မဲခေါင်၊ ဇူလိုင် ၁၉
ရန်ကုန်မြို့မှာ (၇၆) နှစ်မြောက် အာဇာနည်နေ့အထိမ်းအမှတ်အဖြစ် ဇူလိုင်လ ၁၈ ရက် ည ၇ နာရီ ကျော်က ရေဘဝဲနဲ့ မဟာမိတ်အဖွဲ့ အစည်းများ ညသပိတ်ချီတက်ခဲ့ရာမှာ ပါဝင်တဲ့ လူငယ်တွေကို စစ်ကောင်စီက လိုက်လံ ရှာဖွေနေတယ်လို့ သတင်းရရှိပါတယ်။
ရန်ကုန်မြို့ တရုတ်တန်းမှာ ရေဘဝဲနဲ့ မဟာမိတ် အဖွဲ့အစည်းများက ❝ လူမျိုးကြီးဝါဒတိုက်ဖျက်ကြ အာဇာနည်ဟာ(၉)ဦးမက ❞ စာသားပါ တပ်ဦးအလံတော်ကို ကိုင်စွဲကာ စစ်အာဏာရှင် ဆန့်ကျင်ရေး၊ လူမျိုးကြီးဝါဒ တိုက်ဖျက်ရေး ပြောက်ကျား ညသပိတ် ချီတက် ခဲ့ကြတာ ဖြစ်ပါတယ်။
“ ကလေးတွေ ဆန္ဒပြပြီးတော့ခဏကြာတော့ရဲတွေရောက်လာတယ်။ ဆိုင်အချို့ကနေ CCTV မှတ်တမ်းတွေ တောင်းယူသွားတာရှိတယ်။ အိမ်စီးကားတစ်စီးနဲ့ ရဲခွေးတွေရောက်လာပြီး လမ်းပိတ်ထားလိုက်မယ်ဆိုပြီး ဆဲဆိုပြီးထွက်သွားကြတာ။ ဈေးသည်တစ်ချို့ကိုလည်း မဖမ်းထားလို့ဆိုပြီး ဆဲနေတာတွေ့တယ်” လို့ မျက်မြင်တွေ့သူ တစ်ဦးက ပြောပါတယ်။
လသာမြို့နယ်၊ အမှတ် (၃)ရပ်ကွက်၊ မဟာဗန္ဓုလလမ်းနဲ့ စဉ့်အိုးတန်းလမ်းထိပ်မှာ လူငယ် ၇ ဦးက ဆန္ဒဖော်ထုတ်ခဲ့တာဖြစ်ပြီး လသာမြို့နယ် ရဲတပ်ဖွဲ့က အဆိုပါနေရာသို့ လာရောက်စစ်ဆေးခဲ့ကာ ဆန္ဒပြလူငယ်များ ထားခဲ့တဲ့ လမ်းလယ်ကျွန်းပေါ်က အနီရောင် ပိတ်စတစ်ခုနဲ့ မီးတုတ် ၃ ခု သိမ်းဆည်းယူဆောင်သွားတယ်လို့ သိရပါတယ်။
အဆိုပါသပိတ်ကို ရေဘဝဲ (ပြည်သူ့အကျိုးပြု လူငယ်အဖွဲအစည်း)မှ ဦးဆောင်ကာ ပြည်သူ လူထုနဲ့အတူ Youth Association Of Thingangyun (YAT)၊ အခြေခံပညာကျောင်းသားလူငယ်များ အစည်းအရုံး(အကလ- မြေပြင်)၊ Labour Alliance အဖွဲဝင် (CTUM) ၊ စမ်းချောင်းပင်မ သပိတ်စစ်ကြောင်းတိုပေါင်းဆုံပြီး Revolution Force (RF) ရဲ့ မြေပြင်ကင်း ထောက်ပံ့ပိုးမှု နဲ့လူထုသပိတ်တိုက်ပွဲ ဆင်နွှဲခဲ့ကြတာပါ။
MK-005
#MekongNews
#ရန်ကုန်မြို့
#အာဇာနည်
#ညသပိတ်
