မဲခေါင်၊ ဩဂုတ် ၇
ကရင်နီပြည်နယ်သို့ အင်အားဖြည့်တင်းလာတဲ့ စစ်ကောင်စီတပ်နဲ့ လွိုင်ကော်- ဗိုးဗြဲ လမ်းမကြီးပေါ်မှာ တိုက်ပွဲ ဖြစ်နေတယ်လို့ ကရင်နီ အမျိုးသားများ ကာကွယ်ရေးတပ်-KNDF တပ်ရင်း အမှတ် (၂) က မနေ့ညပိုင်းက ထုတ်ပြန်ပါတယ်။
ဒါ့အပြင် လမ်းမပေါ်မှာ တိုက်ပွဲတွေ ပြင်းထန်လာနိုင်လို့ စစ်ကောင်စီ တပ်စွဲတဲ့ နေရာများကို ပြည်သူများ အနေနဲ့ စစ်ရေးသတိပြု ရှောင်ရှား သွားလာပေးကြဖို့ KNDF တပ်ရင်း (၂) က မေတ္တာရပ်ခံ ထားပါတယ်။
ဩဂုတ်လ ၄ ရက်နေ့က စပြီး လွိုင်ကော်-မိုးဗြဲ လမ်းမကြီးရှိ ကျေးရွာ တချို့မှာ စစ်ကောင်စီတပ် လှုပ်ရှားလာရာမှ ဩဂုတ်လ ၆ ရက်နေ့မှာ ကရင်နီ ပူးပေါင်းတပ်များနဲ့ တိုက်ပွဲဖြစ်ပွားခဲ့တာလို့ KNDF တပ်ရင်း (၂) ကပြောပါတယ်။
“စစ်ကောင်စီတပ်တွေ ရွာတွေဖက်မှာ လှုပ်ရှားလာရာကနေ မနေ့ညကစပြီး တိုက်ပွဲဖြစ်တာပေါ့။ အခုထိလည်း စစ်ရေး အခြေအနေက တင်းမာနေတုန်းမို့ လမ်းမပေါ် သွားလာကြတဲ့ ပြည်သူတွေ အနေနဲ့ သတိနဲ့ သွားလာကြဖို့၊ စစ်ကောင်စီ စခန်းတွေနဲ့ ဝေးဝေးနေကြဖို့ အသိပေးချင်တယ်” လို့ ကရင်နီ စစ်ရေး သတင်းရင်းမြစ် တစ်ဦးက ပြောပါတယ်။
မနေ့က ဖြစ်ပွားတဲ့ တိုက်ပွဲဟာ တစ်နာရီခန့်သာ ကြာမြင့်ပြီး တော်လှန်ရေးတပ်ဖွဲ့ ဘက်က အထိခိုက်မရှိဘဲ စစ်ကောင်စီဘက်က ထိခိုက် သေဆုံးမှု ရှိနိုင်တယ်လို့လည်း သူကပြောပါတယ်။
စစ်ကောင်စီတပ်ဖွဲ့ဟာ ကရင်နီပြည်နယ်ကို ထိုးစစ်ဆင်ဖို့ အင်အားဖြည့်တင်းရာမှာ မိုးဗြဲ-လွိုင်ကော် လမ်းမကြီးကို အဓိက အသုံးပြုနေတာကြောင့် အဲ့ဒီ လမ်းမကြီးပေါ်မှာ တော်လှန်ရေးတပ်တွေနဲ့ မကြာခဏ တိုက်ပွဲ ဖြစ်ပွားနေပါတယ်။
ပြီးခဲ့တဲ့ ဇူလိုင်လ အတွင်း ကရင်နီပြည်နယ်သို့ အင်အားဖြည့်တင်းလာတဲ့ စစ်ကောင်စီတပ်ကို ကြားဖြတ် တိုက်ခိုက်ရာ စစ်ကောင်စီတပ်ဖွဲ့ဝင် ၂၀ ထက်မနည်း သေဆုံးခဲ့သလို သေနတ် ၈ လက် အပါအဝင် လက်နက်ခဲယမ်းများကို ကရင်နီ ပူးပေါင်းတပ်က သိမ်းဆည်းရမိ ခဲ့ပါတယ်။
ကရင်နီပြည်နယ်ကို အင်အားဖြည့်တင်းလာတဲ့ စစ်ကောင်စီတပ်ဟာ မြေပြင်တိုက်ပွဲမှာ အထိနာတာကြောင့် စစ်ရေးပစ်မှတ် မဟုတ်တဲ့ ကျေးရွာတွေထဲကို လက်နက်ကြီးနဲ့ ပစ်ခတ် တိုက်ခိုက်ရာ ပြည်သူလူထုတွေ ထိခိုက် သေဆုံးမှုတွေ ရှိနေပါတယ်။
CJ-002
#Mekongnews
#လွိုင်ကော်-မိုးဗြဲ
#KNDF_တပ်ရင်း_အမှတ်_(၂)
#လက်နက်ခဲယမ်း
