မဲခေါင်၊ ဩဂုတ် ၁၁
ရှမ်းပြည်နယ် မြောက်ပိုင်း၊ လားရှိုးမြို့နယ်၊ မိုင်းယော်တိုက်နယ်၊ နမ့်လောင်းကျေးရွာ အနီးမှာ TNLA နဲ့ စစ်ကောင်စီတပ် တိုက်ပွဲ ဆက်လက်ဖြစ်ပွားနေပြီး ဇူလိုင်နဲ့ ဩဂုတ်လ တိုက်ပွဲများ အတွင်း စစ်ကောင်စီတပ်သား ၂၅ ဦးထက်မနည်း သေဆုံးခဲ့တယ်လို့ TNLA က ထုတ်ပြန်ပါတယ်။
မနေ့ သြဂုတ်လ ၁၀ ရက် နေ့လယ်ပိုင်းမှာ တအာင်းအမျိုးသား လွတ်မြောက်ရေး တပ်မတော်-TNLA တပ်စခန်းကို စစ်တပ်က MI-35 တိုက်ခိုက်ရေး ရဟတ်ယာဉ်နဲ့ လာရောက် ပစ်ခတ်ပြီးနောက် တိုက်ပွဲပြင်းထန် ခဲ့တယ်လို့ ဆိုပါတယ်။
မနေ့က စစ်ကောင်စီရဲ့ ခမရ (၁၆)၊ ခလရ (၆၈) တပ်တို့နဲ့ ၄ နာရီနီးပါးကြာ တိုက်ပွဲ ပြင်းထန်ခဲ့ပြီး ဩဂုတ် ၉ ရက် နေ့လယ်ပိုင်းကလည်း တိုက်ပွဲ ဖြစ်ပွားခဲ့ရာ တိုက်ပွဲတွေ အတွင်း စစ်ကောင်စီတပ် သေဆုံးထိခိုက်နေလို့ အင်အား ထပ်မံ ဖြည့်တင်းနေတယ်လို့ TNLA က ထုတ်ပြန်ပါတယ်။
စစ်ကောင်စီနဲ့ PSLF/TNLA တပ်တို့ ဇူလိုင်လ ၂၃ ရက်နေ့မှ သြဂုတ်လ ၁၀ ရက်နေ့အထိ တိုက်ပွဲ ၁၁ ကြိမ် ဖြစ်ပွားခဲ့ပြီး စစ်ကောင်စီတပ်ဘက်က ၂၅ ဦးသေဆုံးကာ ၂၇ ဦး ဒဏ်ရာရခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
MK-005
#MeKongNews
#လားရှိုးမြို့နယ်
#TNLA
#MI-35
