ဒီနေ့ မနက် ၉ နာရီခွဲမှာ ပြည်ခရိုင် PDF တပ်ရင်း (၃၆၀၁)၊ တပ်ခွဲ (၅) -နွေဦးအဖွဲ့က နန်းထိုက်အောင် စစ်ဆင်ရေး အဖြစ် စစ်ဆေးရေးဂိတ်ကို မိုင်း ၂ လုံးဆွဲ တိုက်ခိုက်ခဲ့တာပါ။
ဒီတိုက်ခိုက်မှုမှာ စစ်ကောင်စီ တပ်ဖွဲ့ဝင် ၁ ဦး နေရာမှာ ပွဲချင်းပြီး သေဆုံးခဲ့ပြီး ထိခိုက်ဒဏ်ရာ ရရှိသူတွေလည်း ရှိတယ်လို့ သိရပါတယ်။
အဲဒီ စစ်ဆေးရေးဂိတ်ဟာ ပြည်သူလူထုကို စစ်ဆေးခြိမ်းခြောက်တာ၊ ဆိုင်ကယ်တွေ ဖမ်းဆီးတာ၊ ဆက်ကြေး တောင်းခံတာ၊ ဆက်ကြေး မပေးပါက ဖမ်းဆီး ထောင်ချတာတွေ ကျူးလွန်နေတာကြောင့် မိုင်းဆွဲ တိုက်ခိုက်ခဲ့တာလို့ ဆိုပါတယ်။
သေဆုံး စစ်သားရဲ့ ရုပ်အလောင်းကို အချိန်အတန်ကြာ သယ်ယူမှုမရှိဘဲ စစ်သားတွေက သေနတ်တွေနဲ့ ရမ်းသန်းပစ်ခတ်ခဲ့ပေမယ့် တော်လှန်ရေးရဲဘော်တွေ ဘေးအန္တရာယ်မရှိ ဆုတ်ခွာနိုင်ခဲ့တယ်လို့ သိရပါတယ်။
ဒါ့အပြင် ဒီနေ့မနက် ၁၀ နာရီခွဲမှာ သာယာဝတီမြို့နယ်၊ သုံးဆယ်မြို့၊ ဖိုးခေါင်လမ်းမ၊ စိန်သဇင် စက်သုံးဆီအရောင်းဆိုင် အနီးမှာ စစ်တပ်လက်ပါးစေ ရဲကား ၂ စီးကို သာယာဝတီ ဂဠုန်တပ်ဖွဲ့က မိုင်းဆွဲတိုက်ခိုက်ခဲ့တယ်လို့ Bago Region PDF သတင်းပြန်ကြားရေးအဖွဲ့က ပြောပါတယ်။
အဲဒီတိုက်ခိုက်မှုမှာ ရဲကား ၁ စီးနဲ့ ရဲတပ်ဖွဲ့ဝင်တွေ ထိခိုက်မှုရှိခဲ့ပြီး အသေးစိတ် အခြေအနေတွေကို ထပ်မံ အတည်ပြု စုံစမ်းလျက်ရှိတယ်လို့ သိရပါတယ်။
ဒီရဲကား ၂ စီးဟာ ဆိုင်ကယ်စီး ပြည်သူတွေကို ခြိမ်းခြောက် စစ်ဆေးဖမ်းဆီး ဆက်ကြေးကောက်ယူပြီး အပြန်မှာ မိုင်းဆွဲခံခဲ့ရတာဖြစ်ပြီး တော်လှန်ရေးရဲဘော်တွေ ဘေးအန္တရာယ်မရှိဘဲ ဆုတ်ခွာနိုင်ခဲ့တယ်လို့ သိရပါတယ်။