ဒီကနေ့ ဇန်နဝါရီ ၄ ရက်မှာ (၇၅) နှစ်ပြည့် စိန်ရတု လွတ်လပ်ရေးနေ့ စည်ကားစွာ ကျင်းပနိုင်ဖို့ အတွက် စစ်ကောင်စီက ရပ်ကွက် အုပ်ချုပ်ရေးတွေကို ဖိအားပေး ခိုင်းစေထား ပေမယ့် ရပ်ကွက်အချို့ရှိ လမ်းများမှာသာ ကစားပွဲ အနည်းငယ် ပြုလုပ်နေတာ တွေ့ရတယ်လို့ လှိုင်မြို့နယ်မှာ နေထိုင်သူ တစ်ဦးက ပြောပါတယ်။
လှိုင်ထဲမှာတော့ (၁) ရပ်ကွက်မှာဆို အောင်မေတ္တာ (၄) လမ်းမှာ လမ်းပိတ်ပြီး ကစားတယ်။ (၂) ရပ်ကွက် လှိုင်မြစ်လမ်းပေါ်က ပန်းလှ လက်ဖက်ရည်ဆိုင်အနားမှာ ကစားတယ်။ (၆) ရပ်ကွက်မှာ ပိတောက်ရွှေဝါလမ်းနဲ့ (၁၅) ရပ်ကွက်ကတော့ အမှတ် (၈) သစ်စက်ဝန်း လိုင်းမှာ ကစားတာပဲ ရှိတယ်။ အရင်ဆိုရင်တော့ လှိုင်တစ်မြို့နယ်လုံး ဆော့ကြတာ။ ခုတော့ ဒလန်များတဲ့ ရပ်ကွက်တွေ ဆော့တာလေ
လို့ သူကပြောပါတယ်။
လှိုင်သာယာမြို့နယ် (၉) ရပ်ကွက်မှာတော့ ရပ်ကွက်အုပ်ချုပ်ရေးမှူး ကိုယ်တိုင် ဦးဆောင်ပြီး လိုင်းခန်းနဲ့ အဆောင်နေသူတွေကို နိုင်ငံတော် အလံတစ်ခု ၅ ထောင်ကျပ်နဲ့ မဝယ်မနေရ ရောင်းချနေတယ်လို့ ရပ်ကွက်နေ ပြည်သူ တစ်ဦးက ပြောပါတယ်။
မြောက်ဥက္ကလာ (ဌ) ရပ်ကွက်၊ ပုလဲ (၃) လမ်းမှာ ဘောလုံးပွဲ လုပ်နေတယ်။ ဒလန်စိုးစိုး နေရာ ဝင်လုပ်တဲ့ ကောင်က အတော်ဆိုးတယ်။ တစ်အိမ် အနည်းဆုံး ၅ ထောင် ကောက်နေတာ။ တစ်ထောင် နှစ်ထောင်ဆို လွှင့်ပစ်ပြီး အော်ကြီးဟစ်ကျယ်လုပ်တာ။ ဒီကွင်းထဲမှာ ပွဲမလုပ်ဖူးပါဘူး။ သူတို့ကြမှ ပွဲဈေးတွေလုပ် ဈေးကောက်တွေ ကောက်ပြီး လုပ်ချင်တိုင်း ခွေးတွေနဲ့ပေါင်းပြီး လုပ်နေတာ
လို့ ရပ်ကွက်နေ ပြည်သူတစ်ဦးက ပြောပါတယ်။
ဒီကနေ့ ရန်ကုန်မြို့လယ်ကောင်မှာလည်း ကစားပွဲတွေ ပြုလုပ်တာ မရှိသလို နိုင်ငံတော် အလံ ထောင်ထားတဲ့ တိုက်ခန်းတွေလည်း မရှိသလောက် ရှားပါပြီး တစ်မြို့လုံး တိတ်ဆိတ် ခြောက်ကပ်နေတယ်လို့ ဒေသခံတွေက ပြောပါတယ်။
