မဲခေါင်၊ ဇန်နဝါရီ ၁၆
ရန်ကုန်မှာ စစ်ကောင်စီ ကျင်းပဖို့ ပြင်ဆင်နေတဲ့ ရွေးကောက်ပွဲ အတွက် မဲစာရင်းတွေကို Non CDM ဆရာ၊ ဆရာမတွေ ဦးဆောင် ကောက်ယူပေးနေရလို့ စာသင်ကျောင်း တချို့ ပိတ်ထားရတယ်လို့ Non CDM ဆရာ၊ ဆရာမတွေထံမှ သိရပါတယ်။
မဲစာရင်း ကောက်ဖို့အတွက် ပြီးခဲ့တဲ့ ဇန်နဝါရီ ၉ ရက်ကစပြီး လှိုင်မြို့နယ် အမှတ်(၁၄) ရပ်ကွက်မှာရှိတဲ့ အခြေခံပညာ မူလတန်းလွန်ကျောင်းနဲ့ (၉) ရပ်ကွက်က အမှတ် (၁၉) မူလတန်းလွန်ကျောင်း အပါအဝင် ကျောင်းပေါင်း ၅ ကျောင်း ပိတ်ထားရတယ်လို့ ဒေသခံတွေက ပြောပါတယ်။
“ ကျောင်းကတော့ တစ်ပတ်ပိတ်မယ် ပြောတယ်။ သင်ကြားမယ့် ဆရာ၊ ဆရာမတွေ အင်အား မလုံ လောက်တာတွေလည်း ရှိတယ်။ သူတို့တွေ လူဦးရေ စာရင်း ကောက်ယူတာနဲ့ အလုပ်ရှုပ်နေတော့ ကျောင်းမှာ စာမသင်နိုင်ဘူး” လို့ လှိုင်မြို့နယ်မှ ကျောင်းသား မိဘ တစ်ဦးက ပြောပါတယ်။
ဇန်နဝါရီ ၁၀ ရက် မနက်ပိုင်းက လှိုင်မြို့နယ်ရှိ ရပ်ကွက် (၁)၊ (၂)၊ (၃)၊ (၅)၊ (၁၁)၊ (၁၃)၊ (၁၆) တွေမှာ စစ်ကောင်စီက မဲစာရင်းတွေ ကောက်ခံခဲ့ပြီး နောက်ရက် ၁၁ ရက်မှာတော့ ရပ်ကွက် (၂)၊ (၇)၊ (၉) နဲ့ ဇန်နဝါရီလ ၁၃ ရက်မှာ ရပ်ကွက် (၂)၊ (၅)၊ (၆)၊ (၉)၊ (၁၅)၊ (၁၆) တို့မှာ ထပ်မံ ကောက်ခံခဲ့တယ်လို့ သိရပါတယ်။
“မဲစာရင်း ကောက်ယူတာအပြင် ရပ်ကွက်တချို့မှာ ညဘက် ဧည့်စာရင်း ရှောင်တခင် ဝင်စစ်ဆေး နေတာလည်း လုပ်တယ်။ အိမ်မှာ လူမရှိရင် မရှိတဲ့ လူတွေရဲ့ စာရင်းပါ ပေးရမယ်ဆိုပြီးတော့ လမ်းမှူးက လာပြောတယ်။ သူတို့က လမ်းထဲက လူတွေ ဘယ်သူတွေ ရှိတယ်ဆိုတာ အချက်အလက်တွေ ရှိပြီးသား။ အဲ့ဒါကို လိမ်ပြီးပြောရင် နင်တို့ ဒုက္ခရောက်မယ်ဆိုပြီး ပြောသွားတယ်” လို့ လှိုင်မြို့နယ် ရပ်ကွက်တစ်ခုမှာ နေထိုင်သူ တစ်ဉီးက ပြောပါတယ်။
အခုလို မဲစာရင်း ကောက်ယူရာမှာ စစ်ကောင်စီ တပ်သား၊ ရဲ၊ ထွေအုပ်ဝန်ထမ်းနဲ့ Non-CDM ဆရာ ဆရာမတွေ ပါဝင်ပြီး လကုန်ရက်အထိ ကောက်ခံမယ်လို့ သိရပါတယ်။
စစ်ကောင်စီဟာ အတုအယောင် ရွေးကောက်ပွဲ ပြုလုပ်ကာ ထွက်ပေါက်ရှာဖို့ ကြိုးစားနေပြီး လူဦးရေ စာရင်းကို အသုံးပြုကာ တော်လှန်ရေးသမားတွေနဲ့ CDM တွေကို ရှာဖွေဖို့ ကြိုးစားနေတဲ့ အတွက် ပြည်သူတွေ အနေနဲ့ ပူးပေါင်း ဆောင်ရွက်မှု မပြုကြဖို့ တော်လှန်ရေး အင်အားစုတွေက နှိုးဆော်ထားပါတယ်။
MK-010