မဲခေါင်၊ သြဂုတ် ၇

စစ်ကိုင်းတိုင်း၊ မြောင်မြို့နယ် အခြေစိုက် တော်လှန်ရေး တပ်ဖွဲ့ ဖြစ်တဲ့ Royal Brother Defence Force-RBDF က စနိုက်ပါ သေနတ် ထုတ်လုပ်အောင်မြင်ခဲ့တယ်လို့ သိရပါတယ်။

မီတာ ၆၀၀ အကွာအဝေးကို ပစ်ခတ်နိုင်တဲ့ ကျည် ၅ ထောင့်ထိုး စနိုက်ပါ အမျိုးအစား ဖြစ်ပြီး လက်ရှိ ၄ လက် ထုတ်လုပ်ထားပြီဖြစ်လို့ မြင်းခြံ အခြေစိုက် Myingan 9 star အဖွဲ့ကို တစ်လက် လှူတန်း အားဖြည့်ထားပြီး ဒေါင်းနီ တော်လှန်ရေးအဖွဲ့ကို ထပ်မံ လှူဒါန်းမယ်လို့ ဆိုပါတယ်။

“ကုန်ကြမ်းပစ္စည်းတွေ စုံလို့ရှိရင် တစ်လက်ကို ၂ ပတ်လောက် အချိန်ပေးပြီး ထုတ်နိုင်တယ်။ ကုန်ကျစရိတ် ကတော့ တစ်လက်ကို ၅ သိန်း ဝန်းကျင်ပါ။ အခုတော့ ၄ လက် ထုတ်ထားပြီးပြီ” လို့ Royal Brother Defence Force တာဝန်ရှိသူက ပြောပါတယ်။

၂၀၂၁ ခုနှစ်၊ ဇွန်လက စတင်ကာ CDSOM – မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့ အဖြစ် တူမီး လက်နက်နဲ့ စတင်တော်လှန်ခဲ့ရာ လက်ရှိ Royal Brother Defence Force အဖြစ် ရပ်တည်ကာ အဆင့်မြင့် စနိုင်ပါ ကိုယ်တိုင် ထုတ်လုပ်နိုင်ပြီလို့ သူကဆိုပါတယ်။

“အခက်အခဲတွေကတော့ အများကြီးပဲ။ ကျွန်တော်တို့ အဖွဲ့က အညာသား တောင်သူတွေ ဆိုတော့ မိဘပိုင် လယ်ယာတွေကို ရရာဈေးနဲ့ ပေါင်နှံရောင်းချပြီး တော်လှန်ရေးခရီးကို ဆက်ခဲ့တာပါ။ စတင်တော်လှန်တုန်းက တူမီးနဲ့ပဲစခဲ့တာ မောင်းပြန် တစ်လက်မှတောင် မရှိခဲ့ဘူး” လို့ သူက ဆိုပါတယ်။

လက်နက်ကိုင်လမ်းစဉ် ရွေးချယ်ကာ စစ်အာဏာရှင်ကို တော်လှန်စက လက်လုပ် သေနတ်တွေနဲ့ တော်လှန်ရင်း မယှဉ်နိုင်လို့ ပြေးလွှားရှောင်တိမ်းကြရာ စိတ်ဓာတ် ကျဆင်းရမှုတွေ ရှိခဲ့တယ်လို့ ဆိုပါတယ်။

ဒါပေမယ့် မတရားမှုကို တော်လှန်ရာမှာ တတ်စွမ်းနိုင်သလောက် မှန်မှန်ကန်ကန်လုပ်ဖို့ လိုအပ်ကြောင်း၊ “ လက်နက်ရှိမှ တော်လှန်မယ်ဆိုရင် လက်ရှိအနေအထားအထိ ရောက်လာနိုင်စရာ မရှိဘူး” ဆိုတဲ့ ခေါင်းဆောင်တွေရဲ့ စိတ်ဓာတ် မြှင့်တင်ပေးမှုကြောင့် စစ်ကောင်စီကို တာဝေးပစ် ရှော့တိုက်ဒုံး တွေနဲ့ ပြန်ပစ်နိုင်တဲ့ အနေအထား ရောက်လာတာဖြစ်ကြောင်း Royal Brother Defence Force ခေါင်းဆောင်က ပြောပါတယ်။

CJ–005

#MekongNews

#Myingan9star

#CDSOM

#စနိုက်ပါ

#မြောင်

#RoyalBrotherDefenceForce

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)