စစ်ကောင်စီ လက်အောက်ခံ ရန်ကုန် အရှေ့ပိုင်းခရိုင် တရားရုံးက ဒီဇင်ဘာ ၂၆ ရက်မှာ ပြစ်ဒဏ်တွေ ချမှတ်ခဲ့တာ ဖြစ်ပါတယ်။
ရန်ကုန်အရှေ့ပိုင်း တက္ကသိုလ် ကျောင်းသားများ သမဂ္ဂ မြေပြင် သပိတ်ကော်မတီ တာဝန်ခံ ကိုကောင်းခန့်နိုင် (စတုတ္ထနှစ်၊ ကုန်ထုတ်ဓာတုဗေဒ) အပါအဝင် ကိုသီဟအောင် (အဝေးသင်ဥပဒေ၊ ဒုတိယနှစ်) ၊ ကိုဟိန်းထက်ဇော် (အဝေးသင် မြန်မာစာ၊ ဒုတိယနှစ်)နဲ့ ကိုဖြိုးကောင်းထိုက် တို့ကို အကြမ်းဖက်မှု တိုက်ဖျက်ရေး ဥပဒေ ပုဒ်မ ၅၀-က (ဈ)၊ ၅၁-ဂ၊ ပြည်သူပိုင် ပစ္စည်း ကာကွယ်ရေး ဥပဒေပုဒ်မ ၆-၁၊ ရာဇသတ်ကြီး ပုဒ်မ ၃၀၇-၃၄၊ ၃၃၂ -၃၃ တို့နဲ့ ထောင်ဒဏ် ၂၆ နှစ် ချမှတ်ခဲ့တာလို့ EYUSU က ထုတ်ပြန်ပါတယ်။
ဒါ့အပြင် ကိုအေးမင်းထိုက် (အဝေးသင်ဓာတုဗေဒ၊ တတိယနှစ်) ကို ပြည်သူပိုင် ပစ္စည်း ကာကွယ်ရေး ဥပဒေ ပုဒ်မ ၆-၁ ၊ ရာဇသတ်ကြီး ပုဒ်မ ၃၀၇-၃၄၊ ၃၃၂- ၃၃ တို့နဲ့ ထောင်ဒဏ် ၅ နှစ်၊ အမှုတွဲ ကိုကျော်ကျော်နိုင် ကို ထောင်ဒဏ် ၄ နှစ် ချမှတ်ခဲ့တယ်လို့ EYUSU ကဆိုပါတယ်။
အဲဒီ ကျောင်းသားလူငယ်တွေကို အကြမ်းဖက်မှု တိုက်ဖျက်ရေး ဥပဒေ ပုဒ်မ ၅၀-ဈ/၅၄ နဲ့လည်း တရားစွဲဆိုထားပြီး လာမယ့် ၂၀၂၃ ခုနှစ်၊ ဖေဖော်ဝါရီလမှာ အပြီးသတ်အမိန့် ချမှတ်သွားမှာ ဖြစ်တယ်လို့လည်း သိရပါတယ်။
စစ်ကောင်စီရဲ့ မတရား ဖမ်းဆီး ခံထားရသူတွေထဲမှာ ရန်ကုန် အရှေ့ပိုင်း တက္ကသိုလ်က ကျောင်းသား ၁၅ ဦးရှိရာ ၁၂ ဦးဟာ ထောင်ဒဏ်အသီးသီး မတရားချမှတ်ခံထားရတာ ဖြစ်ပါတယ်။
