မဲခေါင်၊ ဇူလိုင် ၂၆
ရှမ်းပြည်နယ် တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသ၊ ရွာငံမြို့နယ်၊ သိမ်ကုန်းကျေးရွာအုပ်စု၊ အင်းကြီးကျေးရွာ ဘုန်းကြီးကျောင်းမှာ စစ်ကောင်စီနဲ့ လက်အောက်ခံ ဌာနဆိုင်ရာတွေက ရွာသားတွေကို ခြိမ်းခြောက် ခေါ်ယူကာ အစည်းအဝေး ပြုလုပ်ခဲ့တယ်လို့ ဒေသခံတွေက ပြောပါတယ်။
အဲဒီ အစည်းအဝေးကို ဇူလိုင်လ ၂၄ ရက်နေ့က ပြုလုပ်ခဲ့တာဖြစ်ပြီး PDF နဲ့ ဒေသတွင်း တော်လှန်ရေး တက်ကြွ လှုပ်ရှားသူတွေကို သိရှိပါက သတင်းပေးကြဖို့ ကျေးရွာနေ ပြည်သူတွေကို ဟောပြောခဲ့တယ်လို့ ဆိုပါတယ်။
“ စကစ သွေးရူးသွေးတန်း လျှောက်လုပ်နေတာပေါ့ဗျာ။ ကျွန်တော်တို့ရွာမှာ PDF မှ မရှိတာ။ မရှိတာကို ကျွန်တော်တို့က ဘယ်လို သတင်းသွားပေးရမှာလဲ။ တစ်ခြားရွာက PDF တွေ သတင်းပေးရင်လည်း ဒလန်ဆိုပြီး ပစ်သတ်ခံရဦးမယ်။ သူတို့ကိုယ် သူတို့တောင်မှ မကာကွယ်နိုင်တာ။ ကျွန်တော်တို့က ဘာသွားယုံရမလဲ” လို့ အင်းကြီးကျေးရွာသား တစ်ဦးက ပြောပါတယ်။
အစည်းအဝေးကို ရွာပေါင်း ၆ ရွာက ရွာသူ ရွားသားများ မဖြစ်မနေတက်ရောက်ဖို့ ခြိမ်းခြောက်ခံရပြီး တက်ရောက်သူ ၁၀၀ ခန့်ရှိကာ စစ်ကြောင်းကြီး ၅ ကြောင်းနဲ့ ဒေသခံ တွေ့ဆုံပွဲ ဆိုပြီး အမည်တပ် ပြုလုပ်ခဲ့တယ်လို့ ဆိုပါတယ်။
ဟောပြောသူတွေထဲမှာ စစ်ကောင်စီတပ်သားတွေ၊ ဌာနဆိုင်ရာ အရာရှိတွေ၊ ပျူစောထီးတွေ ပါဝင်ပြီး တော်လှန်ရေး လှုပ်ရှားမှုတွေကို သတင်းပေးမယ် ဆိုပါက သတင်းပေးသူကို လုံခြုံရေးအရ လျှို့ဝှက်ထားမယ်လို့ ပြောဆိုခဲ့ပါတယ်။
အဲဒီနေ့က အစည်းအဝေး ပြုလုပ်တဲ့ ဘုန်းကြီးကျောင်း အပြင်ဘက်မှာ စစ်ကောင်စီတပ်သားတွေ လုံခြုံရေး ယူပေးထားတယ်လို့ အစည်းအဝေး တက်ရောက်ခဲ့သူတွေက ပြောပါတယ်။
ပြီးခဲ့တဲ့ ၂၀၂၂ ခုနှစ်၊ စက်တင်ဘာလကလည်း ရွာငံမြို့နယ်၊ တက်တောင်ကျေးရွာက ပျူစောထီး အယောက် ၄၀ ကို စစ်ကောင်စီက စစ်သင်တန်းပေးပြီး လက်နက် တပ်ဆင်ပေးခဲ့ပါသေးတယ်။
CJ-011
#MekongNews
#ဓနုကိုယ်ပိုင် အုပ်ချုပ်ခွင့်ရဒေသ
#ပျူစောထီး
