မဲခေါင်၊ ဇန်နဝါရီ ၁၈
ရေတာရှည်မှာ စစ်ကြောင်းထိုးလာတဲ့ စစ်ကောင်စီတပ်နဲ့ PDF တွေ တိုက်ပွဲ ၃ ကြိမ်ဖြစ်ပွားပြီး စစ်တပ် အရာရှိ ၃ ဦး အပါအဝင် ၄၀ ဦးကျော် သေဆုံးတယ်လို့ Bago Region PDF က ဒီကနေ့ ထုတ်ပြန်ပါတယ်။
ပဲခူးတိုင်း၊ တောင်ငူခရိုင်၊ ရေတာရှည်မြို့နယ်အတွင်း စစ်ကြောင်းထိုး ချီတက်လာတဲ့ စစ်ကောင်စီတပ်တွေနဲ့ တောင်ငူခရိုင် PDF တပ်ရင်း (၃၅၀၁) တပ်ခွဲ (၄) နဲ့ ပူးပေါင်းအဖွဲ့တို့ တိုက်ပွဲ ၃ ကြိမ် ဖြစ်ပွားရာမှာ စစ်ကောင်စီဘက်မှ အရာရှိ ၃ ဦး အပါအဝင် ၄၀ ဦးကျော် သေဆုံးပြီး အများအပြား ဒဏ်ရာ ရရှိခဲ့တာပါ။
ဇန်နဝါရီ ၁၆ ရက် ည ၆ နာရီမှာ အင်အား ၁၀၀ ဝန်းကျင်ရှိ စစ်ကောင်စီတပ်ဖွဲ့ နဂျပ်တောင်သို့ ချဉ်းကပ်လာရာ မိုင်းဆွဲတိုက်ခိုက်ခဲ့တာကြောင့် စစ်ကောင်စီဘက်မှ ၂ ဦးထက်မနည်း သေဆုံးပြီး ၆ ဦး ဒဏ်ရာ ပြင်းထန်ကာ တပ်ပြန်ဆုတ်သွားတယ်လို့ သိရပါတယ်။
မနေ့က မနက် ၅ နာရီခန့်မှာ ထပ်မံစစ်ကြောင်းထိုးလာတဲ့ စစ်ကောင်စီတပ်ဖွဲ့ တွေကိုနဂျပ် အရှေ့မြောက်ဖက် ဝက်ပုပ်လမ်း အတက်မှာ တိုက်မိုင်းဆွဲ တိုက်ခိုက်ခဲ့ပြီး ပထမ အကြိမ် မိနစ် ၂၀ ခန့် တိုက်ပွဲ ဖြစ်ပွားခဲ့တယ်လို့ ဆိုပါတယ်။
မနက် ၁၀ နာရီ ဝန်းကျင်မှာ နဂျပ် အရှေ့မြောက်ဖက် ဝက်ပုပ်လမ်းမှာ ထပ်မံတပ်ဖြန့်ပြီးတက်လာတဲ့ အင်အား ၁၅၀ ကျော်ပါ စစ်ကောင်စီစစ်ကြောင်းကို ပူးပေါင်းတပ်ဖွဲ့က ထပ်မံတိုက်ခိုက်ခဲ့ရာမှာ တိုက်ပွဲ မိနစ် ၃၀ ကျော် ကြာမြင့်ခဲ့တယ်လို့ သိရပါတယ်။
နေ့လယ် ၁၂ နာရီ ဝန်းကျင်မှာ နဂျပ်-ကွင်းချောင်းလမ်း ကျောက်ပုံကုန်းမှာ အင်အားထပ်ဖြည့်ပြီး ရှေ့တိုးလာတဲ့ စစ်ကောင်စီတပ်ဖွဲ့နဲ့ ကိုက် ၅၀ စည်းအတွင်း တတိယအကြိမ် တိုက်ပွဲဖြစ်ပွားခဲ့ရာ ၁ နာရီခွဲခန့် ကြာမြင့်ခဲ့တယ်လို့ သိရပါတယ်။
တိုက်ပွဲ ၃ ကြိမ်အနက် ပထမ ၂ ကြိမ်ကို PDF တပ်ရင်း (၃၅၀၁)၊ တပ်ခွဲ (၄) တပ်စု (၂) (၃) တို့က တိုက်ခိုက်ခဲ့ပြီး တတိယအကြိမ် တိုက်ပွဲကို မဟာမိတ် တပ်ပေါင်းစုနဲ့ ပူးပေါင်းတိုက်ခိုက်ခဲ့တယ်လို့ Bago Region PDF က ဆိုပါတယ်။
အဲဒီ တိုက်ပွဲတွေမှာ စစ်ကောင်စီ အရာရှိ ၃ ဦး အပါအဝင် ၄၀ ဦးကျော် သေဆုံးခဲ့ပြီး ထိခိုက်ဒဏ်ရာ အများအပြား ရရှိကာ သေဆုံး ဒဏ်ရာရ သူတွေကို အခုအချိန်ထိ ကားတွေနဲ့ သယ်ထုတ်နေဆဲဖြစ်တယ်လို့ သိရပါတယ်။
တိုက်ပွဲတွေအတွင်း အထူးဒေသ ခွဲ (၃) မှ တော်လှန်ရေးတပ်ဖွဲ့ဝင် တစ်ဦး မြင့်မြတ်စွာ အသက် ပေးလှူခဲ့ရပြီး တပ်ဖွဲ့ဝင် တစ်ဦး ဒဏ်ရာရရှိကာ တပ်ခွဲ (၄) တော်လှန်ရေးတပ်ဖွဲ့ဝင်တွေ အထိအခိုက် မရှိခဲ့ဘူးလို့ ဆိုပါတယ်။
ရန်သူ့ဘက်မှ ထိခိုက်သေဆုံးမှု များပြားစွာနဲ့ ထွက်ပြေးရာမှ ကျကျန်ခဲ့တဲ့ ကျောပိုးအိတ် ၂ လုံးကို စစ်ဆေးခဲ့ရာ အမြောက်တပ် ဘတ်တံဆိပ် ဖြစ်တာကို အတည်ပြုနိုင်ခဲ့တယ်လို့ သိရပါတယ်။
လက်ရှိ အဲဒီဒေသမှာ စစ်ဆိုင်ထားဆဲ အခြေအနေဖြစ်ပြီး ပြည်သူတွေ အနေနဲ့ စစ်ကောင်စီတပ်ဖွဲ့တွေနဲ့ အဝေးဆုံး နေရာတွေမှာ နေထိုင်ကြဖို့ Bago Region PDF က အသိပေးထားပါတယ်။
MK-003