မဲခေါင်၊ ဇွန် ၂၉
တောင်ကြီး-လွိုင်ကော်ကို ပြေးဆွဲတဲ့ ခရီးသည်တင်ယာဉ်လိုင်းတွေကို လာမယ့် ဇူလိုင်လ ၁ ရက်ကစပြီး လူနဲ့ကုန်တင်ပြေးဆွဲဖို့ စစ်ကောင်စီက ဖိအားပေး ပြေးဆွဲခိုင်းနေပြီး ပြေးဆွဲခြင်းမရှိပါက ဥပဒေအရ အရေးယူမယ်လို့ ထုတ်ပြန်ထားပါတယ်။
စစ်ကောင်စီလက်အောက်ခံ လွိုင်ကော် ပို့ဆောင်ရေးစီမံကိန်းဦးစီးဌာနက ကယားပြည်နယ်အစိုးရအဖွဲ့ရဲ့ ညွှန်ကြားချက်နဲ့ လွိုင်ကော်-တောင်ကြီး ကို ပြေးဆွဲနေတဲ့ ခရီးသည် ပို့ဆောင်ရေးယာဉ်လိုင်းအသင်းတွေကို ပြန်လည်ပေးဆွဲဖို့ စီစဉ်နေတာပါ။
တောင်ကြီး-ဆီဆိုင်-လွိုင်ကော် ခရီးစဉ်ကို လာမယ့် ဇူလိုင်လ ၁ ရက်နေ့ကစပြီး လုံခြုံစိတ်ချစွာနဲ့ ပြန်လည်ပြေးဆွဲဖို့နဲ့ (Domestic Operator License) လိုင်စင်သက်တမ်း ၁ နှစ်ကျော် မပြေးဆွဲတော့တဲ့ ယာဉ်လိုင်းတွေကို ဥပဒေအရ အရေးယူသွားမယ်လို့ ဇွန်လ ၂၄ ရက်စွဲနဲ့ စာထုတ်ပြန်လာတာ တွေ့ရပါတယ်။
“ ရှမ်း-ကယား နယ်စပ်တစ်လျှောက် စစ်တပ်နဲ့ PNO တွေ အများကြီး စောင့်ကြပ်နေတာ အစစ်အဆေးကလည်း တင်းကြပ်ပြီး မထင်ရင်မထင်သလို ဆက်ဆံနေတာအပြင် ယူချင်တာယူနေတော့ ဘယ်လို သွားရဲပါ့မလဲ၊ ခုက မသွားပြန်ရင်လဲ ယာဉ်လိုင်းပိတ်သိမ်းမယ်ဆိုပြီး လူထုကို ဖိအားပေးနေတာ” လို့ တောင်ကြီး-လွိုင်ကော် ယာဉ်လိုင်းပြေး ယာဉ်မောင်း ၁ ဦးက မဲခေါင်သတင်းဌာနကို ပြောပါတယ်။
လွိုင်ကော်မြို့ကို စစ်ကောင်စီက ပြန်လည်ထိန်းချုပ်နိုင်ပြီလို့ ပြသနိုင်ဖို့ လက်အောက်ခံဝန်ထမ်းတွေပြန်ခေါ်တာ၊ ရပ်ကွက်တွေမှာနေတဲ့ သူတို့လိုလားသူတွေကို အယောင်ပြနေခိုင်းတာတွေလုပ်နေတာမှာ ပြည်သူတွေကို ဖိအားပေးပြန်လာခိုင်းနေသလို အခုယာဉ်လိုင်းတွေကိုလည်းမဖြစ်မနေ ပြန်လည်ပြေးဆွဲဖို့ အတင်းအကြပ် ဖိအားပေးလာနေတာဖြစ်ပါတယ်။
တစ်ဖက်မှာလည်း တိုက်ပွဲတွေ အရင်ထက် အရှိန်မြင့်လာမှာဖြစ်သလို စစ်ကောင်စီတပ်ကလည်း လက်နက်၊ အင်အားကို အရင်ထက် ပိုချထားတော့ တော်လှန်ရေးတပ်တွေဘက်ကလည်း အင်အားပြည့် တိုက်နေတာဖြစ်လို့ ဒီလမ်းကြောင်းတွေကို ကားနဲ့သွားတာမှာ Safe ဖြစ်မဖြစ် သတင်းတွေကို အမြဲနားစွင့်ပြီး သွားလာကြစေချင်တယ်လို့တောင်ကြီး တော်လှန်ရေးထောက်ပို့အဖွဲ့က သတိပေးတာ တွေ့ရပါတယ်။
အဓိကတော့ ရှမ်းတောင်ဘက်အခြမ်းက ဆီဆိုင်ဘက် ထုတ်ပြန်ချက်တွေ ၊ မြေပြင်သတင်းတွေ သေချာ စုံစမ်းသွားလာကြဖို့ အကြံပြုလိုတယ်လို့ ပြောပါတယ်။
လက်ရှိမှာ စစ်ကောင်စီတပ်နဲ့ လက်ပါးစေ PNO ပြည်သူ့စစ်တွေဟာ ဖယ်ခုံ၊ ပင်လောင်း၊ နယ်စပ် နောင်ဝိုးရွာအနီးဝန်းကျင်မှာ လူ့အခွင့်အရေးချိုးဖောက်မှုတွေ၊ စစ်ရာဇဝတ်မှုတွေကို ပြောင်ပြောင်တင်းတင်း တစ်ခုပြီးတစ်ခု ကျူးလွန်နေကာ ဖယ်ခုံ၊ မိုးဗြဲအစပ်နဲ့ ညောင်ရွှေမြို့နယ်အတွင်း ရွာတွေကို လက်နက်ကြီးနဲ့ ပစ်ခတ်နေလို့ ပြည်သူတွေ သေဆုံးထိခိုက်တာတွေ အများအပြားရှိနေတယ်လို သိရပါတယ်။
MK-012
