မဲခေါင်၊ ဇန်နဝါရီ ၂၂
ရန်ကုန်တိုင်း၊ လှိုင်သာယာမြို့နယ်အတွင်းမှာ ဧည့်စာရင်းကနေ စစ်ကောင်စီကောက်ခံရရှိငွေဟာ တစ်ရပ်ကွက်ကို အနည်းဆုံး တစ်လသိန်း၂၀၀ ရှိတယ်လို့ သတင်းရင်းမြစ်တွေထံကနေ သိရပါတယ်။
လှိုင်သာယာမြို့နယ်အတွင်းမှာ ရပ်ကွက်ပေါင်း ၂၆ရက်ကွက်ရှိပြီး ရပ်ကွက်အကြီးအသေးအလိုက် ကျပ်သိန်း ၂၀၀ ကနေ သိန်း ၃၀၀ကြား လစဉ်ရရှိနေတာဖြစ်တယ်လို့ သတင်းရင်းမြစ်တစ်ဦးက မဲခေါင်ကို ပြောပါတယ်။
အဲဒီငွေကြေးတွေကို လှိုင်သာယာရပ်ကွက်အုပ်ချုပ်ရေးမှူးတွေနဲ့လှိုင်သာယာအရှေ့ပိုင်းကိုင်တွယ်နေသူ ဗိုလ်မှူးကြည်သာဇော်၊ လှိုင်သာယာအနောက်ပိုင်းတာဝန်ယူထားသူ ဗိုလ်မှူးထွန်းထွန်းဝင်းတို့က ခွဲဝေယူနေတယ်လို့ အဲဒီသတင်းရင်းမြစ်က ပြောပါတယ်။
“ ညောင်ရွာအုပ်ကြီး လှိုင်ဘွားဆိုတဲ့ကောင်ဆိုရင် ကား၄စီးရှိသွားပြီ။ အုတ်တံတိုင်းခတ်ထားတဲ့မြေကွက် ၆ကွက်ရှိတယ်။ သူများမြေကို ကျူးလို့ပြောပြီး ဖယ်ခိုင်းတယ်။ ဒိုင်စုအုပ်ကြီးဝင်းထွဋ်ဝင်းလည်း အဲ့လိုဘဲ။ ၂၀ရက်နေ့ကတောင် ခွေးတစ်အုပ်ကြီးလာလို့ သူတောင်းစား ၂ကောင်က ဧည့်ခံနေသေးတယ်။ ၂၀အုပ်ကြီးသေတော့ တက်လာတဲ့ကောင်ကလည်း ပျူစောထီး၊ လူမိုက်ကောင်ပဲ။ ဒံပေါက်ကျွေးပြီးတောင် ပွဲခံလိုက်သေးတယ်။ ငွေရချက်ကတော့နိုင်ငံခြားသွားစရာမလိုဘူး” လို့ ရပ်ကွက်နေပြည်သူတစ်ဦးက ပြောပါတယ်။
လှိုင်သာယာမြို့နယ်အတွင်းမှာ ဧည့်စာရင်းအတွက် တစ်ပတ်ကို လူတစ်ယောက်စာ အနည်းဆုံး ၅၀၀ ကျပ် ကနေ ၂၀၀၀ကျပ်အထိ တောင်းယူနေပြီး လူတစ်ဦးညအိပ်ပါက ဧည့်စာရင်းခတစ်သောင်းခွဲအထိ တောင်းခံတယ်လို့ ဒေသခံတွေက ပြောပါတယ်။
“ ၈ရပ်ကွက်မှာတော့ အသစ် တိုင်ရင် ၃သောင်းပေးရတယ်။ အဟောင်းဆိုရင်တော့ ၅၀၀ပေးရတယ်။ ရက်ကျော်ရင်တော့ ဒဏ်ကြေး၂ထောင်ပေးရတယ်။ အလုပ်ထောက်ခံစာက တစ်ထောင်။ ခရီးသွားထောက်ခံစာ ၃ထောင်နဲ့ အရေးပေါ်ခရီးကိစ္စဆို ၁သောင်းပေးရတယ်။ မင်္ဂလာဆောင်ဘောက်ဖွင့်ရင် တစ်သိန်း၊ အလှူလုပ်ရင် ၃သောင်းပေးရတယ်။ အကြောင်းမကြားဘဲ လုပ်ရင်တော့ ၅သောင်းပေးရတယ်” လို့ ရပ်ကွက်နေပြည်သူတစ်ဦးက မဲခေါင်ကို ပြောပါတယ်။
အဲဒီငွေကြေးဟာ ဧည့်စာရင်းကောက်ခံမှုကနေရရှိနေတဲ့ ဝင်ငွေတစ်မျိုးထဲသာဖြစ်ပြီး လိုင်းကြေးယူပြီး ခွင့်ပြုထားတဲ့ လောင်းကစားဝိုင်းတွေ၊ မူးယစ်ဆေးဝါးရောင်းချခြင်းနဲ့ ကျူးကျော်နေထိုင်သူတွေထံက ကောက်ယူနေတဲ့ငွေကြေးတွေ မပါဝင်သေးဘူးလို့ ဒေသခံတွေက ပြောပါတယ်။
လှိုင်သာယာမြို့နယ်အတွင်းမှာ ၂၀၁၄ခု နှစ် လူဦးသန်းခေါင်စာရင်းအရ လူဦးရေ၆သိန်း ၈သောင်းကျော် နေထိုင်ကြပြီး မြို့နယ်အတွင်းနေထိုင်သူအများစုဟာ ရွှေ့ ပြောင်းလုပ်သားတွေ ဖြစ်ကြတယ်လို့ သိရပါတယ်။
MK-005
#MeKongNews