မဲခေါင်၊ မေ ၂၁
ရှမ်းပြည်နယ်တော်လှန်ရေး ကြာမြင့်နေရတာ လက်နက်ကိုင် အဖွဲ့တွေ များပြားလွန်းပြီး အချင်းချင်း တိုက်ခိုက်နေလို့ဖြစ်တယ်လို့ ရှမ်းပြည်ပြန်လည်ထူထောင်ရေး ကောင်စီ-RCSS ဥက္ကဌ ဗိုလ်ချုပ်ကြီး ယွက်စစ်က ဒီကနေ့ မေလ ၂၁ ရက်မှာ ပြောဆိုလိုက်ပါတယ်။
ဒီကနေ့ ပြုလုပ်တဲ့ (၆၅) နှစ်မြောက် ရှမ်းအမျိုးသားတော်လှန်ရေးနေ့ အခမ်းအနားကို ပေးပို့လိုက်တဲ့ သဝဏ်လွှာမှာ ဗိုလ်ချုပ်ကြီး ယွက်စစ်က ထည့်သွင်း ပြောဆိုထားတာပါ။
၁၉၅၈ ခုနှစ်၊ မေလ ၂၁ ရက်မှာ စတင်ခဲ့တဲ့ ရှမ်းတော်လှန်ရေးဟာ ဒီနေ့ဆို ၆၅ နှစ်ပြည့်ပြီဖြစ်ပေမယ့် ရည်မှန်းချက်နဲ့ အောင်ပွဲမရသေးတဲ့ အပေါ်တုန်လှုပ်မိပြီး၊ ဒီလို တော်လှန်ရေး ကြာမြင့်နေရတဲ့ အဓိက အကြောင်းရင်းတွေဟာ ရှမ်းလက်နက်ကိုင်အဖွဲ့တွေအချင်းချင်မတည့်ဘဲ တိုက်ခိုက်နေလို့ ဖြစ်တယ်လို့ သူက ဆိုပါတယ်။
ရှမ်းပြည်မှာ လက်နက်ကိုင်အဖွဲ့အစည်း များပြားသလို ဥပဒေနဲ့မလွတ်ကင်းတဲ့ စီးပွားရေးလုပ်ငန်းတွေကို လက်နက်ပြ လုပ်ကိုင်နေတာကိုလည်း ထိန်းချုပ်နိုင်ဖို့လိုပြီး၊ တချို့ လက်နက်ကိုင်အဖွဲ့အစည်းတွေဟာ ခေတ်အဆက်ဆက် နယ်ချဲ့ဘက်မှာနေတာ၊ ငွေကြေးနဲ့ အာဏာရှိတဲ့ဘက်မှာ နေတာကြောင့်လည်း ရှမ်းတော်လှန်ရေးက မအောင်မြင်တာလို့ RCSS ဥက္ကဋ္ဌ ဗိုလ်ချုပ်ကြီး ယွက်စစ်က သဝဏ်လွှာမှာ ပြောဆိုထားပါတယ်။
RCSS ဟာ တနိုင်ငံလုံးပစ်ခတ်တိုက်ခိုက်မှု ရပ်စဲရေးစာချုပ် (NCA) မှာ လက်မှတ်ရေးထိုးထားပြီး ရှမ်းပြည်တိုးတက်ရေးပါတီ – SSPP နဲ့လည်း ဒေသတွင်းမှာ တိုက်ပွဲတွေ မကြာခဏဖြစ်ပွားလေ့ရှိပါတယ်။
MK-007
#MeKongNews
#RCSS
#ယွက်စစ်