မဲခေါင်၊ မတ် ၂၃
စစ်ကိုင်းတိုင်း၊ မုံရွာမြို့မှာ မင်းအောင်လှိုင် ပါတယ်လို့ ယူဆရတဲ့ စစ်ယာဉ်တန်းကို ဒေသခံ ကာကွယ်ရေး တပ်ဖွဲ့တွေက မတ်လ ၂၀ ရက်က မိုင်းဆွဲ တိုက်ခိုက်ရာ ရဲမှူးချုပ် အပါအဝင် ၄ ဦး သေတယ်ဆိုတဲ့ သတင်းဟာ မှားယွင်းနေတယ်လို့ မုံရွာမြို့ခံတွေက ပြောပါတယ်။
မုံရွာမြို့၊ ရန်ကင်းကျောင်းတိုက်ကို လာတဲ့ စစ်ကောင်စီ ယာဉ်တန်းကို မိုင်းဆွဲ တိုက်ခိုက်ရာ ရဲမှူးချုပ် အပါအဝင် ၄ ဦးသေတယ်လို့ ပြည်သူ့ကာကွယ်ရေးတပ်ဖွဲ့ တစ်ဖွဲ့က ထုတ်ပြန်ခဲ့ပေမဲ့ အဲဒီလိုဖြစ်စဉ် မုံရွာမှာ မဖြစ်ခဲ့ဘူးလို့ ယုံကြည်စိတ်ချရတဲ့ ဒေသခံ သတင်းရင်းမြစ် တစ်ဦးက ပြောပါတယ်။
“ရဲမှူးချုပ် မိုင်းထိပြီး သေတယ်ဆိုတဲ့ ဖြစ်စဉ် မုံရွာမှာ မဖြစ်ခဲ့ပါဘူး။ ပေါက်ကွဲမှု တစ်ချို့တော့ ရှိပါတယ်’’ လို့ သူက ဆိုပါတယ်။
နောက်ထပ် မုံရွာမြို့ခံတစ်ဦးကလည်း မီဒီယာ တစ်ခုမှာ ဖော်ပြထားတဲ့ ဒီသတင်းနဲ့ ပတ်သက်ပြီး လိုက်လံ စုံစမ်းပေမဲ့ ဒေသခံတွေ မသိကြဘူးလို့ မဲခေါင်သတင်းကို ပြောပါတယ်။
“တပ်နား ပတ်ဝန်းကျင်တော့ ပြောသံ မကြားမိဘူး ညီလေးရ။ အကိုတို့ ရွာက တပ်နဲ့ နီးတယ်။ အကို့ အသိတစ်ယောက် ဆိုရင် အရင်က ဒီလို သတင်းတွေ သိပ်ပြောတာ။ အခု သူလည်း မသိဘူးလို့ ပြောတယ်။ အကိုလည်း မကြားကို မကြားမိတာ’’ လို့ သူကဆိုပါတယ်။
အခုရက်ပိုင်း မုံရွာတပ်တွင်းနဲ့ ရဲအသိုင်းအဝိုင်းမှာလည်း ထူးထူးခြားခြား ဘာမှ မကြားရဘူးလို့ နီးစပ်တဲ့ သတင်းရင်းမြစ် တစ်ချို့က ဆိုပါတယ်။
စစ်ခေါင်းဆောင် မင်းအောင်လှိုင် ရောက်နေလို့ မုံရွာမြို့မှာ စစ်ဆေးရေးတွေ တင်းကြပ်နေပြီး မုံရွာ-အရာတော် လမ်းပိုင်းနဲ့ ကျောက္က-ဗောဓိတစ်ထောင် လမ်းပိုင်းတွေမှာ စစ်ကောင်စီတပ်တွေ စစ်ကြောင်းထိုးနေတာကြောင့် ပြည်သူတွေ သတိထား သွားလာကြဖို့ ပြည်သူ့ကာကွယ်ရေးတပ်ဖွဲ့တွေက သတိပေးထားပါတယ်။
MK-007
#MeKongNews
#မုံရွာ
#မင်းအောင်လှိုင်
#ရဲမှူးချုပ်