မဲခေါင်၊ ဩဂုတ် ၁၈
ကချင်ပြည်နယ်၊ ဗန်းမော်ခရိုင်၊ ရွှေကူမြို့နယ်၊ နောင်မိုကျေးရွာအုပ်စု၊ ဇင်းဘုံရွာအနီးမှာ စစ်ကောင်စီနဲ့ KIA၊ PDF ပူးပေါင်း တပ်ဖွဲ့တို့ ဩဂုတ်လ ၁၆ နဲ့ ၁၇ ရက်နေ့ ၂ ရက် ဆက်တိုက် တိုက်ပွဲ ပြင်းထန်နေတယ်လို့ ဒေသခံတွေနဲ့ KIA ရှေ့တန်း သတင်းရင်းမြစ်တွေထံက သိရပါတယ်။
မန္တလေးကနေ ဗန်းမော်ဘက် ဆန်တက်လာတဲ့ စစ်သေင်္ဘာ ၉ စီးကို ဩဂုတ် ၁၆ ရက်နေ့က KIA တပ်ရင်း (၅)၊ တပ်ရင်း (၁၂)၊ PDF တို့ ကြားဖြတ် တိုက်ပွဲရာက တိုက်ပွဲ ပြင်းထန်ခဲ့ပြီး ၁၀၇ မမ နဲ့ ပစ်ခတ်ရာ သင်္ဘော တစ်စီး ထိမှန်တယ်လို့ KIA ရှေ့တန်း သတင်းရင်းမြစ် တစ်ဦးက ပြောပါတယ်။
“ မနေ့က ဇင်းဘုံကနေ လှုပ်ရှား ထွက်ခွာလာတဲ့ စစ်ကောင်စီ အဖွဲ့နဲ့ KIA တပ်ရင်း (၁၂) နဲ့ PDF ပူးပေါင်း အဖွဲ့တို့ ပြင်းပြင်းထန်ထန် တိုက်ပွဲဖြစ်တယ်။ အောက်ဘက်က ဆန်တက်လာတဲ့ စစ်ကောင်စီ သင်္ဘောတွေ စင်းခန်းမှာ နားနေသေးတယ်” လို့ သူက ပြောပါတယ်။
တိုက်ခိုက်မှုကြောင့် သင်္ဘောက စစ်ကောင်စီ အရာရှိ တစ်ဦးနဲ့ စစ်သား ၁၀ ဦးခန့် ထိခိုက် သေဆုံးသွားလို့ ဩဂုတ်လ ၁၆ ရက်နေ့၊ ညနေ ၅ နာရီနဲ့ ၈ နာရီ ကြားမှာ သင်္ဘောမှာ ချည်ထားတဲ့ တာယာတွေ ဖြုတ်ပြီး အလောင်းတွေ မီးရှို့ခဲတယ်လို့ အမည်မဖော်လိုသူ မျက်မြင် တစ်ဦးက ပြောပါတယ်။
“ မြစ်ကျဉ်း တစ်လျှောက် ဂျက်ဖိုက်တာနဲ့ လုံခြုံရေး ယူပေးနေတာ။ တစ်နေ့ ညနေ ၄ နာရီကျော်ခန့်က စင်းခန်း တံတားကို အကာအကွယ်ယူပြီး ပစ်ထိသွားတဲ့ သင်္ဘော ၂ စီးကို အဲဒီ တံတားအောက်မှာ ပြင်နေတယ်” လို့ သူက ပြောပါတယ်။
ကျည်ထိမှန်သွားတဲ့ သင်္ဘော ၂ စီးနဲ့ ထိခိုက်ဒဏ်ရာရသွားတဲ့ စစ်ကောင်စီ တပ်သား ၂၀ ခန့်ကိုတော့ စင်းခန်း နားမှာ ဆေးကုသနေပြီး သင်္ဘောကို ပြုပြင်နေကာ ဒီကနေ့ ဩဂုတ်လ ၁၈ ရက် မနက်မှာ ပြန်ထွက်ခွာမယ်လို့ သိရတယ်လို့ ဆိုပါတယ်။
“ မနေ့က စခ သင်္ဘောတွေ ဆန်တက်လာတဲ့နောက် ဧရာဝတီ မြစ်နား ရွှေကူ နဲ့ စင်းခန်း ကြားက ဇင်းဘုံရွာဘက် စစ်ကောင်စီတွေ ဝင်လာပြီး တစ်ရွာလုံးကို မီးရှို့သွားတယ်လို့ ကြားရတယ်” လို့ ဒေသခံ တစ်ဦးက ပြောပါတယ်။
ဒီနေ့မနက် ၇ နာရီဝန်းကျင်က ဗန်းမော် ခမရ (၄၇) စစ်ကောင်စီတပ်က ဗန်းမော် အနီး ဧရာဝတီမြစ်ကြောင်း တစ်လျှောက်က ရွာတွေဘက် လက်နက်ကြီးနဲ့ ပစ်ခတ်နေလို့ မြစ်ကြောင်း တစ်လျှောက်က ဒေသခံ ပြည်သူတွေ ဘေးလွတ်ရာ ရှောင်နေရတယ်လို့ သူက ရှင်းပြပါတယ်။
စစ်သင်္ဘောတွေကို လုံခြုံရေးပေးဖို့ စစ်ကောင်စီတပ်က ဇင်းဘုံရွာကို ဩဂုတ်လ ၁၁ ရက်နေ့ ကတည်းက ရောက်ရှိနေပြီး ဩဂုတ် ၁၆ ရက်နေ့က ရွှေကူကနေ ဗန်းမော်ဘက် ဆန်တက်လာတဲ့ ထောက်ပို့ စစ်သင်္ဘော တွေကို KIA နဲ့ PDF ပူးပေါင်းအဖွဲ့ ကြားဖြတ် တိုက်ခိုက်ရာက တိုက်ပွဲပြင်းထန်ခဲ့တာဖြစ်ကြောင်း KIA ရှေ့တန်းသတင်း ရင်းမြစ်တွေက ပြောပါတယ်။
CJ-008
#MeKongNews
#ရွှေကူ_စင်းခန်း
#KIA_PDF
ဧရာဝတီမြစ်