မဲခေါင်၊ ဖေဖော်ဝါရီ ၁၇
ထားဝယ်ခရိုင်၊ လောင်းလုံးမြို့ပေါ်မှာ စစ်ကောင်စီရဲ့ လက်နက်ကိုင် အဖွဲ့အစည်းဖြစ်တဲ့ ပျူစောထီး အဖွဲ့ဝင် တစ်ဦးကို ပစ်ခတ်ရှင်းလင်းခဲ့တယ်လို့ Dawei Defense Team-DDT က ဒီကနေ့ ထုတ်ပြန်ပါတယ်။
မနေ့ ညနေ ၆ နာရီကျော်က လောင်းလုံးမြို့မရဲစခန်းမှ စစ်ကောင်စီတပ်သားတွေ၊ ရဲတွေနဲ့အတူ ခြင်းလုံးခပ်ပြီး ပြန်လာတဲ့ ပျူစောထီး အဖွဲ့ဝင် အောင်ဆန်းဦး ဆိုသူကို မြို့ပေါ်လမ်းပိုင်း တစ်နေရာမှာ DDT တပ်ခွဲ (၃) မှ ရဲဘော်တွေက သေနတ်နဲ့ ၅ ချက် ပစ်ခတ်ရှင်းလင်း ခဲ့တာလို့ DDT တပ်ဖွဲ့က ပြောပါတယ်။
ပျူစောထီး အဖွဲ့ဝင်အောင်ဆန်းဦး ကို စစ်ကောင်စီနဲ့ ဆက်လက် မပူးပေါင်းဖို့ ၃ ကြိမ်တိတိ သတိပေးခဲ့ပေမယ့် လိုက်နာတာ မရှိဘဲ စစ်တပ်နဲ့ ပူးပေါင်းပြီး ပြည်သူကို ဆက်လက် ဒုက္ခပေးနေတာကြောင့် အခုလို ရှင်းလင်းရတာလို့ သိရပါတယ်။
ပျူစောထီးအဖွဲ့ဝင် ဦးအောင်ဆန်းဦးဆိုသူကို ရှင်းလင်းတာဟာ DDT တပ်ခွဲ (၃)၊ ထားဝယ် ပ.က.ဖ ရဲဘော်တွေရဲ့ လုပ်ဆောင်ချက်သာဖြစ်ပြီး ပြည်သူလူထုနဲ့ လုံးဝ သက်ဆိုင်ခြင်း မရှိဘူးလို့လည်း အသိပေးထားပါတယ်။
လောင်းလုံးမြို့နယ် အတွင်းရှိ ပျူစောထီးတွေ၊ သတင်းပေးဒလန်တွေ အနေနဲ့ စစ်ကောင်စီနဲ့ ဆက်လက်ပူးပေါင်းတာ မပြုဘဲ အမြန်ဆုံး ရပ်တန်းက ရပ်ကြဖို့လည်း Dawei Defense Team – DDT က နောက်ဆုံးအကြိမ်အဖြစ် သတိပေးထားပါတယ်။
MK-003