မဲခေါင်၊ ဇန်နဝါရီ ၂၀
ရန်ကုန်တိုင်း၊ ကမာရွတ်မြို့နယ်၊ (၁၀) ရပ်ကွက်မှာ ဖွင့်လှစ်ထားတဲ့ အမျိုးသား စည်းလုံးညီညွတ်ရေးနဲ့ ငြိမ်းချမ်းရေး ဖော်ဆောင်မှု ဗဟိုဌာန-NSPC ရုံး လက်ပစ်ဗုံး ၂ လုံးနဲ့ တိုက်ခိုက် ခံခဲ့ရပါတယ်။
ဒီကနေ့ ဇန်နဝါရီ ၂၀ ရက် နေ့လယ် ၁ နာရီကျော်က ဦးဝိစာရလမ်း ဘက်မှ ဗုံးနဲ့ ပစ်ပေါက်ခံခဲ့ရတာ ဖြစ်ပြီး ရုံးအတွင်း ရပ်ထားတဲ့ ကားတွေ ဗုံးစ ထိမှန်ခဲ့တယ်လို့ ဒေသခံ တစ်ဦးက ပြာပါတယ်။
“ ဗုံးပေါက်သံကြားပြီး သိပ်မကြာဘူး သေနတ်သံတွေလည်း ကြားတယ်။ သူတို့က လာဖောက်တဲ့ သူတွေက ကားနဲ့ လာပစ်ပြီး ပြေးသွားလို့ လိုက်ရှာနေကြတာ။ ဘာသတင်းတွေ ထပ်ကြားလို့လဲတော့ မသိဘူး၊ ဒဂုန်စင်တာ မှာတော့ အကုန်လုံးကို ရှာပြီး စစ်နေကြတယ်” လို့ မျက်မြင်တွေ့သူ တစ်ဦးက ပြောပါတယ်။
ဗုံး ၂ လုံးအနက် တစ်လုံးသာ ပေါက်ကွဲခဲ့ပြီး ကျန်တစ်လုံးကို စစ်ကောင်စီတပ်တွေ ရောက်လာပြီး ဖောက်ခွဲခဲ့တယ်လို့ သူကပြောပါတယ်။
လက်ရှိအချိန်ထိ ဒဂုန်စင်တာ ကုန်တိုက် ကားဝန်း အတွင်းမှာ စစ်ကောင်စီတပ်သားတွေ ကင်းပုန်း ဝတ်နေပြီး အရပ်ဝတ်နဲ့ လက်နက် ကိုင်ဆောင်ထားသူတွေလည်း စောင့်ကြည့်နေတယ်လို့ မျက်မြင်တွေ့သူက ပြောပါတယ်။
MK-005