မဲခေါင်၊ မတ် ၆
မကွေးတိုင်း၊ ကန်နီရွာကနေ မြိုင်မြို့ပေါ်ကို ရိက္ခာတက်ဝယ်တဲ့ စစ်ကောင်စီတပ်နဲ့ ပျူစောထီးအဖွဲ့ကို မနေ့က လမ်းတစ်လျှောက် အကြိမ်ကြိမ် တိုက်ခိုက်ခဲ့ရာ ၇ ဦးသေဆုံးပြီး ၁၄ ဦးကျော် ဒဏ်ရရနိုင်တယ်လို့ မြိုင် ပြည်သူ့ကာကွယ်ရေးတပ်က ထုတ်ပြန်ပါတယ်။
ပျူစောထီးကျေးရွာဖြစ်တဲ့ ကန်နီကျေးရွာကနေ မြိုင်မြို့ပေါ် ရိက္ခာတက်ဝယ်တဲ့ စစ်ကောင်စီနဲ့ ပျူစောထီး တွေကို လမ်းတစ်လျှောက် မိုင်းဆွဲတာ၊ ခြောင်းမြောင်း ပစ်ခတ်တာ၊ ဒရုန်းနဲ့ ဗုံးကြဲ တိုက်ခိုက်တာတွေ လုပ်ခဲ့တယ်လို့ ဆိုပါတယ်။
မြိုင်မြို့နယ်၊ ပေါက်ပြင်းရွာ အနီး မနေ့က နေ့လယ်ပိုင်းမှာ မိုင်း ၃ ကြိမ်ဆွဲ တိုက်ခိုက်ရာ စစ်ကောင်စီ ပူးပေါင်း အဖွဲ့က ၇ ဦး ဒဏ်ရာရကာ မွန်းလွဲပိုင်းမှာ ဒရုန်းနဲ့ ဗုံးကြဲခဲ့ရာ စစ်သား ၂ ဦးနဲ့ ပျူစောထီး ၃ ဦး ဒဏ်ရာတွေရပြီး သူတို့ကို မြိုင်ဆေးရုံသို့ ကားနဲ့ခေါ်ဆောင်သွားတယ်လို့ မြိုင်ပြည်သူ့ကာကွယ်ရေးတပ်က ပြောပါတယ်။
အဲဒီလို လမ်းတစ်လျှောက် တိုက်ခိုက်ခံရတဲ့ စစ်ကောင်စီနဲ့ ပျူစောထီးတွေဟာ မြိုင်မြို့မှာ ညအိပ် တပ်စွဲထားပြီး ဒီကနေ့ မနက်ပိုင်း ကန်နီကျေးရွာက် ပြန်လာခဲ့ရာ ဒေသခံကာကွယ်ရေးတပ်တွေ ထပ်မံ မိုင်းဆွဲလို့ စစ်သားနဲ့ ပျူစောထီး ၉ ဦး ဒဏ်ရာရသွားတယ်လို့ ဆိုပါတယ်။
အတွင်းသတင်းတွေအရ စစ်ကောင်စီတပ်သားတွေ ဖြစ်တဲ့ ဆရာစိုး၊ ဝင်းမင်း၊ မျိုးမင်းအောင်၊ မောင်ဦး၊ စိုးမင်းထွန်းနဲ့ ပျူစောထီးအဖွဲ့က အောင်မျိုးဦး နဲ့ မနှင်းရွှေ တို့ ၇ ဦး သေဆုံးတယ်လို့ မြိုင် ပြည်သူ့ကာကွယ်ရေးတပ်က ထုတ်ပြန်ပါတယ်။
အဆိုပါ တိုက်ခိုက်မှုတွေကို မြိုင် ပြည်သူ့ကာကွယ်ရေးတပ်ရင်း (၂)- ခွဲ (၃) နဲ့ (၄)၊ ဗိုလ်လင်းမြွေ အဖွဲ့တို့ ပူးပေါင်းလုပ်ဆောင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
MK-007