဖန်မှုများစွာ မြင့်တက်ခဲ့ပါတယ်။
စစ်တပ်အာဏာသိမ်းပြီးနောက် အလုပ်အကိုင် အခွင့်အလမ်း ရှားပါးလာတာကြောင့် လူငယ်တွေဟာ အိမ်နီးချင်းနိုင်ငံတွေ အပါအဝင် ပြည်ပနိုင်ငံတွေကို သွားရောက် အလုပ်လုပ်ကိုင်ကြရာမှာ JLPT စာမေးပွဲဟာ ဂျပန်နိုင်ငံကို သွားရောက်မယ့် လူငယ်တွေအတွက် အရေးကြီးတယ်လို့ သိရပါတယ်။
ဂျပန်ဘက်က အလုပ်ခေါ်စာ အများစုဟာ JLPT ရလဒ်ကို ဦးစားပေး တောင်းဆိုတာမို့ လူငယ်တွေ ဒုက္ခခံ ဖြေဆိုနေကြတာဖြစ်ပြီး ဂျပန်နိုင်ငံကို အသက် ၃၀ အောက် လူငယ်တွေ အများဆုံး သွားရောက်လုပ်ကိုင်ကြတာ ဖြစ်ပါတယ်။
ပြည်ပ အလုပ်အကိုင်ဝန်ဆောင်မှု လုပ်ငန်းရှင်များအဖွဲ့ချုပ်ရဲ့ စာရင်းအရ ပြီးခဲ့တဲ့နှစ်က စပြီး ဂျပန်ကိုထွက်ခွာသွားတဲ့ မြန်မာလူငယ် ၁၀,၀၀၀ ကျော် ရှိတယ်လို့ သိရပါတယ်။
MK-010