မဲခေါင်၊ စက်တင်ဘာ ၁၉
ရှမ်းပြည်နယ် မြောက်ပိုင်း၊ မူဆယ်မြို့နယ်၊ မူဆယ်-နမ့်ခမ်း လမ်းမကြီးဘေး၊ စယ်လန့်ကျေးရွာအုပ်စုမှာ စစ်ကောင်စီတပ်နဲ့ တအာင်းအမျိုးသား လွတ်မြောက်ရေး တပ်မတော်-TNLA တို့ ဒီကနေ့ စက်တင်ဘာလ ၁၉ ရက်နေ့မှာ တိုက်ပွဲ ဆက်လက် ပြင်းထန်နေလို့ လူ ၁,၀၀၀ ကျော် ထွက်ပြေး တိမ်းရှောင် နေရတယ်လို့ ဒေသခံတွေက ပြောပါတယ်။
စယ်လန့်ကျေးရွာအုပ်စု၊ ဆိုင်းခေါင်ရွာအနီး တပ်စွဲထားတဲ့ စစ်ကောင်စီတပ်က စက်တင်ဘာလ ၁၇ ရက်နေ့မှာ TNLA တပ်ရှိရာ လွယ်တေမှိုင်းတောင်ကို လက်နက်ကြီးနဲ့ ပစ်ခတ်ခဲ့ပြီးနောက် မနေ့ စက်တင်ဘာလ ၁၈ ရက်နေ့ ညနေ ၄ နာရီခန့်မှာ စစ်ကောင်စီတပ်နဲ့ TNLA မိုင်းဆတ်ကျေးရွာအနီး တောင်ကုန်းမှာ တိုက်ပွဲစတင်ခဲ့တာ ဖြစ်ပါတယ်။
တိုက်ပွဲဟာ ဒီကနေ့ ညနေ ၅ နာရီအထိ ဖြစ်ပွားနေဆဲ ဖြစ်ပြီး အပြန်အလှန် ပစ်ခတ်မှုတွေ ရှိနေပေမယ့် ထိခိုက် သေဆုံးမှုတွေကိုတော့ မသိရသေးဘူးလို့ တိုက်ပွဲအနီးက ကျေးရွာအတွင်း ကျန်ရှိနေတဲ့ ရွာခံ တစ်ဦးက ပြောပါတယ်။
“အခုထိ အပြန်အလှန် ပစ်ခတ်နေတုန်းဘဲ။ ရွာထဲ ဖြစ်နေတာတော့ မဟုတ်ဘူး။ စစ်တပ်ဘက်က လက်နက်ကြီးတွေနဲ့ ပစ်နေတာ” သူက ဒီကနေ့ ညနေ ၅ နာရီမှာ မဲခေါင်သတင်းဌာနကို ပြောပါတယ်။
မနေ့က တိုက်ပွဲမှာ စစ်ကောင်စီတပ်က မန်ကန်ရွာထဲ လက်နက်ကြီး ၂ လုံး အပါအ၀င် လက်နက်ငယ်တွေနဲ့ ပစ်ခတ်ခဲ့လို့ မန်ကန်ရွာနေ အသက် ၄၀ အရွယ် အမျိုးသမီး တစ်ဦး ထိမှန် ဒဏ်ရာ ရရှိခဲ့ပါတယ်။
“စစ်တပ်က တိုက်ပွဲဖြစ်တဲ့နေရာ မဟုတ်ဘဲနဲ့ မန်ကန်ရွာထဲ ပစ်လာတာ။ ရွာခံတွေလည်း ပြေးဖို့ လုပ်နေတော့ အန်တီ တစ်ယောက်ရဲ့ ပေါင်မှာ သေနတ်ထိပြီး လူမှုကူညီရေးအသင်းတွေ ခေါ်သွားပြီ။ ဘုန်းကြီးကျောင်း နားမှာလည်း လက်နက်ကြီး ၂ လုံးကျတယ်၊ တစ်လုံးက မပေါက်သေးဘူး” လို့ မန်ကန်ရွာခံ အမျိုးသမီး တစ်ဦးက ပြောပါတယ်။
တိုက်ပွဲအနီးက နမ့်ကတ်ကျေးရွာအုပ်စု မန်ကန်ရွာ၊ မိုင်းဆတ်ရွာ၊ ပန်ဟုပ်ရွာနဲ့ နမ့်ကတ်ရွာက ရွာခံ ၅၀၀ ကျော်ဟာ မူဆယ်-နမ့်ခမ်းလမ်းမကြီးဘေးက တုန်ခွမ်ရွာနဲ့ နမ့်ခမ်းမြို့နယ်၊ ကောင်းတပ်ရွာတွေထဲ မနေ့ပ ညတွင်းချင်း တိမ်းရှောင်ခဲ့ရသလို စယ်လန့်ကျေးရွာနေ လူ ၅၀၀ ကျော်ဟာ နီးစပ်ရာ ဆွေမျိုးတွေထံ တိမ်းရှောင် နေရတယ်လို့ ဒေသခံတွေက ဆိုပါတယ်။
လက်ရှိ စစ်ရှောင်တွေကို တုန်ခွမ်ရွာနဲ့ ကောင်းတပ်ရွာတွေက စားဝတ်နေရေး တာဝန်ယူထားပြီး လူဦးရေ များပြားလို့ မိုးကာတဲနဲ့ စားနပ်ရိက္ခာတွေ အရေးပေါ် လိုအပ်နေတယ်လို့ တုန်ခွမ်ရွာမှာ တိမ်းရှောင်နေသူတွေက ပြောပါတယ်။
“ရွာခံတွေက အခုထိ ဆက်တိုက် လာနေတုန်းပဲ။ ဒီရွာက ဇရပ်နဲ့ နေအိမ်တွေ ပြည့်နေပြီ။ နေရာတွေ အခက်ခဲ ဖြစ်နေတယ်။ ထမင်း၊ ဟင်းတွေလည်း ဒီရွာက လူတွေပဲ စုဆောင်းပြီး ချက်ကျွေးနေတော့ ရေရှည်ဆိုရင် အဆင်မပြေဘူး။ ကူညီမယ့်သူတွေ လိုတာပေါ့” သူက ပြောပါတယ်။
စက်တင်ဘာ ၁၇ ရက်နေ့က မူဆယ်မြို့၊ စွမ်စော်ရပ်ကွက်နဲ့ ၅ မိုင်ခန့်သာ ကွာဝေးတဲ့ ဝိန်းနန်းကျေးရွာက TNLA စစ်ကြောင်းကို စစ်ကောင်စီတပ်နဲ့ ပြည်သူ့စစ် ပူးပေါင်း တိုက်ခိုက်ခဲ့လို့ တိုက်ပွဲ ပြင်းထန်ခဲ့ပါတယ်။
ပြီးခဲ့တဲ့ ဩဂုတ်လ ၂ ရက်နေ့ကလည်း စစ်ကောင်စီတပ်နဲ့ TNLA ယ်လန့်ကျေးရွာအုပ်စု အနီးမှာ တိုက်ပွဲ ပြင်းထန်ခဲ့ရာ စစ်တပ်စခန်းတွေကို TNLA က တန်ပြန် သိမ်းပိုက်ဖို့ ကြိုးစားခဲ့ရာက ဒေသခံ ထောင်ချီ မူဆယ်မြို့ပေါ်မှာ တစ်လကြာ တိမ်းရှောင်ခဲ့ရပါတယ်။
CJ-014
#MeKongNews
#မူဆယ်
#TNLA
#ပြည်သူ့စစ်