မဲခေါင်၊ ဩဂုတ် ၇
ရှမ်းပြည်နယ် တောင်ပိုင်း ၊လဲချားမြို့နယ်မှာ မနေ့က ဖြစ်ပွားခဲ့တဲ့ တိုက်ပွဲအတွင်း စစ်ကောင်စီတပ်ဖွဲ့ဘက်က သေဆုံးမှုများပြီး လက်နက်ခဲယမ်းတွေ သိမ်းဆည်းရမိ ခဲ့တယ်လို့ SSPP နဲ့ နီးစပ်တဲ့ စစ်ရေးသတင်းရင်းမြစ်က ပြောပါတယ်။
ဒါ့အပြင် စစ်ကောင်စီ တပ်ဖွဲ့ဝင် ၂ ဦးကို အရှင်ဖမ်းဆီးရမိသလို ကားတစ်စီးကိုလည်း သိမ်းဆည်းရမိခဲ့တယ်လို့ သူကပြောပါတယ်။
“လဲချားအဝင် ဒီမက်လန်းရွာနားက နမ့်တိန်းဂိတ် တိုက်ပွဲမှာက စစ်ကောင်စီတပ် အကျအဆုံးများတယ်။ ဒီမက်လန်းက တိုက်ပွဲမှာကိုပဲ သူတို့ ၅ယောက်ထက်မနည်းကျတယ်။ သူတို့လက်နက်တွေကိုလည်း သိမ်းရခဲ့တယ်” လို့ SSPP နဲ့ နီးစပ်တဲ့ သတင်းရင်းမြစ်က ပြောပါတယ်။
မက်လန်းရွာ အနီး မနေ့က ဖြစ်ပွားတဲ့ တိုက်ပွဲအတွင်း စစ်ကောင်စီတပ်ဖွဲ့ဝင် ၂ ဦး၊ AK လက်နက် ၂ လက်၊ ပစ္စတို တစ်လက်နဲ့ ကားတစ်စီးကို SSPP တပ်ဖွဲ့က သိမ်းဆည်းရမိခဲ့တာ ဖြစ်ပါတယ်။
“တိုက်ပွဲက ၃ နေရာလောက်ဖြစ်နေတော့ စစ်ကောင်စီဘက်က အကျအဆုံး အတိအကျတော့ မသိရသေးဘူး၊ ကြားရတာတော့ စုစုပေါင်း ကျတာ ၂၀ လောက်ရှိတယ်လို့လည်း ပြောကြတယ်။ SSPP ဘက်ကတော့ နမ့်ပေါက်မှာ စစ်ကောင်စီက စပစ်တဲ့အချိန် တစ်ယောက် ကျသွားတာပဲရှိတယ်လို့ သိရတယ်ပေါ့နော်” လို့ နောက်ထပ် သတင်းအရင်းအမြစ်က ပြောပါတယ်။
လက်ရှိ ၂ ဖက်တပ်ဖွဲ့အကြား စစ်ရေးတင်းမာနေဆဲဖြစ်ပြီး မက်လန်းရွာ နမ့်တိန်းဂိတ်မှာ စစ်ကောင်စီဘက်က စစ်ကား ၂ စီးနဲ့ အင်အား ဖြည့်တင်းထားတယ်လို့ အဲ့ဒီသတင်းရင်းမြစ်က ပြောပါတယ်။
မနေ့ ဩဂုတ်လ ၆ ရက်နေ့မှာ အင်အား ၇၀ ခန့်ရှိတဲ့ စစ်ကောင်စီတပ်ဖွဲ့ဟာ လဲချားမြို့ အရှေ့တောင်ဘက် ဟိုင်းဆိုင်အုပ်စု၊ နမ့်ပေါက်ရွာ အနီးမှာရှိတဲ့ SSPP တပ်စခန်းကို တိုက်ခိုက်တာကြောင့် လဲချားမြို့အရှေ့ မြောက်ဘက်အထွက် ၃ မိုင်အကွာ၊ လဲချား-မိုင်းနောင် လမ်းမပေါ်က မက်လန်းကျေးရွာမှာရှိတဲ့ စစ်ကောင်စီရဲ့ စခန်းကို SSPP က ပြန်လည် တိုက်ခိုက်ခဲ့ပါတယ်။
အဲ့ဒီလို တိုက်ပွဲ ဖြစ်ပွားပြီးနောက် စစ်ကောင်စီတပ်ဟာ လဲချား – မိုင်းနောင် ကားလမ်းကို အတားအဆီးတွေ ပြုလုပ်ကာ လမ်းပိတ်ခဲ့ပါတယ်။ တိုက်ပွဲကြောင့် ဒေသခံတချို့ လဲချားမြို့ပေါ် တိမ်းရှောင်လာခဲ့ပါတယ်။
CJ-002
#Mekongnews
#လဲချားမြို့နယ်
#SSPP
#လက်နက်ခဲယမ်း
