မဲခေါင်၊ ဖေဖော်ဝါရီ ၂၁
အမေရိကန်နိုင်ငံ၊ ဝါရှင်တန်မြို့တော်မှာ NUG က ရုံးခန်းဖွင့်လှစ်ပြီးတဲ့နောက်မှာ တရုတ်က သူနဲ့ ဆက်စပ်မှုရှိတဲ့ တိုင်းရင်းသားလက်နက်ကိုင်အဖွဲ့တစ်ချို့နဲ့တွေ့ဆုံနေတယ်လို့ သတင်းရင်းမြစ်တွေဆီကနေ စုံစမ်းသိရပါတယ်။
ပြီးခဲ့တဲ့ သီတင်းပတ်ကတည်းကစလို့ မြန်မာနိုင်ငံဆိုင်ရာ တရုတ်အထူးကိုယ်စားလှယ်နဲ့ တိုင်းရင်းလက်နက်ကိုင် ကိုယ်စားလှယ်အချို့ယူနန်ပြည်နယ်နဲ့ တရုတ်နယ်စပ်က တိုင်းရင်းသားနယ်မြေတွေမှာ တွေ့ဆုံနေကြတာဖြစ်ပြီး လက်ရှိအချိန်အထိတော့ အဖွဲ့ ၄ဖွဲ့လောက်နဲ့တွေ့ပြီးပြီလို့ တိုင်းရင်းသားလက်နက်ကိုင်တွေနဲ့ နီးစပ်တဲ့ သတင်းရင်းမြစ်က မဲခေါင်ကို ပြောပါတယ်။
“NUG က အမေရိကန်မှာ ရုံးခွဲဖွင့်တဲ့ကိစ္စအပေါ်လည်း သူတို့(တရုတ်)က သိပ်မကြိုက်ဘူး။ တရုတ်သံတမန်က UN Resolution ချချိန် မဲမပေး ကြားနေခဲ့တာကို အထူးပြု ပြောသွားတယ်။ တရုတ်ကို ဆွဲဆောင်ချင်ရင် NUG က Diplomats(သံတမန်) မဆန်တဲ့ သူ့မူဝါဒတွေ ပြင်ရမယ် ဆိုတဲ့ သုံးသပ်ချက်မျိုး သွားတွေ့တဲ့ အဖွဲ့တွေဆီကထွက်လာတယ်” လို့ သူက ပြောပါတယ်။
ဒါ့အပြင် လောင်းကစားမှု၊ လိမ်လည်မှုအပါအဝင် နိုင်ငံဖြတ်ကျော်ရာဇဝတ်မှုတွေကို နှိမ်နင်းတဲ့နေရာမှာ တိုင်းရင်းသားလက်နက်ကိုင်တွေအနေနဲ့ ပူးပေါင်းပါဝင်ဖို့ကိုလည်း ပြောဆိုခဲ့တယ်လို့ အဲဒီသတင်းရင်းမြစ်ထံကနေသိရပါတယ်။
တရုတ်နိုင်ငံက အလိုရှိတဲ့ရာဇဝတ်သားတွေကို ဖမ်းဆီးပေးတာ အပါအဝင် အွန်လိုင်းလောင်းကစားမှု၊ အွန်လိုင်းလိမ်လည်မှု၊ လူကုန်ကူးမှု၊ မူးယစ်ဆေးဝါး ရောင်းဝယ်ဖောက်ကားမှု စတဲ့ကိစ္စ တိုင်းရင်းသားလက်နက်ကိုင်နယ်မြေတွေမှာ အခြေချလုပ်ကိုင်ခွင့်မပေးဖို့ စတဲ့ ကိစ္စတွေလည်း ဆွေးနွေးကြတယ်လို့ နောက်ထပ်သတင်းရင်းမြစ်တစ်ဦးက ပြောပါတယ်။
“အဓိကကတော့ ဒီရက်ပိုင်းထိုင်းမှာလည်း တရုတ်နိုင်ငံသားတွေ လောင်းကစားကိစ္စတွေရော၊ တခြားအမှုတွေရော တက်ကြတယ်မှတ်လား။ အဲဒါနဲ့ပတ်သက်ပြီး တရုတ်အစိုးရက တင်းတင်းကြပ်ကြပ် ကိုင်ဖို့ရှိနေတာပေါ့လေ။ ဒါတွေကိုလည်း ဝိုင်းလုပ်ဖို့ပြောတယ်” လို့ သူက ပြောပါတယ်။
ပြီးခဲ့တဲ့ရက်ပိုင်းက တရုတ်နိုင်ငံသားတွေအနေနဲ့ ကမ္ဘောဒီယား၊ မြန်မာ၊ လာအို၊ UAE၊ ဖိလစ်ပိုင်၊ ထိုင်းနဲ့ မလေးရှားနိုင်ငံတွေကို အရေးပေါ်နဲ့ မဖြစ်မနေကိစ္စကလွဲလို့ ခရီးမသွားဖို့၊ ခရီးသွားခဲ့ရင်လည်း ဥပဒေနဲ့ မလွတ်ကင်းတဲ့ ကိစ္စတွေမှာ လုံးဝ ဝင်ရောက်ပတ်သက်တာမျိုးမလုပ်ဖို့ ထုတ်ပြန်ထားပါတယ်။
တရုတ်ပြည်သူ့သမ္မတနိုင်ငံ၊ နိုင်ငံခြားရေးဝန်ကြီးဌာန၊ အာရှရေးရာအထူးကိုယ်စားလှယ် H.E Mr. Deng Xijun မကြာသေးမီက ရှမ်းပြည်နယ်၊ အရှေ့ပိုင်း၊ အထူးဒေသ(၄)မိုင်းလားကိုလာလည်သွားတယ်လို့ မိုင်းလားနဲ့နီးစပ်တဲ့ WeChat သတင်းတွေမှာ ဖော်ပြထားပါတယ်။
တရုတ်အထူးကိုယ်စားလှယ်အနေနဲ့ လာမယ့်သီတင်းပတ်ထဲမှာလည်း ကျန်တဲ့ တိုင်းရင်းသားလက်နက်ကိုင်အဖွဲ့တွေနဲ့ ဆက်ပြီးတွေ့ဖို့ရှိသေးတယ်လို့ သိရပါတယ်။
MK – 004
#MeKongNews
#တရုတ်အထူးကိုယ်စားလှယ်
#ဝါရှင်တန်
