ဆင်အင်းကြီးကျေးရွာမှ ဒေသခံ ၁၀ ဦးကို သတ်ဖြတ်ခဲ့တာဟာ ပုဏ္ဏားကျွန်း အခြေစိုက် ခြေမြန်တပ်ရင်း (၅၅၀) နဲ့ စစ်တွေမြို့၊ ပါဒလိပ် အခြေစိုက် ခြေမြန်တပ်ရင်း (၃၄၄) တို့ဖြစ်တယ်လို့ လူ့အခွင့်အရေးဆိုင်ရာဝန်ကြီးဌာနက ဖော်ပြပါတယ်။
အဲဒီ စစ်ကောင်စီ တပ်ရင်း ၂ ခုဟာ ပြီးခဲ့တဲ့ နိုဝင်ဘာ ၁၀ ရက်မှာ ပုဏ္ဏားကျွန်းမြို့နယ်၊ ဆင်အင်းကြီးကျေးရွာထဲဝင်ရောက်ပြီး ပြည်သူ ၁၀ ဦးကို သတ်ဖြတ်ခဲ့သလို နေအိမ် ၇ လုံးကို မီးရှို့ခဲ့တာလို့ ဖော်ပြထားပါတယ်။
စစ်တပ်က ဆင်အင်းကြီးကျေးရွာကို တိုက်ခိုက်ရာမှာ လက်နက်ကြီးတွေနဲ့ ပစ်ခတ်ခဲ့သလို ရဟတ်ယာဉ်တွေ အသုံးပြုပြီး ပစ်ခတ်တာနဲ့ ဒရုန်းတွေ အသုံးပြု ပစ်ခတ်တာတွေ ပြုလုပ်ခဲ့တယ်လို့ ဖော်ပြထားပါတယ်။
စစ်တပ်က စစ်ကြောင်းထိုး ဝင်ရောက်ပြီးတော့ နေအိမ်တွေထဲ ပစ်ခတ်ခဲ့ရာ ဒေသခံပြည်သူ ၁၀ ဦးအထိ သေဆုံးခဲ့ပြီး တစ်ဦးရဲ့ ခန္ဓာကိုယ်ကိုတော့ အခုချိန်ထိ မတွေ့ရှိသေးဘူးလို့ ဖော်ပြထားပါတယ်။
သေဆုံးသူအချို့ရဲ့ ခန္ဓာကိုယ်မှာ ဓားဒဏ်ရာတွေ တွေ့ရှိရတာကြောင့် ညှဉ်းပမ်းနှိပ်စက်ခံရပြီးမှ သေဆုံးတာဖြစ်နိုင်တယ်လို့လည်း လူ့အခွင့်အရေးဆိုင်ရာဝန်ကြီးဌာနက သုံးသပ်ထားပါတယ်။
စစ်တပ်ဟာ အခုချိန်ထိ ဆင်အင်းကြီးကျေးရွာမှာ တပ်စွဲထားတဲ့အတွက် ဒေသခံ ရွာသားတွေအနေနဲ့ နီးစပ်ရာရွာတွေမှာ ထွက်ပြေးတိမ်းရှောင် ခိုလှုံနေရဆဲဖြစ်တယ်လို့လည်း သိရပါတယ်။