မဲခေါင်၊ ဇူလိုင် ၂၅
ရှမ်းပြည်နယ် မြောက်ပိုင်း၊ မူဆယ်မြို့နယ်၊ နမ့်အွမ်ရွာအနီးက ဆိုင်းခေါင်ရွာကို စင်ကောင်စီက လေယာဉ်နဲ့ ဗုံးကြဲလို့ ပြည်သူ တစ်ဦး သေဆုံးပြီး ၂ ဦး ဒဏ်ရာရသွားတယ်လို့ ဒေသခံတွေက ပြောပါတယ်။
ဒီဒေသမှာ TNLA နဲ့ စစ်ကောင်စီတပ် မနေ့ည ကတည်းက တိုက်ပွဲ ဖြစ်ပွားနေရာက အခုလို ဗုံးလာကြဲတာလို့ ဒေသခံ အမျိုးသား တစ်ဦးက ပြောပါတယ်။
“ ပြည်သူ တွေထိတယ်။ ဆိုင်းခေါင်ရွာမှာ” လို့ ဒေသခံ အမျိုးသမီး တစ်ဦးက ပြောပါတယ်။
ဗုံးကြဲမှုကြောင့် အမျိုးသား တစ်ဦးသေဆုံးပြီး အမျိုးသား တစ်ဦးနဲ့ အမျိုးသမီး တစ်ဦး ဒဏ်ရာရကာ နေအိမ် ၃ လုံး ထိခိုက်ပျက်စီးခဲ့တယ်လို့ သူက ပြောပါတယ်။
“ TNLA တပ် လာဖြိုတာလို့ကြားတယ်။ လေယာဉ်က ၁၀၅ မိုင်ထိ တက်တက်သွားပြီး ပြန်ခေါက်လာပြီး လာကြဲတာ။ နမ့်အွမ်နားဘက် ၄ ခေါက်” လို့ သူက ရှင်းပြပါတယ်။
လက်ရှိ နမ့်အွမ် အနီးနားရွာတွေက ဒေသခံတွေ နမ့်အွမ်ရွာထဲ တိမ်းရှောင်လာကြပြီး နမ့်အွမ်ရွာလယ်က လူတွေကတော့ အိမ်မှာပဲ နေရတယ်လို့ သူက ပြောပါတယ်။
ဒေသခံ တစ်ဦးကတော့ “ TNLA တွေလည်း ရွာထဲ လာနေ၊ စစ်ကောင်စီက လာပစ်။ အဲဒါကြောင့် ပြည်သူတွေ အလကားနေရင်း သေရတာ။ ပြည်သူတွေက ဘယ်သူ့ကို အားကိုးရမှာလဲ။ TNLA ၊ KIA ၊ စစ်ကောင်စီ ဘယ် လက်နက်ကိုင်မှ ရွာထဲ မလိုချင်ဘူး” လို့ ပြောပါတယ်။
ဒီတိုက်ပွဲ အတွင်း နှစ်ဖက် ထိခိုက် ကျဆုံးမှုတွေ ရှိတယ်လို့ သိရပေမယ့် မဲခေါင်သတင်းဌာန အနေနဲ့ စုံစမ်းနေဆဲ ဖြစ်ပါတယ်။
မနေ့ညက TNLA နဲ့ စစ်ကောင်စီတို့ တိုက်ပွဲ ပြင်းထန်ခဲ့ပြီး ၁၀၅ မိုင်နဲ့ မန့်ဖတ်ကာ ခလရ (၁၂၃) တပ်တွေကနေ လက်နက်ကြီး ပစ်ခတ်တာကြောင့် နမ့်ဖတ်ကာရှိ နေအိမ် တစ်လုံးနဲ့ နမ့်အွမ်ဈေးမှာ ကျရောက်ပေါက်ကွဲပြီး နေအိမ်၊ ဆိုင်ခန်းတွေ ပျက်စီးခဲ့ပါတယ်။
CJ-008
Video-CJ
#MeKongNews
#ဆိုင်းခေါင်ရွာ
#ဗုံးကြဲ
#TNLA