မဲခေါင်၊ နိုဝင်ဘာ ၉
ရှမ်းပြည်နယ် မြောက်ပိုင်း၊ တရုတ်-မြန်မာ နယ်စပ်ဂိတ် ဖြစ်တဲ့ မုံးကိုးဒေသကို ၁၀၂၇ စစ်ဆင်ရေး အတွင်း သိမ်းပိုက်နိုင်ခဲ့ပြီးနောက် အုပ်ချုပ်ရေးစနစ် ပြန်လည် ထူထောင်မယ်လို့ MNDAA က မနေ့က ပြောဆိုလိုက်ပါတယ်။
၁၀၂၇ စစ်ဆင်ရေး ၁၂ ရက်မြောက်နေ့ဖြစ်တဲ့ နိုဝင်ဘာ ၇ ရက်မှာ ၇ နှစ်ကျော်ကြာ စစ်ကောင်စီ ထိန်းချုပ်ထားတဲ့ မုံးကိုးဒေသကို MNDAA တပ်ဖွဲ့တွေ ပြန်လည် ထိန်းချုပ်နိုင်ခဲ့တာ ဖြစ်ပါတယ်။
၂၀၁၆ ခုနှစ်မှာ မြောက်ပိုင်း ညီနောင်မဟာမိတ်တပ်တွေနဲ့ စစ်ကောင်စီ တိုက်ပွဲ ပြင်းထန်ခဲ့ပြီး စစ်တပ်က လေကြောင်း တိုက်ခိုက်မှုတွေ ပြုလုပ်ခဲ့ရာ အရပ်သား ပြည်သူတွေ ထိခိုက် သေဆုံးမှုရှိလို့ ညီနောင်တပ်တွေ ဆုတ်ခွာပေးခဲ့ရပါတယ်။
နိုဝင်ဘာ ၅ ရက်မှာတော့ ညီနောင်တပ်ဖွဲ့တွေက မုံးကိုးဗျူဟာကုန်းနဲ့ တပ်စခန်းတွေကို စတင်ထိုးစစ်ဆင်ခဲ့ပြီး ၂ ရက်အကြာမှာ သိမ်းယူနိုင်ခဲ့ပြီးနောက် တစ်ကျော့ပြန် အခြေချနိုင်ခဲ့ပြီး အုပ်ချုပ်ရေးစနစ်တွေ လည်ပတ်နိုင်ဖို့ ကြိုးစားနေတယ်လို့ MNDAA ကပြောပါတယ်။
ဒီတိုက်ပွဲ အတွင်း စစ်ကောင်စီတပ်သား ထိခိုက်သေဆုံးမှုများကာ လက်နက် ခဲယမ်းတွေ ရရှိခဲ့သလို စစ်တပ် လက်အောက်ခံ ပြည်သူ့စစ်တွေလည်း ကြောက်ရွံ့ ထွက်ပြေးကုန်တာကြောင့် မုံးကိုးခရိုင် တစ်ခုလုံး ပြန်လည် ရရှိခဲ့တယ်လို့ ဆိုပါတယ်။
အောက်တိုဘာ ၂၇ ရက်က စတင်ခဲ့တဲ့ ၁၀၂၇ စစ်ဆင်ရေးအတွင်း ရှမ်းမြောက်ဒေသက မြို့ ၅ မြို့ အပါအဝင် စစ်တပ်စခန်းနဲ့ ပြည်သူ့စစ် စခန်းပေါင်း ၁၂၀ ကျော်ကို ညီနောင်တပ်တွေ သိမ်းပိုက်ထားနိုင်ပြီလို့ အသိပေး ထုတ်ပြန်ထားပါတယ်။
MK-007
#MekongNews
#မုံးကိုး
#MNDAA
#အုပ်ချုပ်ရေးစနစ်