မဲခေါင်၊ မတ် ၁၉
စစ်ကိုင်း-ကနီ နယ်စပ်မှာ လက်နက်ကြီးတွေ ရမ်းကား ပစ်ခတ်နေတဲ့ စစ်ကောင်စီ စစ်ကြောင်းကို ပြည်သူတွေ သတိထားကြဖို့ ဝက်ပါ ပြောက်ကျားတပ်ဖွဲ့- WGPDF က ဒီကနေ့ သတိပေး လိုက်ပါတယ်။
ယင်းမာပင်မြို့နယ်၊ စုန်းချောင်းရွာကနေ ဒီကနေ့ မနက်ပိုင်းက စစ်ကြောင်းထိုးလာတဲ့ စစ်ကောင်စီတပ်ဟာ လမ်းတစ်လျှောက် လက်နက်ကြီးတွေနဲ့ ရမ်းသန်း ပစ်ခတ်လာတာကြောင့် ကျောက်မှော်၊ ကြက်လျှာ၊ အင်းပတ်၊ ကျွန်းပေါ်၊ နှောပင်၊ စုန်းချောင်း၊ကျောက်ကုန်း၊ ကွေ့ချောင်း၊ ပတိမ်ပြင်၊ သံဖို၊ စေသူ၊ နဘူးတော၊ လက်ပံ၊ ထန်းဇင်၊ ဘန့်ဘွေး ကျေးရွာတွေက ပြည်သူတွေ ထွက်ပြေးနေရတယ်လို့ ဆိုပါတယ်။
အခုလို လက်နက်ကြီးတွေနဲ့ ရမ်းကား ပစ်ခတ်သွားတာကြောင့် စစ်ဘေး တိမ်းရှောင်နေတဲ့ ကြက်လျှာရွာက အမျိုးသားတစ်ဦးနဲ့ ကျောက်မှော်ရွာက အမျိုးသား တစ်ဦး ထိခိုက်ဒဏ်ရာ ရခဲ့တယ်လို့ WGPDF က ဆိုပါတယ်။
အဆိုပါ စစ်ကြောင်းဟာ ကျောက်မှော်ကျေးရွာက ၅၂ နှစ် အရွယ် အမျိုးသား တစ်ဦးနဲ့ ၅၃ နှစ်အရွယ် အမျိုးသမီး တစ်ဦးကိုလည်း ဖမ်းဆီး ခေါ်ဆောင်သွားတယ်လို့ သိရပါတယ်။
ဒီလို ကျေးရွာတွေကို စစ်ကြောင်းထိုးပြီး ပြည်သူတွေကို ဖမ်းဆီးနေတဲ့ စစ်ကောင်စီ စစ်ကြောင်းကို ပြည်သူတွေ သတိထားကြဖို့ ထုတ်ပြန်ချက်မှာ သတိပေးထားပါတယ်။
MK-007
#ယင်းမာပင်-ကနီ