မဲခေါင်၊ ဇန်နဝါရီ ၂၁
မြောင်မြို့နယ်မှာ စစ်ကောင်စီတပ် စစ်ကြောင်းထိုးနေတဲ့ကြားက ပြည်သူ ရာချီ စုပေါင်း ချီတက်ပြီး သပိတ်တိုက်ပွဲ ဆင်နွှဲခဲ့တယ်လို့ မုံရွာ လူထုသပိတ်တိုက်ပွဲ ဦးဆောင်ကော်မတီက ဒီကနေ့ ထုတ်ပြန်ပါတယ်။
မုံရွာ ပင်မသပိတ်နဲ့ လူထုအကျိုးပြု မြောင်လူငယ်ကွန်ရက်-YFC တို့ ပူးပေါင်း ဦးဆောင်ပြီး မြောင်မြို့နယ်ရှိ ကျေးရွာ အချို့မှာ “ အဆုံးသတ်တိုက်ပွဲ ဆင်နွှဲဖို့ မြောင်နယ်သားတို့ စုရုံးစို့” ခေါင်းစဉ်နဲ့ ၄ နာရီခန့်ကြာအောင် သပိတ်တိုက်ပွဲ ဆင်နွှဲခဲ့တာလို့ သိရပါတယ်။
စစ်ကောင်စီတပ်တွေ ကုန်းကြောင်း၊ ရေကြောင်းနဲ့ မြောင်မြို့နယ်ကို စစ်ကြောင်းထိုးနေတဲ့ကြားက မြောင် ပြည်သူလူထု ရာနဲ့ချီ စုဝေးချီတက်ပြီး စစ်အာဏာရှင်စနစ် အလိုမရှိ ဆန္ဒပြသပိတ်ကို ပြုလုပ်ခဲ့ကြတာပါ။
“ ဒီနှစ်ထဲမှာ ပြည်သူအားလုံး တစ်သံတည်း ညီပြီး တချီတည်းနဲ့ စစ်ကျွန်ဘဝကနေ အပြတ်ရုန်းရမယ့် အချိန် ဖြစ်ပါတယ်။ လိုအပ်ရင် လိုအပ်သလို ပြည်သူပိုင် နေရာတွေ၊ ပြည်သူပိုင်လမ်းတွေကို လူထုအားနဲ့ ပြန်လည် သိမ်းပိုက်ဖို့ ဒီကနေ့ လူထုက အသင့်ဖြစ်နေတယ်ဆိုတာ သက်သေပြနေပါတယ်။ စစ်ရေးအရှိန် မြှင့်တင်လာမယ့် အချိန်မှာ ဟန်ချက်ညီတဲ့ လူထုလှုပ်ရှားမှုတွေ အချိန်ကိုက် ပြုလုပ်နိုင်ဖို့ အရေးကြီးတယ်” လို့ မုံရွာ လူထုသပိတ်တိုက်ပွဲ ဦးဆောင် ကော်မတီဝင် ကိုခန့်ဝေဖြိုးက ဟောပြာခဲ့ပါတယ်။
အဲဒီ သပိတ်တိုက်ပွဲသို့ မုံရွာ သပိတ်ခေါင်းဆောင် ကိုခန့်ဝေဖြိုး၊ မုံရွာ စီးပွားရေး တက္ကသိုလ် ကျောင်းသား သမဂ္ဂ ဒုဥက္ကဋ္ဌ ကိုလွင်မိုးသန့်နဲ့ အထွေထွေ အတွင်းရေးမှူး နန်းဟေဟွာ၊ ရွှေဘို နည်းပညာ ကောလိပ် ကျောင်းသားများ သမဂ္ဂ ဥက္ကဋ္ဌ ကိုထက်အောင်နဲ့ မြောင်လူငယ်ကွန်ရက်က မအမရာမှူး တို့မှ နိုင်ငံရေး၊ တော်လှန်ရေး ဆိုင်ရာ အကြောင်းအရာ တွေကို ဟောပြော တင်ပြခဲ့တယ်လို့ သိရပါတယ်။
ဓာတ်ပုံ-မုံရွာ လူထုသပိတ်တိုက်ပွဲ ဦးဆောင် ကော်မတီ-Youths For Community-Myaung
MK-003