မဲခေါင်၊ ဇန်နဝါရီ ၂၀
ရန်ကုန်တိုင်း၊ လှိုင်သာယာ အရှေ့ပိုင်း ဘုရင့်နောင် တံတား အဆင်း၊ တပ်ထိပ် မှတ်တိုင် အနီးရှိ ခမရ (၅၃၂) မနေ့ ဇန်နဝါရီ ၁၉ ရက် ညပိုင်းက ရှော့တိုက်ဒုံးနဲ့ အပစ်ခဲ့ရပြီးနောက် ဒီကနေ့မှာတော့ အဲဒီတပ် ဝန်းကျင်နဲ့ လှိုင်သာယာမှာ လုံခြုံရေး ပိုချထားပါတယ်။
မနေ့က ည ၈ နာရီ မိနစ် ၂၀ ကျော်မှာ ပေါက်ကွဲသံ ၃ ချက် ကြားခဲ့ရပြီး စစ်တပ်အတွင်းမှ သေနတ်နဲ့ ပြန်လည် ပစ်ခတ်သံတွေလည်း ကြားရတယ်လို့ ဒေသခံတွေက ပြောပါတယ်။
“ အရေးပေါ်ကားတွေ ဝင်သွားတာ တွေ့တယ်။ ပထမဦးဆုံး ဝင်တဲ့ကားပဲ မီးတွေဖွင့်ပြီး မောင်းသွားတာ။ နောက် ထပ်ဝင်တဲ့ ၃ စီးကတော့ မီးတွေပိတ် အသံတွေပိတ်ပြီး ဝင်သွားတာ။ ငိုသံတွေလည်း ကြားရတယ်။ လူဘယ် လောက်ထိပြီး သေတယ်ဆိုတာတော့ မသိဘူး” လို့ ရှော့တိုက်ဒုံး ပစ်ခံရပြီးနောက် အခြေအနေကို ဒေသခံ တစ်ဦးက ပြောပါတယ်။
ခမရ (၅၃၂) အတွင်းသို့ ရှော့တိုက်ဒုံးနဲ့ ၄ လုံး ပစ်ခတ်ခဲ့ပေမယ့် ၃ လုံးသာ ပေါက်ကွဲခဲ့ပြီး စစ်တပ်ရဲ့ လေကြောင်း ဗုံးကြဲမှုတွေ အတွက် သွေးကြွေးပြန်ဆပ်ခဲ့တာ ဖြစ်ကာ စစ်ကောင်စီကို ဆက်လက် တိုက်ခိုက်သွားမှာ ဖြစ်တယ်လို့ မြေပြင်တိုက်ခိုက်ရေးမှာ ပါဝင်သူ တစ်ဦးက ပြောပါတယ်။
ရှော့တိုက်ဒုံးနဲ့ အပစ်ခံရပြီးနောက် အဆိုပါ စစ်တပ်ဂိတ်မှာ လုံခြုံရေးတွေ တိုးမြှင့်ချထားပြီး စစ်တပ်နဲ့အတူ ပျူစောထီးတွေလည်း အဆိုပါ တပ်ထဲ ကင်းစောင့်နေကြတယ်လို့ ဒေသခံက ပြောပါတယ်။
MK-005